ຊາດທີ່ສັກວັກຊີນຄຸ້ມກັນໂຄວິດ-19 ໂດຍບໍ່ມີຜູ້ຕິດເຊື້ອຈັກຄົນ

ສາທາລະນະລັດ Palau ອາດເປັນຊາດທຳອິດຂອງໂລກທີ່ໄດ້ສັກວັກຊີນຄຸ້ມກັນໂຄວິດ-19 ສຳເລັດ ໂດຍບໍ່ມີຜູ້ຕິດເຊື້ອຈັກຄົນກໍຕາມ.

ສາທາລະນະລັດ Palau ເປັນປະເທດໃນເກາະນ້ອຍໆ ມີເນື້ອທີ່ 459 ກມ2 ແລະ ມີພົນເມືອງພຽງ 18.000 ຄົນ. ວັນທີ 2 ມັງກອນນີ້ Palau ໄດ້ຮັບວັກລີນຊຸດທຳອິດຈາກບໍລິສັດ ໂມເດິນນາ. ກະຊວງສາທາລະນະສຸກຂອງ Palau ໃຫ້ຮູ້ວ່າ ການສັກວັກຊີນໄດ້ເລີ່ມຂຶ້ນແຕ່ວັນທີ 3 ມັງກອນ.

ວັກຊີນ 2.800 ໂດສ ທຳອິດ ໄດ້ຂົນສົ່ງໄປເຖິງ Palau ແລະ ຈະສັກໃຫ້ກັບພະນັກງານແພດໝໍເປັນຊຸດທຳອິດ ພ້ອມກັບພະນັກງານຫຼັກແຫຼ່ງ ແລະ ຊູມຊົນທີ່ມີຄວາມສ່ຽງ. ແຕ່ລະຄົນຈະໄດ້ສັກ 2 ເຂັມ ຫ່າງກັນ 28 ວັນ.

ອົງການອະນາໄມໂລກໃຫ້ຮູ້ວ່າ ສາທາລະນະລັດ Palau ອາດເປັນໜຶ່ງໃນໜ້ອຍປະເທດທີ່ບໍ່ທັນມີຜູ້ຕິດເຊື້ອ ແລະ ເສຍຊີວິດຈາກໂຄວິດ-19 ແມ່ນແຕ່ຄົນດຽວ. ລະຫວ່າງເດືອນມັງກອນ 2020 ໂຄວິດ-19 ເລີ່ມແຜ່ລະບາດໄປທົ່ວອາຊີ-ປາຊີຟິກ, Palau ກໍເປັນປະເທດທຳອິດໃນການປະກາດໃຊ້ມາດຕະການຄວບຄຸມຊາຍແດນຢ່າງເຄັ່ງຄັດ.