ນັກສຶກສາລາວ 30 ຄົນໄດ້ຮັບທຶນໄປທັດສະນະສຶກສາຢູ່ສິງກະໂປ

ນັກສືກສາຈາກມະຫາວິທະຍາໄລແຫ່ງຊາດຈໍານວນ 30 ຄົນ, ໄດ້ຮັບທຶນໄປທັດສະນະສຶກສາຢູ່ປະເທດສິງກະໂປເປັນເວລາ 3 ອາທິດ, ແຕ່ວັນທີ 8-29 ກໍລະກົດນີ້, ເພື່ອແລກປ່ຽນບົດຮຽນກັບນັກສຶກສາ ແລະ ຄູອາຈານຢູ່ໂຮງຮຽນສັບພະວິຊາຫງີອັນ (Ngee Ann Polytechnic) ເຊິ່ງແມ່ນສະຖາບັນການສຶກສາຊັ້ນສູງຂອງສິງກະໂປ ແລະ ເປັນປີທີ 2 ທີ່ຈັດໃຫ້ມີການແລກປ່ຽນນັກສຶກສາດັ່ງກ່າວ, ໂດຍໄດ້ຮັບການສະໜັບສະໜູນຈາກກອງທຶນສາກົນສໍາລັບການປະຕິບັດງານຂອງທີມຊ່ຽວຊານ (TFI-SCALE).

ທ່ານ ໂດມີນິກ ໂກສ ເອກອັກຄະລັດຖະທູດສິງກະໂປປະຈໍາລາວ ໄດ້ກ່າວຄໍາເຫັນໃນພິທີລ້ຽງສົ່ງນັກສຶກສາໃນວັນທີ 4 ກໍລະກົດນີ້ວ່າ: ນີ້ແມ່ນໂອກາດອັນດີສໍາລັບນັກສຶກສາລາວທີ່ຈະໄດ້ຮຽນຮູ້ກ່ຽວກັບປະສົບການການພັດທະນາຂອງປະເທດສິງກະໂປ, ກໍຄືການແລກປ່ຽນທາງດ້ານວັດທະນາທໍາລະຫວ່າງລາວ ແລະ ສິງກະໂປ ໃຫ້ເລິກເຊິ່ງກວ່າເກົ່າ.