ນຳສະເຫນີປື້ມກ່ຽວກັບເອກອັກຄະລັດຖະທູດຫວຽດນາມປະຈຳລາວຜູ້ທຳອິດທ່ານ ເລວັນຫຽນ

ເຊົ້າວັນທີ 30 ທັນວານີ້, ຫໍພິພິທະພັນໄກສອນພົມວິຫານ, ໄດ້ຈັດພິທີຖະແຫຼງຂ່າວເພື່ອນຳສະເຫນີປື້ມກ່ຽວກັບ ທ່ານ ເລວັນຫຽນ ເອກອັກຄະລັດຖະທູດຫວຽດນາມປະຈຳລາວຜູ້ທຳອິດ, ຂຶ້ນທີນະຄອນຫລວງວຽງຈັນ.

ປຶ້ມດັ່ງກ່າວໄດ້ບັນທຶກໄປດ້ວຍຫຼາຍເອກະສານທີ່ສຳຄັນ ແລະ ລ້ຳຄ່າໄດ້ເປີດເຜີຍເປັນຄັ້ງທຳອິດ, ເພື່ອຊ່ວຍໃຫ້ປະຊາຊົນລາວໄດ້ຮັບຮູ້ ແລະ ເຂົ້າໃຈຕໍ່ການປະກອບສ່ວນອັນສຳຄັນ ຂອງທ່ານເອກອັກຄະລັດຖະທູດຜູ້ທຳອິດຂອງຫວຽດນາມປະຈຳລາວ. ປື້ມສຳຄັນນີ້ມີທັງໝົດ 132 ໜ້າ ໄດ້ບັນທຶກບາງສ່ວນສຳລັບການເຄື່ອນໄຫວການທູດຂອງທ່ານເລວັນຫຽນໃນໄລຍະ 15 ປີ (1962-1976) ເປັນເອກອັກຄະລັດຖະທູດຜູ້ທຳອິດຂອງສາທາລະນະລັດປະຊາທິປະໄຕຫວຽດນາມ, ປະຈຸບັນແມ່ນສາທາລະນະລັດສັງຄົມນິຍົມຫວຽດນາມປະຈຳລາວ, ໂດຍສະເພາະແມ່ນເອກະສານອັນສຳຄັນທີ່ໄດ້ ບັນທຶກສ່ວນຕົວຂອງທ່ານເອກອັກຄະລັດຖະທູດ ເລວັນຫຽນກ່ຽວກັບເຫດການທີ່ເກີດຂື້ນໃນໄລຍະ 15 ປີທີ່ເປັນເອກອັກຄະລັດຖະທູດຫວຽດນາມປະຈຳລາວ, ເຊິ່ງບໍ່ໄດ້ເຜີຍແຜ່ຢ່າງກວ້າງຂວາງມາກ່ອນ.

ປື້ມດັ່ງກ່າວຍັງໄດ້ບັນທຶກການປະເມີນຜົນເຫດການແລະ ຄຳຄິດເຫັນຂອງບັນດາອະດີດຜູ້ນຳຂັ້ນສູງຂອງລາວກ່ຽວກັບທ່ານເລວັນຫຽນ, ໂດຍສະເພາະແມ່ນການປະກອບສ່ວນຂອງທ່ານເຂົ້າໃນການປະຕິວັດລາວກໍ່ຄືຄວາມ ສຳພັນພິເສດລະຫວ່າງ ສອງປະເທດລາວແລະຫວຽດນາມໃນໄລຍະນັ້ນ.

ໃນພິທີຖະແຫຼງຂ່າວ, ທ່ານ ດຣ ສິງທອງ ສິງຫາປັນຍາ ອະດີດຜູ້ອຳ ນວຍການຫໍພິພິທະພັນໄກສອນພົມວິຫານຜູ້ຂຽນປື້ມດັ່ງກ່າວໃຫ້ຮູ້ວ່າ: ປະທານໂຮ່ຈີມິນໄດ້ຕົກລົງແຕ່ງຕັ້ງ ທ່ານ ເລວັນຫຽນ ນັກປະຕິວັດອາວຸໂສຂອງການປະຕິວັດຫວຽດນາມມາເປັນ ເອກອັກຄະລັດຖະທູດ ຜູ້ມີອຳນາດເຕັມ ແຫ່ງສາທາລະນະລັດປະຊາທິປະໄຕຫວຽດນາມຜູ້ທຳອິດມາປະຈຳຣາຊະອານາຈັກລາວ ໃນໄລຍະສະພາບການເມືອງທີ່ສັບສົນຫຼາຍຢ່າງຢູ່ໃນລາວແລະພາກພື້ນໃນໄລຍະນັ້ນ, ອັນໄດ້ສະແດງໃຫ້ເຫັນເຖິງຄວາມສາມາດ ແລະ ຜົນງານຂອງທ່ານ ຕະຫຼອດເວລາ 15 ປີ ໃນຖານະເປັນເອກອັກຄະລັດຖະທູດດັ່ງກ່າວ, ຊຶ່ງໄດ້ພິສູດໃຫ້ເຫັນເຖິງຄວາມຖືກຕ້ອງຂອງ ການຕັດສິນໃຈນັ້ນ

ທ່ານ ສິງທອງ ສິງຫາປັນຍາ ກ່າວເນັ້ນວ່າ: “ພວກເຮົາພິມປື້ມນີ້ເພື່ອໃຫ້ປະຊາຊົນລາວເຂົ້າໃຈຫລາຍຂຶ້ນໃນແງ່ໜຶ່ງ ຂອງການຕໍ່ສູ້ປົດປ່ອຍຊາດ, ຊຶ່ງມີຫລາຍສິ່ງຫລາຍຢ່າງທີ່ພວກເຮົາບໍ່ສາມາດເຮັດໄດ້ດ້ວຍຕົນເອງ ແລະ ຕ້ອງມີການຊ່ວຍເຫຼືອ ຂອງເພື່ອນມິດ ແລະ ບັນດາປະເທດຕ່າງໆ, ພິເສດແມ່ນການຊ່ວຍເຫຼືອຂອງຫວຽດນາມ, ໄດ້ຊ່ວຍໃຫ້ ຂະບວນການປົດປ່ອຍຊາດຂອງພວກເຮົາໄດ້ຮັບໄຊຊະນະຢ່າງສົມບູນ. ພວກເຮົາກໍ່ຢາກປະກອຍສ່ວນຂໍ້ມູນທີ່ບໍ່ໄດ້ຖືກເຜີຍແຜ່ຢ່າງກວ້າງຂວາງນີ້ໃຫ້ຄົນຮຸ່ນຫຼັງສາມາດຄົ້ນຄິດ, ເຂົ້າໃຈແລະເຮັດໄດ້ດີກວ່າເກົ່າໃນການປົກປັກຮັກສາແລະສ້າງສາປະເທດຂອງພວກເຮົາ(ສປປລາວ ແລະ ສສ ຫວຽດນາມອ້າຍນອ້ງ) “.

ທ່ານ ສົມສະຫວາດ ເລັງສະຫວັດ ອະດີດກຳມະການກົມການເມືອງ, ອະດີດຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດລາວ ໄດ້ຂຽນໄວ້ໃນປຶ້ມດັ່ງກ່າວວ່າ: ສາມາດເວົ້າໄດ້ວ່າສະຫາຍເລວັນ ຫຽນໄດ້ປະກອບສ່ວນ ສຳຄັນເຂົ້າໃນການຮັດແໜ້ນ ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດແລະການຮ່ວມມືຮອບດ້ານລະຫວ່າງຫວຽດນາມແລະລາວ”.