ກວດເຫັນລາຍຮັບ-ລາຍຈ່າຍນອກແຜນເກືອບ 30 ຕື້ກີບ
ຫົວໜ້າພະແນກການເງິນນະຄອນຫລວງວຽງຈັນ ໄດ້ຂຶ້ນຊີ້ແຈງຕໍ່ຄຳເຫັນເຈາະຈີ້ມຂອງອົງການກວດສອບປະຈຳພາກກາງ ແລະ ບັນດາຜູ້ແທນສະມາຊິກສະພາແຫ່ງຊາດ ແລະ ສະພາປະຊາຊົນນະຄອນຫລວງວຽງຈັນຫລາຍບັນຫາຢູ່ໃນກອງປະຊຸມສະໄໝສາມັນ ເທື່ອທີ 10 ຂອງສະພາປະຊາຊົນນະຄອນຫລວງວຽງຈັນ ຊຸດທີ 1 ໃນວັນທີ 29 ທັນວານີ້ ໂດຍສະເພາະກ່ຽວກັບລາຍຮັບ-ລາຍຈ່າຍນອກແຜນທີ່ກວດເຫັນ 28,77 ຕື້ກີບ ໃນນີ້ແກ້ໄຂແລ້ວ 7 ຕື້ກວ່າກີບ, ຍັງຄ້າງ 21,75 ຕື້ກີບ ຊຶ່ງເປັນບ້ວງເງິນລາຍຮັບຄ່າບໍລິການຂອງຂະແໜງການອ້ອມຂ້າງ ເຊິ່ງມີຄວາມຈຳເປັນຈຶ່ງໄດ້ໃຊ້ຈ່າຍໄປກ່ອນແລ້ວຈະນຳສະເໜີຂຶ້ນແຜນໃນປີຕໍ່ໄປ. ພ້ອມໄດ້ຊີ້ແຈ້ງການຄິດໄລ່ອາກອນລາຍໄດ້, ການຄຸ້ມຄອງຊັບສິນທີ່ສານຕັດສິນຮິບມາເປັນຂອງລັດ ຊຶ່ງຍັງມີຄວາມຫຍຸ້ງຍາກໃນການຈັດຕັ້ງປະຕິບັດ. ຄະດີສ່ວນຫລາຍແກ່ຍາວມາຫລາຍປີ ເຮັດໃຫ້ຊັບສິນຢູ່ກະແຈກກະຈາຍ, ເປ່ເພຫລຸ້ຍຫ້ຽນ ເຮັດໃຫ້ບໍ່ມີຄວາມເປັນເອກະພາບໃນການປະຕິບັດ.
ສ່ວນຜົນການກວດສອບ ປີ 2019 ໂດຍສະເພາະໜີ້ຕ້ອງຮັບຂອງສ່ວຍສາອາກອນ 400 ຕື້ກວ່າກີບ ສາມາດທວງໄດ້ ແລະ ມອບເຂົ້າງົບປະມານແລ້ວ 54 ຕື້ກີບ ຍັງຄ້າງມາຮອດວັນທີ 31 ທັນວາ 2019 ຈຳນວນ 350,73 ຕື້ກີບ ແລະ ປີ 2020 ໄດ້ຄົ້ນຄວ້າກວດກາຄືນເຫັນຈຳນວນໜີ້ດັ່ງກ່າວມີໜີ້ເສຍ (ທຸລະກິດຢຸດເຊົາແລ້ວ) 4,94 ຕື້ກີບ ແລະ ເປັນໜີ້ທວງຍາກທີ່ມີອາຍຸເກີນ 10 ປີ 163 ຕື້ກີບ ລວມເປັນເງິນ 168 ຕື້ກີບ ແມ່ນກຳລັງສະເໜີໃຫ້ກະຊວງການເງິນພິຈາລະນາລຶບລ້າງ ຖ້າລຶບລ້າງໄດ້ຈະຍັງເຫລືອ 181 ຕື້ກີບ, ສ່ວນການຈ່າຍລ່ວງໜ້າໃນລະບົບຄັງເງິນແຫ່ງຊາດປະຈຳນະຄອນຫລວງວຽງຈັນ. ເວົ້າລວມແລ້ວ ຕົວເລກທີ່ອົງການກວດສອບໄດ້ລາຍງານນັ້ນບໍ່ແມ່ນຕົວເລກທີ່ຕົກເຮ່ຍເສຍຫາຍ ເປັນຕົວເລກທີ່ຜິດດ່ຽງທາງດ້ານການບັນຊີ ແລະ ການປະຕິບັດນິຕິກຳຈຳນວນໜຶ່ງ ຊຶ່ງຈຳນວນເງິນດັ່ງກ່າວ ຂະແໜງການເງິນໄດ້ປະສານສົມທົບກັບພາກສ່ວນກ່ຽວຂ້ອງ ເພື່ອຂຶ້ນແຜນ ແລະ ແກ້ໄຂໃນປີຕໍ່ໄປ ເພື່ອຈົດເອົາລາຍຮັບດັ່ງກ່າວເຂົ້າງົບປະມານໃຫ້ຄົບຖ້ວນ ແລະ ຖືກຕ້ອງຕາມກົດໝາຍ.
