ລາວ-ຫວຽດນາມແລກປ່ຽນບົດຮຽນ ວຽກງານແຜນການ-ການເງິນ
ໂດຍຕອບສະໜອງຕາມການເຊື້ອເຊີນຂອງທ່ານ ຫວຽນ ດຶກ ຫາຍ ກໍາມະການສູນກາງພັກ, ກຳມະການຄະນະປະຈຳ, ປະທານກຳມາທິການການເງິນ-ງົບປະມານສະພາແຫ່ງຊາດແຫ່ງ ສສ ຫວຽດນາມ. ທ່ານ ວິໄລວົງ ບຸດດາຄຳ ກຳມະການສູນກາງພັກ, ຄະນະປະຈຳ, ປະທານກຳມາທິການແຜນການ, ການເງິນ ແລະ ການກວດສອບສະພາແຫ່ງຊາດລາວ ທັງເປັນປະທານສະມາຄົມມິດຕະພາບ ລາວ-ຫວຽດນາມ ໄດ້ນຳພາຄະນະຜູ້ແທນສະພາແຫ່ງຊາດ, ສະພາປະຊາຊົນຂັ້ນແຂວງ, ອົງການກວດສອບແຫ່ງລັດ ແລະ ກະຊວງການເງິນ ເຂົ້າຮ່ວມກອງປະຊຸມສຳມະນາສາກົນໃນຫົວຂໍ້: “ປະສົບການໃນການຈັດຕັ້ງປະຕິບັດການແບ່ງຂັ້ນຄຸ້ມຄອງງົບປະມານແຫ່ງລັດ ແລະ ການຄຸ້ມຄອງໜີ້ສິນພາກລັດ” ທີ່ແຂວງກວາງນາມ ສສ ຫວຽດນາມ ໃນລະຫວ່າງວັນທີ 26-30 ມິຖຸນາຜ່ານມາ.
ກອງປະຊຸມດັ່ງກ່າວແມ່ນເພື່ອເປັນການສືບຕໍ່ການຮ່ວມມືລະຫວ່າງສອງສະພາເວົ້າລວມ, ເວົ້າສະເພາະສອງກຳມາທິການ ແລະ ເປັນການແລກປ່ຽນບົດຮຽນໃນການຄຸ້ມຄອງງົບປະມານ ແລະ ໜີ້ສິນພາກລັດ ໂດຍສະເພາະບົດຮຽນທີ່ດີຂອງຫວຽດນາມໃນການຄຸ້ມຄອງງົບປະມານ-ການເງິນ ເພຶ່ອເປັນຂໍ້ມູນໃນການກະກຽມໃຫ້ແກ່ການສ້າງ ແລະ ປັບປຸງນິຕິກຳກ່ຽວຂ້ອງ ໂດຍສະເພາະ ຮ່າງກົດໝາຍວ່າດ້ວຍການຄຸ້ມຄອງໜີ້ສິນ ເຊິ່ງຄາດວ່າຈະໄດ້ສະເໜີຕໍ່ກອງປະຊຸມສະພາແຫ່ງຊາດ ເພຶ່ອປຶກສາຫາລື ແລະ ພິຈາລະນາຮັບຮອງໃນທ້າຍປີນີ້.
ໃນກອງປະຊຸມໄດ້ນຳສະເໜີບົດຮຽນສໍາຄັນ ຄືການຈັດຕັ້ງປະຕິບັດການແບ່ງຂັ້ນຄຸ້ມຄອງງົບປະມານແຫ່ງລັດ, ການຄຸ້ມຄອງໜີ້ສິນພາກລັດ ແລະ ທັດສະນະຂອງອົງການກວດສອບແຫ່ງລັດຕໍ່ກັບໜີ້ສິນພາກລັດ.
ກອງປະຊຸມຄັ້ງນີ້ຈັດຂຶ້ນໃນທ່າມກາງບັນຍາກາດທີ່ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ພວມສະເຫລີມສະຫລອງປີມະຫາສາມັກຄີຂອງສອງຊາດ ຄືວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 40 ປີ ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 55 ປີ.
