ກາຕາກຽມເພີ່ມກຳລັງການຜະລິດ ແກັສທຳມະຊາດອີກ 30%
ກາຕາປະກາດເພີ່ມເພດານການຜະລິດແກັສທຳມະຊາດອີກ 30% ເປັນ 100 ລ້ານໂຕນຕໍ່ປີ ບໍ່ວ່າມາດຕະການກົດດັນທາງການທູດ ແລະ ເສດຖະກິດຈາກອາຣັບບີ ຊາອຸດິດ ຈະຍັງຢູ່ ຫລື ບໍ່ກໍຕາມ.
ສຳນັກຂ່າວຕ່າງປະເທດລາຍງານຈາກນະຄອນຫລວງໂດຮາ ປະເທດກາຕາ ໃນວັນທີ 5 ກໍລະກົດນີ້ວ່າ: ບໍລິສັດກາຕາ ປີໂຕຣລຽມ ລັດວິສາຫະກິດດ້ານພະລັງງານຂອງກາຕາ ອອກຖະແຫລງການໃນວັນທີ 4 ກໍລະກົດວ່າ: ທາງບໍລິສັດມີແຜນເພີ່ມກຳລັງການຜະລິດແກັສທຳມະຊາດອີກ 30% ຈາກ 77 ລ້ານໂຕນຕໍ່ປີ ເປັນ 100 ລ້ານໂຕນຕໍ່ປີ ພາຍໃນປີ 2024 ໂດຍອາດມີການລົງທຶນຮ່ວມກັບປະເທດຄູ່ຄ້າທີ່ຢູ່ນອກພາກພື້ນ.
ເຖິງຢ່າງໃດກໍຕາມ, ກາຕາສາມາດດຳເນີນການໄດ້ດ້ວຍຕົນເອງຖ້າຈຳເປັນ ບໍ່ວ່າຈົນເຖິງພາຍໃນໄລຍະເວລາດັ່ງກ່າວ ລັດຖະບານໂດຮາຈະຍັງຕ້ອງຜະເຊີນມາດຕະການປິດລ້ອມທາງການທູດ ແລະ ເສດຖະກິດຈາກອາຣັບບີ ຊາອຸດິດ ແລະ ພັນທະມິດ ຫລື ບໍ່ກໍຕາມ. ຂະນະທີ່ປັດຈຸບັນ ກາຕາຖືເປັນປະເທດຜູ້ສົ່ງອອກແກັສທຳມະຊາດເຫລວ (LNG) ລາຍໃຫຍ່ທີ່ສຸດຂອງໂລກ.
ໃນວັນດຽວກັນ, ທ່ານ ຊິກໂມຮຳເໝັດ ບິນ ອັບດຸນເລາະມານ ອັດ-ທານີ ລັດຖະມົນຕີກະຊວງການຕ່າງປະເທດກາຕາ ກ່າວວ່າ: ຄວາມຕ້ອງການ 13 ຂໍ້ທີ່ອາຣັບບີ ຊາອຸດິດ, ບາເຣນ, ສະຫະນະຄອນ ເອເມຣັດ ອາຣັບ (UAE) ແລະ ເອຢິບ ຕ້ອງການໃຫ້ລັດຖະບານໂດຮາປະຕິບັດຕາມນັ້ນເປັນໄປບໍ່ໄດ້, ພາຍຫລັງທ່ານ ຊິກໂມຮຳເໝັດ ຍື່ນໜັງສືແຈ້ງຢ່າງເປັນທາງການຕໍ່ລັດຖະບານກູເວດ ໃນວັນທີ 3 ກໍລະກົດ, ສ່ວນລັດຖະບານຣິຍາດ ແລະ ພັນທະມິດມີກຳນົດປະຊຸມກັນ ເພື່ອຫາລືກ່ຽວກັບສະຖານະການຄວາມຂັດແຍ່ງພາຍໃນກຸ່ມອ່າວອາຣັບ ທີ່ມີການຕັດການພົວພັນກັນແຕ່ວັນທີ 5 ມິຖຸນາຜ່ານມາ.
