ແຫຼ່ງທ່ອງທ່ຽວລະດັບຊາດ, ລະດັບໂລກ…. ວັງວຽງ ຍັງມີຫຼາຍບັນຫາຕ້ອງເບິ່ງຄືນ

ໂດຍ: ລູກເມືອງພວນ

ວັງວຽງເປັນໜຶ່ງໃນ 11 ເມືອງຂອງແຂວງວຽງຈັນ, ຢູ່ຫ່າງຈາກເທດສະບານແຂວງ ອອກໄປປະມານ 70-80 ກມ ທາງທິດຕາເວັນອອກສ່ຽງເໜືອ. ວັງວຽງຂຶ້ນຊື່ລືຊາວ່າເປັນແຫຼ່ງທ່ອງທ່ຽວທີ່ສວຍສົດງົດງາມທີ່ສຸດຂອງເມືອງລາວ ແລະ ຂອງຊາວຕ່າງປະເທດ ເພາະເມືອງວັງວຽງເປັນເມືອງນ້ອຍໆ ແຫ່ງໜຶ່ງ ຕັ້ງເລາະລຽບຕາມລຳແມ່ນໍ້າຊອງ ທີ່ສົດໃສໄຫຼເຢັນລຽບຕາມຕີນຜາ ທີ່ຕັ້ງສະຫງ່າ. ເມືອງວັງວຽງ ຖືກອ້ອມຮອບໄປດ້ວຍພູຜາປ່າດົງທັງ 4 ດ້ານ, ອາກາດສົດຊື່ນແຈ່ມໃສ, ທຳມະຊາດຍັງຄົງໄວ້ສະພາບເດີມເປັນສ່ວນໃຫ່ຍ, ເມືອງວັງວຽງ ມີແຫຼ່ງທ່ອງທ່ຽງຫຼາຍແຫ່ງທີ່ມີຊື່ສຽງເຊັ່ນ: ຖໍ້າລົມ, ຖາໍ້ຈັງ, ຖໍ້າປູຄຳ… ແລະ ມີຫຼາຍກິດຈະກຳທ່ອງທ່ຽວເຊັ່ນ: ລ່ອງເຮືອຕາມລຳແມ່ນໍ້າຊອງ, ທ່ຽວປ່າ, ປີນພູ, ໂດດສະລິງ…

ວັງວຽງ ຍັງເປັນປະຕູຜ່ານລະຫວ່າງ ນະຄອນຫຼວງວຽງຈັນ ກັບເມືອງມໍລະດົກໂລກ ຫຼວງພະບາງ ຊຶ່ງເປັນສະຖານທີ່ພັກຜ່ອນຢ່ອນໃຈເຄິ່ງທາງທີ່ເໝາະສົມທີ່ສຸດ ຂອງຜູ້ຄົນເດີນທາງຈາກນະຄອນຫຼວງ ໄປເມືອງມໍລະດົກໂລກຫຼວງພະບາງ ຫຼື ຈາກເມືອງມໍລະດົກໂລກ ເຂົ້າມາໃນນະຄອນຫຼວງວຽງຈັນ.

ຊາວວັງວຽງ ເປັນຄົນທີ່ມີນໍ້າໃຈເອື້ອເຟື້ອເພື່ອແຜ່, ມີຮີດຄອງປະເພນີທີ່ເປັນເອກະລັກຂອງຕົນ, ມີມະນຸດສຳພັນທີ່ດີກັບຄົນຕ່າງບ້ານ ທ້າວຕ່າງແດນ. ນອກຈາກນີ້, ເມືອງວັງວຽງຍັງຂຶ້ນຊື່ລືຊາວ່າເປັນເມືອງທີ່ອຸດົມສົມບູນໄປດ້ວຍຊັບໃນດິນ ສິນໃນນໍ້າ, ພູຜາປ່າດົງທີ່ສວຍສົດງົດງາມ, ມີຕໍານານດ້ານອາຫານການກິນທີ່ລືຊື່ເຊັ່ນ: ຈຸບປັກ, ລາບເທົາ, ແຈ່ວໝາກແຂ່ນ, ເອາະປາບູ່, ປາປີ້ງທົບ…

ເຖິງຢ່າງໃດກໍຕາມ, ດຽວນີ້ເສັ້ນທາງດ່ວນແຕ່ນະຄອນຫຼວງວຽງຈັນໄປຫາວັງວຽງກໍສຳເລັດເປັນທີ່ຮຽບຮ້ອຍແລ້ວ, ຜູ້ຄົນຈາກສາລະທິດຫຼັ່ງໄຫຼໄປຫຼີ້ນ ເມືອງວັງວຽງ ມື້ໜຶ່ງຕັ້ງຫຼາຍພັນຄົນ. ວັນພັກຜ່ອນເຮັດໃຫ້ເມືອງວັງວຽງແອອັດໄປດ້ວຍນັກທ່ອງທ່ຽວທັງຊາວລາວ ແລະ ຊາວຕ່າງປະເທດ.

ເມື່ອຂຶ້ນຊື່ລືຊາວ່າເປັນເມືອງທ່ອງທ່ຽວທີ່ສວຍງາມຂອງປະເທດລາວ ແລະ ຂອງຊາວໂລກແລ້ວ, ກໍຢາກໃຫ້ສົມເນື້ອສົມຕ່ອນ, ສົມຊື່ສົມສຽງຮຽງນາມທີ່ດັງກ້ອງ ບໍ່ແມ່ນໄດ້ແຕ່ຍ້ອງ ແຕ່ຍໍ ໃນຕົວຈິງແລ້ວ ເມືອງວັງວຽງຍັງມີຫຼາຍສິ່ງຫຼາຍຢ່າງທີ່ຈະຕ້ອງໄດ້ເບິ່ງຄືນໃໝ່. ກ່ອນອື່ນໝົດແມ່ນຖະໜົນຫົນທາງທີ່ເຂົ້າໄປຫາແຫຼ່ງທ່ອງທ່ຽວແຕ່ລະຈຸດຄວນຈະລົງທຶນເຮັດທາງຢາງໃຫ້ຈົບງາມ, ສະດວກສະບາຍ ທັງເປັນການດຶງດູດໃຫ້ຜູ້ຄົນຢາກໄປທ່ອງທ່ຽວຫຼາຍຂຶ້ນ ເພາະເສັ້ນທາງເຂົ້າໄປຫາຈູດທ່ອງທ່ຽວແຕ່ລະບ່ອນແມ່ນເຕັມໄປດ້ວຍແຕ່ຂີ້ຝຸ່ນ ຂີ້ໄງ, ສອງຟາກທາງເຕັມໄປດ້ວຍປ່າຫຍ້າຮົກເຮື້ອ ແລະ ເສດເຫຼືອຂີ້ເຫຍື້ອຖິ້ມຊະຊາຍ, ສອງຝັ່ງແມ່ນໍ້າຊອງທີ່ສວຍສົດງົດງາມໃນເມື່ອກ່ອນ ກໍຖືກດັດແປງ ຫຼື ຖືກມ້າງທຳລາຍໄປ ຢ່າງເປັນໜ້າວິຕົກ, ຄວາມງາມແບບທຳມະຊາດດັ້ງເດີມ ຖືກສູນຫາຍໄປ, ການຖິ້ມເສດຂີ້ເຫຍື້ອ, ເສດເຫຼືອອາຫານລົງໃນນໍ້າຊອງຍັງໃຫ້ເຫັນເປັນປະຈຳ ຊຶ່ງຈະນຳມາສິ່ງເນົ່າເສຍໃຫ້ແມ່ນໍ້າຊອງບໍ່ໄວກໍຊ້າ, ໂດຍສະເພາະແມ່ນຫ້າງຮ້ານອາຫານທີ່ຕັ້ງຢັ່ງຢາຍຕາມແຄມຝັ່ງ ຫຼື ປຸກຂຶ້ນຢູ່ລຽບຕາມແຄມນໍ້າຊອງ ຍັງເຫັນຜູ້ໄປບໍລິການຖິ້ມເສດຂີ້ເຫຍື້ອ ແລະ ເສດ ອາຫານລົງໃນແມ່ນໍ້າຊອງເປັນປະຈຳ ແລະ ອີກຢ່າງໜຶ່ງ ລາຄາອາຫານການດື່ມກໍເຫັນວ່າສູງເກີນໄປ…ຖ້າຖະໜົນຫົນທາງຍັງເຕັມໄປດ້ວຍແຕ່ຂີ້ຝຸ່ນ ຂີ້ໄງ, ທຳມະຊາດຖືກທຳລາຍ, ຄວາມເປິະເປື້ອນເຂົ້າມາແທນທີ່, ອາຫານການກິນແພງຂຶ້ນນັບມື້…ບໍ່ໄວກໍຊ້າ ເມືອງວັງວຽງຈະເປັນເມືອງຮ້າງແນ່ນອນ.

ນອກຈາກນັ້ນ ເມືອງວັງວຽງກຳລັງຈະກາຍເປັນເມືອງອຸດສາຫະກຳເຂົ້າມາທຸກທີ. ຂະນະນີ້ກໍມີໂຮງງານຊີມັງ 3 ແຫ່ງ ຊຶ່ງແຕ່ລະແຫ່ງໄດ້ປ່ອຍ ອາຍກາກບອນນິກອອກສູ່ອາກາດຫຼາຍໂຕນຕໍ່ວັນ ອັນໄດ້ສ້າງໃຫ້ເກີດມົນລະພິດທາງອາກາດ ຕໍ່ກັບເມືອງວັງວຽງ. ທັງໝົດທັງປວງເຫຼົ່ານີ້ ຄ່ອຍໆ ຄືບຄານເຂົ້າມາທຳລາຍເມືອງທ່ອງທ່ຽວໂດຍບໍ່ຮູ້ສຶກຕົວ.

ຖ້າຫາກຍັງຈະຮັກສາໃຫ້ເມືອງວັງວຽງ ເປັນເມືອງທ່ອງທ່ຽວຕະຫຼອກການ ກໍຄວນເບິ່ງຄືນດ້ານຕ່າງໆ ທີ່ກ່າວມາ ແລະ ພັດທະນາຕົວເມືອງວັງວຽງໃຫ້ຈົບງາມກວ່ານີ້ ຈຶ່ງຈະເປັນສິ່ງທີ່ດູດດຶງຄົນມາທ່ອງທ່ຽວໄດ້ຫຼາຍຂຶ້ນ. ສົມຄວນແລ້ວທີ່ພາກລັດ ແລະ ເອກຊົນຜູ້ປະກອບການທ່ອງທ່ຽວຂອງເມືອງວັງວຽງຈະພ້ອມກັນຫັນໜ້າມາພັດທະນາເມືອງວັງວຽງໃຫ້ເປັນໜ້າທ່ຽວໜ້າຊົມກວ່ານີ້.