ປາກຽວ ຢືນຢັນຂໍແກ້ມືກັບ ຮອນ ອີກຄັ້ງ, ແຕ່ຄູເຝິກແນະນຳໃຫ້ແຂວນນວມ

ແມນນີ ປາກຽວ ຢືນຢັນຂໍ ແກ້ມືກັບ ເຈຟ ຮອນ ຄູ່ປັບເກົ່າອີກ ຄັ້ງ ຕາມສັນຍາເງື່ອນໄຂທີ່ຕົກລົງ ກັນໄວ້ ຂະນະທີ່ ເຟຣດດີ ໂຣດ ຄູ ເຝິກຄູ່ໃຈເຫັນຕ່າງແນະນຳໃຫ້ ປາກຽວແຂວນນວມ ສ່ວນ ເຈຟ ເຟເນກ ຕຳນານນັກມວຍຊາວ ອອສເຕຣເລຍ ເຫັນດີນຳກັບການ ແຂວນນວມຂອງ ປາກຽວ.
ຫຼັງຈາກທີ່ ປາກຽວ ປາລາ ຄັ້ງທີ 7 ເມື່ອເສຍຄະແນນໃຫ້ ເຈຟ ຮອນ ນັກຊົກຄົນເກັງຈາກ ອອສ ເຕຣເລຍ ທີ່ຊັນຄອບ ສັງວຽນເຈົ້າ ຖິ່ນໃນວັນທີ 02 ກໍລະກົດ ສົ່ງຜົນ ໃຫ້ສາຍແອວແຊ໊ມໂລກ ຮຸ່ນເວລ ເຕີເວດ ທີ່ຄອງມາດົນມີອັນຖືກ ປ່ຽນອອກໄປ. ຫຼ້າສຸດ ປາກຽວ ຢືນຢັນຈະຂໍລ້າງຕາກັບ ຮອນ ເພື່ອທວງຄືນສິ່ງທີ່ເສຍໄປຕາມ ເງື່ອນໄຂທີ່ເຊັນໄວ້.
“ຂ້ອຍຕ້ອງການທີ່ຈະຊົກ ອີກຄັ້ງກັບ ຮອນ ຕາມສັນຍາທີ່ ເຮົາຕົກລົງກັນໄວ້ກ່ອນທີ່ຈະຊົກ ກັນໃນຄັ້ງດັ່ງກ່າວຜ່ານມາ ເຊິ່ງ ຂ້ອຍຍອມຮັບວ່າໂຕເອງນ້ັນຍັງ ຊົກໄດ້ບໍ່ດີເທົ່າທີ່ຄວນ ແນວໃດກໍ ຕາມ ການຊົກຄັ້ງທີ 2 ລະຫວ່າງ ຂ້ອຍ ກັບ ຮອນ ຈະຕ້ອງມີຂຶ້ນແນ່ ນອນ ເນື່ອງຈາກຂ້ອຍຕ້ອງການ ສາຍແອວຂອງຂ້ອຍກັບມາອີກ ຄັ້ງ” ປາກຽວ ກ່າວ.
ຂະນະທີ່ ເຟຣດດີ ໂຣດ ຄູ ເຝິກຄູ່ໃຈຂອງ ປາກຽວ ໄດ້ອອກ ຄວາມຄິດເຫັນກ່ຽວກັບເລື່ອງນີ້ ວ່າ ຕົນນັ້ນບໍ່ພໍໃຈຜົນງານການ ຊົກຄັ້ງຫຼ້າສຸດຂອງ ປາກຽວ ເລີຍ ເນື່ອງຈາກສຸຂະພາບບໍ່ດີທີ່ຈະຢູ່ ເທິງສັງວຽນແລ້ວ ທັງນີ້ ໂຣດ ຍັງ ໄດ້ແນະນຳໃຫ້ ປາກຽວ ຢຸດຕິ ບົດບາດໜ້າທີ່ຂອງນັກມວຍລົງ ເນື່ອງຈາກອາຍຸຫຼາຍແລ້ວ.
ສ່ວນ ເຈຟ ເຟເນກ ຕຳນານ ນັກມວຍຂວັນໃຈຊາວ ອອສເຕຣ ເລຍ ສະແດງໃຫ້ຄວາມຄິດເຫັນ ໃນທິດທາງດຽວກັນວ່າ ປາກຽວ ບໍ່ຄວນຝືນສັງຂານຂຶ້ນເວທີແລ້ວ “ຖ້າພວກເຂົາປ່ອຍໃຫ້ ປາກຽວ ຂຶ້ນຊົກອີກຄັ້ງ ນັ້ນຄືສິ່ງທີ່ໂງ່ຫຼາຍ ລາວຄວນເຮັດໂຕສະບາຍ ແລະ ມີຄວາມສຸກກັບເງິນທີ່ຫາມາໄດ້ ຜົນງານຜ່ານມາບົ່ງບອກວ່າລາວບໍ່ຕ້ອງພິສູດໂຕເອງແລ້ວ”.