ຢູນິແຊັບຕອບສະຫນອງໂທລະໂຄ່ງ 50 ຊຸດ ໃຫ້ແມ່ຍິງທ້ອງຖິ່ນ ສ້າງຄວາມເຂັ້ມແຂງໃນການຕອບໂຕ້ໂຄວິດ-19
ໃນວັນທີ 4 ມັງກອນນີ້, ອົງການອຸຍນິເຊບປະຈຳ ສປປ ລາວ ໄດ້ມອບລະບົບໂທລະໂຄ່ງຊຸມຊົນ ຈໍານວນ 50 ຊຸດ ໃຫ້ແກ່ສະຫະພັນແມ່ຍິງ 50 ບ້ານໃນແຂວງສະຫວັນນະເຂດ, ສາລະວັນ, ເຊກອງ ແລະ ເມືອງສັງທອງ ນະຄອນຫລວງວຽງຈັນ ເພື່ອນໍາໃຊ້ເຂົ້າໃນການໂຄສະນາໃຫ້ຄວາມຮູ້ແກ່ຊຸມຊົນ ກ່ຽວກັບການຕອບໂຕ້ພະຍາດໂຄວິດ-19 ແລະ ມາດຕະການຄວາມປອດໄພບັດຕ່າງໆ ແນໃສ່ປົກປ້ອງແມ່ຍິງ ແລະ ເດັກໃຫ້ເຂັ້ມແຂງຍິ່ງຂຶ້ນ ແລະ ທັງເປັນການສົ່ງເສີມສິດທິຂອງເຂົາເຈົ້າຢູ່ໃນຂັ້ນບ້ານ ໂດຍບັນດາເອື້ອຍນ້ອງແມ່ຍິງດັ່ງກ່າວນັ້ນຈະໄດ້ຮັບການຝຶກອົບຮົມກ່ຽວກັບການນຳໃຊ້ອຸປະກອນດັ່ງກ່າວໃຫ້ດີທີ່ສຸດ.
ທ່ານຮອງປະທານສູນກາງສະຫະພັນແມ່ຍິງລາວ ກ່າວວ່າ: ພວກເຮົາສາມາດຄວບຄຸມການແຜ່ລະບາດຂອງພະຍາດໂຄວິດ-19 ມາຮອດທຸກມື້ນີ້ໄດ້ ກໍຍ້ອນໄດ້ຮັບການສະໜັບສະໜູນຈາກບັນດາຄູ່ຮ່ວມງານຂອງພວກເຮົາ, ແຕ່ການສືບຕໍ່ຮັດແໜ້ນບັນດາມາດຕະການ ເພື່ອກຽມພ້ອມຕໍ່ສູ້ກັບພະຍາດດັ່ງກ່າວແມ່ນມີຄວາມຈໍາເປັນຫລາຍທີ່ສູດ. ດັ່ງນັ້ນ ພວກເຮົາຕ້ອງສືບຕໍ່ເຜີຍແຜ່ຄວາມຮູ້ໃຫ້ປະຊາຊົນໄດ້ເຂົ້າໃຈກ່ຽວກັບມາດຕະການປ້ອງກັນຕ່າງໆ ເພື່ອເຂົາເຈົ້າຈະສາມາດຮັກສາຕົນເອງໃຫ້ປອດໄພໃນກໍລະນີທີ່ເກີດການແຜ່ລະບາດອີກຮອບໃໝ່ ໂດຍສະເພາະແມ່ນແມ່ຍິງ ແລະ ເດັກທີ່ມີຄວາມສ່ຽງຫລາຍທີ່ສຸດ.
ໃນໂອກາດນີ້, ຜູ້ຕາງໜ້າອົງການອຸຍນິເຊບປະຈໍາລາວ ກໍມີຄຳເຫັນວ່າ: ການເຜີຍແຜ່ຂໍ້ມູນຂ່າວສານທີ່ບໍ່ຖືກຕ້ອງໃນໄລຍະການລະບາດຂອງພະຍາດໂຄວິດ-19 ໄດ້ກາຍເປັນອຸປະສັກທີ່ໃຫຍ່ຫລວງ ໂດຍສະເພາະການສົ່ງເສີມການລ້າງມືດ້ວຍສະບູ, ການນຳໃຊ້ຜ້າອັດປາກ-ດັງ ແລະ ການຮັກສາໄລຍະຫ່າງ, ແຕ່ດ້ວຍຄວາມພະຍາຍາມພວກເຮົາກໍມີຜົນສຳເລັດໃນເບື້ອງຕົ້ນແລ້ວໃນການຕໍ່ຕ້ານກັບການລະບາດຂອງພະຍາດດັ່ງກ່າວ.
ອົງການອຸຍນິເຊບ ໄດ້ໃຫ້ຄໍາໝັ້ນສັນຍາຢ່າງໜັກແໜ້ນໃນການເສີມສ້າງຄວາມເຂັ້ມແຂງ ເຮັດວຽກຮ່ວມກັບລັດຖະບານລາວ ເພື່ອແກ້ໄຂຜົນກະທົບທີ່ເກີດຈາກການແຜ່ລະບາດຂອງພະຍາດໂຄວິດ-19 ແລະ ໃຫ້ການສະໜັບສະໜູນການຕອບໂຕ້ຕໍ່ການລະບາດຂອງພະຍາດດັ່ງກ່າວຢູ່ ສປປ ລາວຢ່າງມີປະສິດທິຜົນຕະຫລອດມາ.
