ສຽງຈົ່ມຈາກແມ່ຄ້າຮ້ານແຄມທາງ
ໂດຍ: ທິດກໍ່າ
ນັບແຕ່ສາຍທາງດ່ວນວຽງຈັນ-ວັງວຽງໄດ້ເປີດບໍລິການຮັບໃຊ້ສັງຄົມເປັນຕົ້ນມາ ກໍເຫັນວ່າມີຜູ້ໃຊ້ລົດໃຊ້ຖະໜົນ ແລະ ບັນດານັກທ່ອງທ່ຽວທັງຫລາຍຕ່າງກໍຫັນມານຳໃຊ້ທາງດ່ວນຢ່າງເປັນຂະບວນຫລວງຫລາຍພາຍມາກໃນແຕ່ລະວັນ, ແຕ່ລະອາທິດ ໂດຍສະເພາະແມ່ນວັນເສົາກັບວັນທິດ ອັນສາເຫດກໍເນື່ອງມາຈາກບາງເຫດຜົນ ແລະ ບາງປັດໄຈ ເປັນຕົ້ນອັນທີໜຶ່ງ ຖືວ່າໄປທາງດ່ວນມັນສະດວກສະບາຍ, ຂັບລົດໄປມາວ່ອງໄວ, ທັນໃຈ, ໃຊ້ເວລາພຽງໜຶ່ງຊົ່ວໂມງກວ່າໆກໍຮອດວັງວຽງຕາມຈຸດປະສົງ. ສ່ວນວ່າໄປຕາມເສັ້ນທາງເກົ່າ ຄືເສັ້ນທາງ 13 ເໜືອ ຊ່ວງໄລຍະແຕ່ນະຄອນຫລວງວຽງຈັນຫາວັງວຽງນັ້ນມັນຂ້ອນຂ້າງຫຍຸ້ງຍາກ ແລະ ຊັກຊ້າເປັນສາມສີ່ຊົ່ວໂມງຈຶ່ງຮອດ. ສະພາບປັດຈຸບັນ ເຖິງວ່າມີການປັບປຸງສ້ອມແປງໃນບາງຈຸດບາງບ່ອນ ແຕ່ບໍ່ພໍຮອດເທົ່າໃດເດືອນມັນກໍເປ່ເພເປັນບວກເປັນຂຸມອີກ. ຍັງບໍ່ພຽງແຕ່ເທົ່ານັ້ນ ຍາມແລ້ງຄືແນວນີ້ບາງຍ່ານເວລາແລ່ນລົດມີແຕ່ຂີ້ຝຸ່ນໄງ່ກຸ້ມ ອັນສາເຫດຫລັກໆກໍຍ້ອນວ່າມີລົດໜັກແລ່ນຜ່ານຂຶ້ນລົງຢ່າງບໍ່ຂາດສາຍ. ອີກປະການໜຶ່ງ ເສັ້ນທາງ 13 ເໜືອນັບແຕ່ນະຄອນຫລວງວຽງຈັນຂຶ້ນເມືອ ໂດຍສະເພາະແມ່ນນັບແຕ່ພູພະນັງຂຶ້ນເມືອ ເຫັນວ່າເສັ້ນທາງມັນຄົດໂຂໂງງ້ຽວຂຶ້ນພູລົງຫ້ວຍມີຄວາມສ່ຽງຕໍ່ການໄປມາເປັນຢ່າງຍິ່ງ. ເມື່ອເປັນຄືສະພາບທີ່ວ່ານີ້ ຈຶ່ງເຮັດໃຫ້ມີການສິ້ນເປືອງທັງເວລາ ແລະ ທັງພາຫະນະ. ເພາະສະນັ້ນ ຈຶ່ງເຫັນວ່າລະຫວ່າງການເດີນທາງສາຍດ່ວນກັບການເດີນທາງສາຍເກົ່າມັນກິນເວລາ ແລະ ຫລຸດລື່ນກັນເປັນຫລາຍຊົ່ວໂມງ.
ໄປຄຽງຄູ່ກັນນັ້ນ, ນັບແຕ່ມີການເປີດສາຍທາງດ່ວນເປັນຕົ້ນມາ ສິ່ງທີ່ກະທົບຕາມມາກໍຄືການບໍລິການຄ້າຂາຍຕາມຮ້ານອາຫານ, ຮ້ານກິນດື່ມ, ຮ້ານຂາຍເຄື່ອງຍ່ອຍ, ຮ້ານຂາຍຢາ, ຂາຍໝາກໄມ້ ແລະ ຂາຍຜັກສົດຂອງຊາວຄ້າຂາຍ ແລະ ປະຊາຊົນຕາມແຄມທາງຕ່າງກໍພາກັນເຈັ້ງ ພ້ອມທັງພາກັນຈົ່ມວ່ານັບແຕ່ເປີດສາຍທາງດ່ວນວຽງຈັນ-ວັງວຽງມານີ້ບໍ່ຄ່ອຍມີລົດລາງພາຫະນະຂອງແຂກຄົນກາຍໄປມາທ່ອງທ່ຽວຄືດັ່ງແຕ່ກ່ອນມາຜ່ານ, ຍິ່ງກວ່ານັ້ນ ການບໍລິການຄ້າຂາຍຕາມຮ້ານເກືອບທຸກບ່ອນແມ່ນມີບັນຫາຍ້ອນບໍ່ມີນັກທ່ອງທ່ຽວເຂົ້າໃຊ້ບໍລິການ.
ເຈົ້າຂອງຮ້ານຂາຍເຝີຄົນໜຶ່ງທີ່ຕັ້ງຢູ່ແຄມທາງບ້ານວັງຄີ ໄດ້ລະບາຍຄວາມຮູ້ສຶກຂອງຕົນອອກມາວ່າ: ແຕ່ລະມື້ບໍ່ໄດ້ຂາຍເຝີພໍຫ້າຖ້ວຍ, ຖ້າເປັນແບບນີ້ອີກຕໍ່ໄປ ສົງໄສຈະໄດ້ປິດຮ້ານ. ແມ່ປ້າໜຶ່ງທີ່ຮ້ານຂາຍຜະລິດຕະພັນປາຢູ່ບ້ານຫ້ວຍໝໍ້ ກໍໄດ້ຈົ່ມສູ່ຟັງວ່າ: ນັບແຕ່ເສັ້ນທາງດ່ວນເປີດມານີ້ ບໍ່ຄ່ອຍເຫັນລົດເຫັນແຂກຄົນມາແວ່ຊື້ຜະລິດຕະພັນປາຢູ່ຕາມຮ້ານພໍພີລຶກ, ມີກໍມີໜ້ອຍທີ່ສຸດ ແຕ່ລະມື້ຂາຍປາແຫ້ງ, ສົ້ມປາບໍ່ພໍຮອດ 10 ຖົງ. ເມື່ອຕົກເປັນສະພາບເຊັ່ນນີ້ ກໍຈຳເປັນຕ້ອງຈົບລົງກັບຄວາມຫວັງ ແລະ ການຫລຸບທຶນຮອນທີ່ທ້ອນໂຮມມາໄດ້ຫລາຍປີ. ນີ້ຄືສ່ວນໜຶ່ງຂອງສຽງຈົ່ມແມ່ຄ້າຕາມຮ້ານແຄມທາງຍ່ານນະຄອນຫລວງວຽງຈັນຫາວັງວຽງຕາມທີ່ທິດກໍ່າໄດ້ໄປສຳຜັດ.
ແຕ່ເຖິງຢ່າງໃດກໍດີ, ເທົ່າທີ່ຄິດໃນອະນາຄົດ ຄວາມຫວັງມັນກໍພໍມີຢູ່ ເຊັ່ນວ່າປັດຈຸບັນເສັ້ນທາງແຕ່ສີເກີດຫາໂພນໂຮງພວມມີການກໍ່ສ້າງເປັນທາງສີ່ເລນປູດ້ວຍຄອນກຣີດທີ່ແໜ້ນໜາສວຍງາມ ຄາດວ່າອີກສອງສາມປີຈະສຳເລັດ. ສ່ວນວ່າຍ່ານໂພນໂຮງຫາວັງວຽງນັ້ນ ທາງຂະແໜງການກ່ຽວຂ້ອງກໍບໍ່ໄດ້ລົດລະ ໄດ້ສືບຕໍ່ສ້ອມແປງ ຫລື ຂະຫຍາຍເສັ້ນທາງໃຫ້ກວ້າງຂວາງໃຫ້ໄປມາສະດວກຫລາຍຂຶ້ນ. ນີ້ຄືທາງເລືອກຂອງນັກທ່ອງທ່ຽວ ແລະ ຜູ້ໃຊ້ລົດໃຊ້ຖະໜົນຈາກວຽງຈັນຫາວັງວຽງ. ຕາມທິດກໍ່າຄິດ ການໄປທ່ຽວເມືອງວັງວຽງໃຫ້ກຸ້ມຄ່ານັ້ນ, ຂາໄປແມ່ນຕາມສາຍທາງດ່ວນ, ຂາກັບອາດຕາມສາຍທາງ 13 ເໜືອ ເພື່ອຊົມທຳມະຊາດຄວາມສວຍງາມຂອງສາຍທາງຍ່ານນີ້. ໄປພ້ອມກັນນັ້ນ ກໍມີໂອກາດໄດ້ຈັບຈ່າຍຊື້ສິ່ງຂອງແນວຢູ່ແນວກິນຕາມຮ້ານແຄມທາງເຊັ່ນ: ຊື້ສົ້ມປາກັບປາແຫ້ງ ຫລື ປາສົດຈາກອ່າງນ້ຳງື່ມຢູ່ບ້ານຫ້ວຍໝໍ້, ຈາກນັ້ນກໍເລາະຊື້ຜັກກະເດົາ, ໜໍ່ໄມ້ສົດ, ປາດຸກ, ປາຄໍ່າ, ໂຕ່ອ່ຽນທີ່ໄດ້ຈາກທຳມະຊາດມາບໍລິໂພກຢູ່ວຽງຈັນ.
ແຕ່ຢາກໄດ້ຕາມຈຸດປະສົງ ແລະ ເປັນການແກ້ໄຂຕໍ່ຜູ້ທີ່ຖືກຜົນກະທົບ ທັງສ້າງເງື່ອນໄຂໃຫ້ຄົນມີທາງເລືອກໃນການໄປມາ, ມີການຊື້ການຂາຍຄຶກຄັກ ລັດ ຫລື ພາກສ່ວນກ່ຽວຂ້ອງຕ້ອງຂຸ້ນຂ້ຽວປັບປຸງເສັ້ນທາງໂດຍໄວ. ຖ້າບໍ່ດັ່ງນັ້ນ ຈະກະທົບບໍ່ໜ້ອຍຕໍ່ຊີວິດການເປັນຢູ່ຂອງຜູ້ປະກອບການໃນຍ່ານນີ້. ນອກຈາກນັ້ນ ກໍຈະກະທົບໄປເຖິງການເກັບພັນທະອາກອນຕ່າງໆຈາກຮ້ານຕາມທີ່ວ່າມານີ້ ມັນຈະອືດປານດຶງຂາເຕົ່າ ແລະ ມີຜົນກະທົບໄປຮອດລາຍຮັບຂອງທ້ອງຖິ່ນ ແລະ ສູນກາງ.
