ເກີດເຫດດິນເຈື່ອນຢູ່ອິນໂດເນເຊຍ ເສຍຊີວິດ 13 ຄົນ ສູນຫາຍກວ່າ 27 ຄົນ
ວັນທີ 11 ມັງກອນນີ້, ເຈົ້າໜ້າທີ່ອາວຸໂສດ້ານໄພພິບັດຂອງອິນໂດເນເຊຍ ເປີດເຜີຍວ່າ: ຈຳນວນຜູ້ສູນຫາຍຈາກເຫດດິນເຈື່ອນຢູ່ແຂວງຊະວາຕາເວັນຕົກ ໃນທ້າຍອາທິດຜ່ານມາ ເພີ່ມຂຶ້ນເປັນ 27 ຄົນ, ສ່ວນຜູ້ເສຍຊີວິດຍັງຄົງຢູ່ 13 ຄົນ.
ທ່ານ ບູດີ ບູດີມັນ ຫົວໜ້າໜ່ວຍສຸກເສີນຂອງໜ່ວຍງານແກ້ໄຂໄພພິບັດແຂວງຊະວາຕາເວັນຕົກ ລະບຸວ່າ: ໄພທຳມະຊາດຄັ້ງນີ້ເກີດຈາກຝົນຕົກໜັກຕໍ່ເນື່ອງຢູ່ບ້ານຊີຮັນຈວນຂອງເຂດຊູເມດັງ.
ທ່ານ ບູດີມັນ ກ່າວຕໍ່ສຳນັກຂ່າວຊິນຮົວທາງໂທລະສັບວ່າ: ພວກເຮົາໄດ້ຮັບລາຍງານວ່າມີຜູ້ສູນຫາຍເພີ່ມຂຶ້ນຫລັງເກີດເຫດດິນເຈື່ອນ. ພ້ອມກ່າວອີກວ່າ: ຍັງມີຜູ້ບາດເຈັບສູງເຖິງ 18 ຄົນຈາກເຫດດິນເຈື່ອນຄັ້ງນີ້ ເຊິ່ງສ້າງຄວາມເສຍຫາຍຕໍ່ບ້ານເຮືອນທີ່ຕັ້ງຢູ່ເທິງພູ 18 ຫລັງ.
ທ່ານ ບູດີມັນ ກ່າວວ່າ: ປະຕິບັດການຄົ້ນຫາ ແລະ ຊ່ວຍເຫລືອຜູ້ປະສົບໄພກັບມາເດີນໜ້າອີກໃນມື້ນີ້ ພ້ອມອຸປະກອນເຄື່ອງຈັກກົນໜັກ 3 ໜ່ວຍ.
ເຖິງຢ່າງໃດກໍດີ, ທີມເຈົ້າໜ້າທີ່ກູ້ໄພຕ້ອງປະຕິບັດງານຢ່າງລະມັດລະວັງ ແລະ ຊັກຊ້າ ເນື່ອງຈາກອາດເກີດຝົນຕົກໜັກທ່າມກາງສະພາບມວນດິນທີ່ບອບບາງຂອງເທິງພູ.
