ທາງດ່ວນວຽງຈັນ-ວັງວຽງສ້າງເງື່ອນໄຂໃຫ້ລາວທ່ຽວລາວ
ໂດຍ: ທິດກໍ່າ
ຕ້ອງຍອມຮັບວ່ານັບແຕ່ມີການເປີດນຳໃຊ້ສາຍທາງດ່ວນຈາກນະຄອນຫລວງວຽງຈັນຫາວັງວຽງ ນັບແຕ່ວັນທີ 20 ທັນວາເປັນຕົ້ນມາ ຖືວ່າຊາວນະຄອນຫລວງວຽງຈັນໄດ້ພາກັນແຫ່ໄປທ່ຽວເມືອງວັງວຽງໃນແຕ່ລະອາທິດຢ່າງຫລວງຫລາຍພາຍມາກ. ສະເພາະວັນເສົາ ແລະ ວັນອາທິດ ສະເລ່ຍແລ້ວມີພາຫະນະບໍ່ຕໍ່າກວ່າ 500 ຫາ 600 ຄັນ ໃນນີ້ກໍມີຊາວນະຄອນຫລວງວຽງຈັນ ນັບທັງຊາວແຂວງວຽງຈັນໄປທ່ອງທ່ຽວກິນລົມຊົມວິວຫລາຍຮ້ອຍຫລາຍພັນຄົນ. ອັນສາເຫດຕົ້ນຕໍມັນກໍບໍ່ອື່ນໄກ ຍ້ອນວ່າການໄປມາມັນສະດວກສະບາຍ ທັງວ່ອງໄວທັນໃຈ, ໄປຕອນເຊົ້າຕອນແລງກັບກໍໄດ້ ຫລື ບໍ່ກໍໄປວັນສຸກກັບວັນເສົາ ຫລື ວັນທິດກໍຖືວ່າເຕັມອີ່ມຢູ່ແລ້ວ. ປັດຈຸບັນ ຖ້າໄປຕາມສາຍທາງດ່ວນຈາກນະຄອນຫລວງວຽງຈັນຫາວັງວຽງກໍໃຊ້ເວລາພຽງຊົ່ວໂມງກວ່າໆ ຫລື ຖ້າຜູ້ຂັບລົດເຕັມສະຕິງກໍພຽງຊົ່ວໂມງດຽວກໍຮອດ. ໃນເມື່ອເປັນຄືສະພາບດັ່ງວ່ານີ້ ຈຶ່ງເປັນໂອກາດໃຫ້ຊາວນະຄອນຫລວງວຽງຈັນ ແລະ ຊາວແຂວງວຽງຈັນໃຜກໍຕ່າງນິຍົມຊົມຊອບໄປທ່ຽວເມືອງວັງວຽງຫລາຍຂຶ້ນ.
ໃນອາທິດຜ່ານມານີ້, ທິດກໍ່າ ໄດ້ມີໂອກາດສຳພາດກັບແມ່ປ້າຄົນໜຶ່ງທີ່ເພິ່ນໄດ້ໄປທ່ຽວວັງວຽງກັບລູກຫລານວ່າ: ເພິ່ນໄປຈາກນະຄອນຫລວງວຽງຈັນກັບລູກຫລານປະມານ 20 ກວ່າຄົນ, ມີລົດມານຳກັນ 5-6 ຄັນ, ມາແຕ່ມື້ວັນສຸກນອນ 2 ຄືນ ແລ້ວຈະກັບໃນວັນທິດມື້ນີ້. ຄືນນີ້ໄປເລາະຈອງໂຮງແຮມບ່ອນໃດກໍເຕັມ ຍ້ອນມີຫລາຍຄົນຫອບພຸ້ມຫອບພີ້ມີລູກ, ມີຫລານເປັນພຶງເປັນແພປານປາລູກຄອກ ແມ່ປ້າເວົ້າຢ້ຳທ້າຍດ້ວຍຄວາມເຮຮາມ່ວນຊື່ນ.
ໃນຕົວຈິງແລ້ວ, ເທົ່າທີ່ ທິດກໍ່າ ໄດ້ສຳຜັດເຫັນສະພາບບັນຍາກາດການໄປທ່ອງທ່ຽວຂອງຄົນລາວໃນວັນອາທິດ ທີ 27 ທັນວາຜ່ານມາ ເຫັນວ່າຄຶກຄັກພໍສົມຄວນ ໂດຍສະເພາະແມ່ນຄົນຢູ່ແຖວນະຄອນຫລວງວຽງຈັນ ແລະ ຄົນແຂວງວຽງຈັນເອງ ເພາະທຸກສິ່ງຢ່າງກໍຍ້ອນມີເສັ້ນທາງອຳນວຍຄວາມສະດວກໃນການໄປມາ, ໄປຕອນເຊົ້າກັບຕອນແລງ ຫລື ໄປນອນຄືນໜຶ່ງສອງຄືນໃນໂອກາດວັນເສົາວັນທິດ ເຊິ່ງເໝາະແກ່ການໄປພັກຜ່ອນປ່ຽນບັນຍາກາດກິນເຂົ້າແຄມຊອງ, ຂີ່ເຮືອກາຍັກ, ອາບນ້ຳຊອງທີ່ລ່ອງໄຫລໃສເຢັນໃນຍາມຄໍ່າແລງເກີນວ່າມີຄວາມສຸກສັນຫັນສາ.
ໃນເງື່ອນໄຂທີ່ປະເທດຊາດຂອງພວກເຮົາພວມໃຊ້ມາດຕະການຕ້ານໂຄວິດ-19 ນັກທ່ອງທ່ຽວຈາກພາຍນອກບໍ່ສາມາດເຂົ້າມາທ່ຽວລາວ ພວກເຮົາກໍສວຍໂອກາດເວລານີ້ເພື່ອສົ່ງເສີມລາວທ່ຽວລາວໃຫ້ແຂງແຮງຕາມນະໂຍບາຍຂອງພັກ ແລະ ລັດຖະບານວາງອອກ. ແຕ່ມີບາງສິ່ງບາງຢ່າງພວກເຮົາຍັງມີຄວາມຫຍຸ້ງຍາກ ຍ້ອນບັນຫາເສັ້ນທາງໄປມາຍັງບໍ່ສະດວກວ່ອງໄວ. ຕົວຢ່າງໃນເມື່ອກ່ອນໄປທ່ຽວວັງວຽງຕ້ອງໃຊ້ເວລາ 3 ຫາ 4 ຊົ່ວໂມງຈຶ່ງຮອດ, ແຕ່ຕົກມາດຽວນີ້ແມ່ນໃຊ້ເວລາພຽງຊົ່ວໂມງກວ່າກໍຮອດແລ້ວ.
ແຕ່ແນວໃດກໍຕາມ, ໃນເມື່ອມີທາງດ່ວນສະດວກສະບາຍຊໍ່ານີ້ແລ້ວມາເບິ່ງການເກັບຄ່າຜ່ານ ປາກົດວ່າມັນແພງກວ່າທີ່ຄິດ ເປັນຕົ້ນລົດກະບະຕ້ອງຈ່າຍເງິນທັງຂາໄປ ແລະ ກັບເຖິງສອງແສນຫາສາມແສນຈຶ່ງສາມາດຜ່ານໄດ້. ໃນຕອນບໍ່ທັນເປີດສາຍທາງໃຜກໍມີຄວາມຫວັງວ່າເສັ້ນທາງດ່ວນວຽງຈັນ-ວັງວຽງຈະເປັນສັນຍາລັກ ທັງຂວັນໃຈຂອງຊາວລາວທົ່ວທັງປະເທດ ເພາະແຕ່ໃດມາຍັງບໍ່ທັນເຄີຍມີທາງດ່ວນໃນປະຫວັດສາດຂອງຊາດລາວຈັກເທື່ອ. ແຕ່ກໍອານິຈາ ຜ່ານການສຳຜັດຂອງຫລາຍຄົນ ໃຜກໍຜິດຫວັງ ທັງມີສຽງຈົ່ມວ່າມັນແພງກວ່າທີ່ຄິດ. ນອກຈາກນັ້ນແລ້ວ ການແລ່ນຜ່ານສາຍທາງດ່ວນໃນສະພາບທີ່ມັນຍັງເປັນຂອງໃໝ່ ເບິ່ງຄືວ່າເຂົ້າໄວອອກຊ້າ. ຕອນເຂົ້າເບິ່ງລົດມັນບໍ່ໄດ້ມາພາບດຽວ, ແຕ່ຕອນຂາອອກເພື່ອຈະຈ່າຍເງິນ ປາກົດວ່າແກ່ຍາວເປັນສອງຫາສາມຊົ່ວໂມງຈຶ່ງຫວິດ. ຖ້າເປັນສະພາບຄືແນວນີ້ມັນກໍບໍ່ຕ່າງຫຍັງກັບໄປເສັ້ນທາງທຳມະດາ ເພາະກວ່າຈະຜ່ານເຂົ້າອອກໄດ້ມັນກໍຕ້ອງໃຊ້ເວລາດົນນານ ຕ່າງແຕ່ວ່າເສັ້ນທາງມັນອ່າວຊື່ ແລະ ລ່ຽນໄຫລຂັບໄດ້ວ່ອງໄວທັນໃຈເທົ່ານັ້ນ.
ເຖິງຢ່າງໃດກໍດີ, ຄາດວ່າໃນອະນາຄົດຕໍ່ໜ້າ ທາງຂະແໜງການກ່ຽວຂ້ອງຕ້ອງມີວິທີການປັບປຸງແກ້ໄຂຂອດບໍລິການ ນັບທັງຄ່າຜ່ານໃຫ້ຢູ່ໃນເກນເໝາະສົມຄືຕ່າງປະເທດເຂົາມີ, ແຕ່ຖ້າປະປ່ອຍໄປຕາມຄວາມຄິດຂອງຜູ້ລົງທຶນແລ້ວ ກໍຍິ່ງປຸກກວ່າຢາບ້ານຫ້ອມ.
