ຍີ່ປຸ່ນປະກາດ “ປິດປະເທດ” ເລີ່ມ 28 ທັນວານີ້ ຫລັງພົບໂຄວິດສາຍພັນໃໝ່
ລັດຖະບານຍີ່ປຸ່ນຕັດສິນໃຈໂຈະການເຂົ້າປະເທດຮອບໃໝ່ຂອງຄົນຕ່າງປະເທດທີ່ບໍ່ໄດ້ມີສະຖານະເປັນຜູ້ອາໄສຢູ່ຍີ່ປຸ່ນທັງໝົດ ຫລັງຈາກກວດພົບເຊື້ອໂຄວິດ-19 ສາຍພັນໃໝ່ເລີ່ມລະບາດໃນປະເທດ ແລະ ຕ້ອງເຂົ້າກັກຕົວ 14 ວັນ ໂດຍບໍ່ມີຂໍ້ຍົກເວັ້ນ.
ໂດຍລັດຖະບານຍີ່ປຸ່ນຈະໃຊ້ມາດຕະການນີ້ນັບແຕ່ວັນທີ 28 ທັນວາ – 31 ມັງກອນ ຈາກຕອນທຳອິດນັບແຕ່ເດືອນຕຸລາ 2020 ຍີ່ປຸ່ນໄດ້ອະນຸຍາດໃຫ້ມີການເຂົ້າປະເທດຮອບໃໝ່ຂອງຄົນຕ່າງປະເທດຈາກທຸກປະເທດ ແລະ ດິນແດນໃນກໍລະນີທີ່ເປັນບຸກຄົນທີ່ມີສະຖານະເປັນຜູ້ອາໄສໄລຍະກາງເຖິງໄລຍະຍາວຢູ່ຍີ່ປຸ່ນ, ແຕ່ການເຂົ້າປະເທດຂອງບຸກຄົນເຫລົ່ານີ້ ຈະຖືກໂຈະເລີ່ມແຕ່ວັນທີ 28 ທັນວາ.
ສ່ວນກໍລະນີຂອງຜູ້ທີ່ເດີນທາງດ້ານທຸລະກິດເຂົ້າ ແລະ ອອກຈາກປະເທດ ແລະ ດິນແດນທີ່ກຳນົດໄວ້ ຍັງສາມາດເຮັດໄດ້ຢູ່. ນອກຈາກນັ້ນ ທຸກຄົນທີ່ເດີນທາງມາຈາກຕ່າງປະເທດຈະຕ້ອງເຂົ້າກັກຕົວເປັນເວລາ 14 ວັນ ໂດຍບໍ່ມີຂໍ້ຍົກເວັ້ນ.
ດັ່ງນັ້ນ, ທຸກຄົນທີ່ເດີນທາງກັ ຫລື ເດີນທາງເຂົ້າຍີ່ປຸ່ນຈາກປະເທດທີ່ມີການຕິດເຊື້ອໂຄວິດ-19 ສາຍພັນໃໝ່ຕ້ອງຍື່ນເອກະສານຮັບຮອງວ່າ: ບໍ່ຕິດເຊື້ອ ແລະ ຕ້ອງກວດພາຍໃນ 72 ຊົ່ວໂມງກ່ອນເຂົ້າປະເທດ.
ໃນວັນທີ 25 ທັນວາຜ່ານມາ, ກະຊວງສາທາລະນະສຸກຍີ່ປຸ່ນກວດພົບຜູ້ຕິດເຊື້ອໂຄວິດ-19 ສາຍພັນໃໝ່ 5 ຄົນທຳອິດ ໃນກຸ່ມທີ່ເດີນທາງມາຈາກອັງກິດ ໂດຍ 5 ຄົນນີ້ບໍ່ສະແດງອາການໃດໆ ເຮັດໃຫ້ຕອນນີ້ຍີ່ປຸ່ນຍົກລະດັບເພື່ອປິດກັ້ນການຮົ່ວໄຫລຂອງຜູ້ຕິດເຊື້ອສາຍພັນໃໝ່ເຂົ້າປະເທດໃຫ້ໄດ້ຫລາຍທີ່ສຸດ.
