ຫວຽດນາມພົບຜູ້ຕິດເຊື້ອໂຄວິດ-19 ຊະນິດກາຍພັນ ທີ່ພົບຢູ່ອັງກິດ ຄົນທຳອິດໃນປະເທດ
ວັນທີ 3 ມັງກອນ 2021, ກະຊວງສາທາລະນະສຸກຫວຽດນາມ ຢືນຢັນການກວດພົບຜູ້ຕິດເຊື້ອໂຄວິດ-19 ຊະນິດກາຍພັນທີ່ພົບຢູ່ອັງກິດ ເປັນຄົນທຳອິດຂອງປະເທດ.
ກະຊວງສາທາລະນະສຸກຫວຽດນາມ ລະບຸວ່າ: ຜູ້ຕິດເຊື້ອຄົນດັ່ງກ່າວເປັນຜູ້ຍິງຊາວຫວຽດນາມອາຍຸ 45 ປີ ເຊິ່ງເດີນທາງຈາກອັງກິດມາຮອດຫວຽດນາມ ເມື່ອວັນທີ 22 ທັນວາ 2020 ແລະ ເຂົ້າຮັບການກັກຕົວທັນທີທີ່ເດີນທາງມາເຖິງ.
ກະຊວງສາທາລະນະສຸກຫວຽດນາມ ກ່າວອີກວ່າ: ຜູ້ຍິງຄົນດັ່ງກ່າວເລີ່ມຮູ້ສຶກບໍ່ສະບາຍພຽງບໍ່ເທົ່າໃດວັນຫລັງເດີນທາງມາຮອດຫວຽດນາມ ກ່ອນຈະກວດພົບວ່າມີຜົນກວດພະຍາດໂຄວິດ-19 ເປັນບວກ ເມື່ອວັນທີ 24 ທັນວາ 2020 ແລະ ໄດ້ຮັບການຢືນຢັນວ່າເປັນພະຍາດໂຄວິດ-19 ຊະນິດກາຍພັນໃນເວລາຕໍ່ມາ ໂດຍປັດຈຸບັນນາງຢູ່ລະຫວ່າງການປິ່ນປົວໃນແຂວງຈ່າວິນ ທາງຕອນໃຕ້ຂອງປະເທດ.
ສ່ວນຄະນະກຳມະການປ້ອງກັນ ແລະ ຄວບຄຸມພະຍາດໂຄວິດ-19 ແຫ່ງຊາດຫວຽດນາມ ໄດ້ຮຽກຮ້ອງໃຫ້ໜ່ວຍງານທີ່ກ່ຽວຂ້ອງດຳເນີນການກວດຕົວຢ່າງຂອງຜູ້ຕິດເຊື້ອໂຄວິດ-19 ຄົນອື່ນໆ ທີ່ຫາກໍໄດ້ຮັບການຢືນຢັນຜົນຢ່າງຮີບດ່ວນ ເພື່ອລະບຸວ່າມີຜູ້ຕິດເຊື້ອໂຄວິດ-19 ຊະນິດກາຍພັນໃນປະເທດອີກ ຫລື ບໍ່.
ທັງນີ້, ຫວຽດນາມລາຍງານການກວດພົບຜູ້ຕິດເຊື້ອໂຄວິດ-19 ທັງໝົດ 1.474 ຄົນ ເຊິ່ງລວມທັງຜູ້ເສຍຊີວິດ 35 ຄົນ ເມື່ອນັບຮອດເຊົ້າວັນທີ 2 ມັງກອນຜ່ານມາ.
