ເມືອງປະທຸມພອນ ປະກາດ 10 ບ້ານຢຸດຕິການຖ່າຍຊະຊາຍ
ແຫລ່ງຂ່າວຈາກເມືອງປະທຸມພອນ ແຂວງສະຫວັນນະເຂດ ໃຫ້ຮູ້ວ່າ: ວັນທີ 28 ທັນວາ 2020 ເມືອງປະທຸມພອນປະກາດບ້ານຢຸດຕິການຖ່າຍຊະຊາຍ 10 ບ້ານເປົ້າໝາຍ ເຊິ່ງປະກອບມີບ້ານຫວຍຍາງ, ຄອນນ້ອຍ, ນາສາຍຄໍາ, ນໍ້າໃສເທິງ, ນາບອນ, ກຽດໂງ້ງ, ຕາຫວາງ, ໜອງບົວນ້ອຍ, ພະລາຍ ແລະ ບ້ານຕາງອອງ ເຊິ່ງ 10 ເປົ້າໝາຍດັ່ງກ່າວມີຈໍານວນ 10.680 ຄົນ, ຍິງ 5.399 ຄົນ, ມີ 1.798 ຫລັງຄາເຮືອນ. ຜ່ານການປະເມີນຜົນເຫັນວ່າພາຍໃນ 10 ບ້ານ ແມ່ນມີການຢຸດຕິຖ່າຍຊະຊາຍກວມເອົາ 95% ຂຶ້ນໄປ ແລະ ມາຮອດປັດຈຸບັນທົ່ວເມືອງໄດ້ປະກາດເປັນບ້ານຢຸດຕິການຖ່າຍຊະຊາຍໄດ້ທັງໝົດ 44 ບ້ານ.
ໂອກາດນີ້, ທ່ານ ບຸນຖອງ ສຸພາວົງ ຮອງເຈົ້າເມືອງປະທຸມພອນ, ຜູ້ຊີ້ນໍາວຽກງານວັດທະນະທໍາ-ສັງຄົມ ໄດ້ເນັ້ນໃຫ້ອໍານາດການປົກຄອງ ກໍຄືປະຊາຊົນໃຫ້ນໍາເອົາເນື້ອໃນຈິດໃຈຂອງກ່ຽວກັບການຢຸດຕິຖ່າຍຊະຊາຍໄປເຜີຍແຜ່ໃຫ້ຊຸມຊົນຂອງຕົນຮັບຮູ້ເຂົ້າໃຈກ່ຽວກັບການຕິດຕໍ່ ແລະ ແລະ ການປ້ອງກັນເຊື້ອພະຍາດຕ່າງໆທີ່ມາຈາກນໍ້າ ແລະ ອາຈົມຂອງຄົນ, ສັດມາສູ່ຮ່າງກາຍເຮົາ ຈໍາເປັນຕ້ອງໄດ້ຢຸດຕິການຖ່າຍຊະຊາຍ ເພື່ຶອໃຫ້ບ້ານເມືອງມີຄວາມສະອາດສວຍງາມ ປະຊາຊົນມີສຸຂະອະນາໄມທີ່ດີ.
