ປຊຊ ຜູ້ສະໜັບສະໜູນ ທຣຳ ຫຼັ່ງໄຫຼ ເຂົ້າໃນ ນະຄອນຫຼວງ ວໍຊິງຕັນ ດີຊີ ກ່ອນໜຶ່ງວັນ ກ່ອນທີ່ຈະມີການປະຊຸມສະພາໃນວັນທີ 6 ມັງກອນນີ້
ສຳນັກຂ່າວ The Hill ລາຍງານ ເມື່ອວັນທີ 6 ມັງກອນນີ້ວ່າ ປະທານາທິບໍດີ ໂດນັລທຣຳ ໄດ້ຮຽກຮ້ອງໃຫ້ຜູ້ສະໜັບສະໜູນຕົນເອງ ເຂົ້າມາເຕົ້າລວມກັນຢູ່ທີ່ນະຄອນຫຼວງ ວໍຊິງຕັນ ດີຊີ ເພື່ອປະທ້ວງການປະກາດໄຊຊະນະໃຫ້ກັບ ໄບເດັນ ຂອງສະພາ ໃນວັນທີ 6 ມັງກອນນີ້.
ໃນເບື້ອງຕົ້ນຄາດວ່າການປະທ້ວງຈະມີຂຶ້ນໃນຕອນເຊົ້າຂອງວັນທີ 6 ມັງກອນນີ້ ແຕ່ພາບໃນຄິບ ວີດີໂອ ໃຫ້ເຫັນວ່າ ພວກສະໜັບສະໜູນ ໄດ້ຫຼັ່ງໄຫຼ ເຂົ້າມາໃນ ວໍຊິງຕັນ ແຕ່ວັນທີ 5 ມັງກອນ ແລະ ໄດ້ຈັດຕັ້ງການປະທ້ວງເປັນກຸ່ມ ຍ່ອຍໆ ຢູ່ໃນນະຄອນຫຼວງຂອງສະຫະລັດ ເຊັ່ນຢູ່ໃນສວນສາທາລະນະ Ellipse ຫຼື ສະໜາມຫຼວງ Freedom Plaza.
ຄາດວ່າ ປະທານາທິບໍດີ ທຣຳ ຈະປະກົດຕົວໃນເວລາ 11 ໂມງເຊົ້າຂອງວັນທີ 6 ມັງກອນນີ້. ເຈົ້າໜ້າທີ່ຕຳຫຼວດກຽມພ້ອມຮັບມືກັບການປະເຊີນໜ້າລະຫວ່າງສອງຝ່າຍ ຜູ້ສະໜັບສະໜູນ ທຣຳ ແລະ ຜູ້ຄັດຄ້ານ. ເຈົ້າຄອງນະຄອນຫຼວງ ວໍຊິງຕັນ ໄດ້ລະດົມກຳລັງປ້ອງກັນຄວາມສະຫງົບ ຕຽມພ້ອມຮັບມືບັນຫາທີ່ຈະເກີດຂຶ້ນ ໂດຍສະເພາະເມື່ອເກີດເຫດການຈາລະຈົນ.
ເຖິງຂະນະນີ້ ຍັງບໍ່ທັນມີຄວາມວຸ້ນວາຍໃດໆ ເກີດຂຶ້ນ, ຊຶ່ງກ່ອນໜ້ານີ້ຄືວັນທີ 3 ຜ່ານມາ ເຈົ້າຄອງນະຄອນ ວໍຊິງຕັນ ໄດ້ຮຽກຮ້ອງໃຫ້ປະຊາຊົນຫຼີກລ່ຽງການປະເຊີນໜ້າກັນ.
