ເບິ່ງຄືວ່າເຮົາຍັງຖືເບົາຕໍ່ການສະກັດກັ້ນ ການລະບາດຂອງໄຂ້ຍຸງລາຍ
ໂດຍ: ທ່ຽງທຳ
ສະບາຍດີເພື່ອນຜູ້ອ່ານທີ່ຮັກແພງ, ຫລາຍຄົນກໍຄົງຈະຮູ້ດີວ່າ: ໃນປັດຈຸບັນ ຢູ່ຫລາຍປະເທດອ້ອມຂ້າງເຮົາ ແລະ ກະໂຕປະເທດເຮົາກໍມີການລະບາດຂອງໄຂ້ຍຸງລາຍ ແລະ ໄດ້ຂ້າຊີວິດຂອງຄົນເຮົາໄປແລ້ວເປັນຈຳນວນບໍ່ໜ້ອຍ. ກໍດັ່ງຫຼາຍແຫຼ່ງຂ່າວໄດ້ນຳສະເໜີໃຫ້ເຮົາເຫັນ, ສະເພາະຢູ່ນະຄອນຫຼວງວຽງຈັນໃນປັດຈຸບັນກໍມີຫຼາຍຈຸດ, ຫຼາຍເມືອງ, ຫຼາຍບ້ານໄດ້ມີການລະບາດຂອງພະຍາດດັ່ງກ່າວ.
ຖ້າໄລ່ສະເພາະຜູ້ຕິດເຊື້ອກໍນັບເປັນຫົວພັນຂຶ້ນເມືອ, ສາເຫດຕົ້ນຕໍກໍເນື່ອງມາຈາກສະພາບການປ່ຽນແປງຂອງດິນຟ້າອາກາດ ໂດຍສະເພາະລະດູຝົນນີ້ ອັນເປັນເງື່ອນໄຂໃຫ້ຍຸງລາຍຕົວນຳເຊື້ອຂອງພະຍາດດັ່ງກ່າວແຜ່ພັນ ແລະ ຂະຫຍາຍໂຕໄດ້ງ່າຍ. ແຕ່ເບິ່ງແລ້ວ ຂະແໜງການກ່ຽວຂ້ອງກໍຄືວ່າບໍ່ທັນໄດ້ເອົາໃຈໃສ່ພໍປານໃດຕໍ່ການປຸກລະດົມຂະບວນການຕ້ານ ແລະ ສະກັດກັ້ນການລະບາດຂອງພະຍາດດັ່ງກ່າວຄືດັ່ງຫຼາຍປີຜ່ານມາ ໂດຍສະເພາະການປຸກລະດົມມວນຊົນເຮັດວຽກງານອະນາໄມສິ່ງແວດລ້ອມ ທຳລາຍກະໂປະກະປ໋ອງ, ບ່ອນນ້ຳອັ່ງຂັງ ອັນເປັນບ່ອນວາງໄຂ່ຂອງຍຸງລາຍ ແລະ ການເຄື່ອນໄຫວພົ່ນຢາຂ້າຍຸງໃນບ່ອນມີການລະບາດ ເພື່ອກຳຈັດບໍ່ໃຫ້ແຜ່ລາມອອກໄປສູ່ບ່ອນອື່ນ ແລະ ພ້ອມນັ້ນກໍແມ່ນການປຸກລະດົມທຳລາຍໜອນນ້ຳຍຸງລາຍ, ນອນຕ້ອງກາງມຸ້ງ ແລະ ອື່ນໆ ຕາມຄຳຂວັນ 5 ປ ຂອງກະຊວງສາທາລະນະສຸກວາງອອກຄື:
1. ປິດຝາພາຊະນະເກັບນ້ຳໃນເຮືອນ ແລະ ນອກເຮືອນ ເພື່ອບໍ່ໃຫ້ຍຸງມາໄຂ່ໃສ່,
2. ປ່ຽນນ້ຳ ແລະ ພັດຖູພາຊະນະຕ່າງໆເຊັ່ນ: ເຕົ້າດອກໄມ້, ນ້ຳຮອງຕີນຕູ້, ຖ້ານຮອງຈອກນ້ຳ ແລະ ອື່ນໆ,
3. ປ່ອຍປາຫາງນົກຍຸງ ເພື່ອກິນໜອນນ້ຳ,
4. ບໍ່ໃຫ້ມີນ້ຳຄ້າງຂັງກະໂປະກະປ໋ອງ, ຮາງລິນ, ຢາງຕີນລົດເກົ່າ,
5. ປະຕິບັດເປັນປະຈຳທຸກໆອາທິດ ແລະ ຖ້າເປັນໄຂ້ໃຫ້ໄປປິ່ນປົວຢູ່ໂຮງໝໍ ແລະ ສຸກສາລາໃກ້ບ້ານທ່ານ ແລະ ປະຕິບັດພຽງເທົ່ານີ້ ທ່ານກໍຈະເປັນຜູ້ໜຶ່ງມີສ່ວນຮ່ວມໃນການປາບໄຂ້ຍຸງລາຍແລ້ວ.
