ໄຟແດງເປັນອຳມະພາດອາດສ່ຽງຕໍ່ອຸບັດຕິເຫດໄດ້ງ່າຍ
ໂດຍ: ທິດກໍ່າ
ສະພາບໄຟແດງ ຫລື ວ່າໄຟອຳນາດທີ່ຢູ່ຕາມສີ່ແຍກໄດ້ເກີດອຳມະພາດໃຊ້ການບໍ່ໄດ້ໃນບາງຈຸດ, ບາງບ່ອນຢູ່ກະໂຕນະຄອນຫລວງວຽງຈັນ ແມ່ນມັກມີໃຫ້ເຫັນເລື້ອຍໆ. ໃນເມື່ອມັນຕິດຂັດໃຊ້ການບໍ່ໄດ້ໄປແລ້ວ ກວ່າຈະມີການບຳລຸງຮັກສາສ້ອມແປງມັນກໍຕ້ອງໄດ້ໃຊ້ເວລາຫລາຍວັນ, ຫລາຍອາທິດ ຫລື ບາງບ່ອນກໍແກ່ຍາວເປັນເດືອນ ຈຶ່ງສາມາດນຳໃຊ້ໄດ້. ອັນສາເຫດຫລັກທີ່ເຮັດໃຫ້ມັນຊັກຊ້າຄືແນວນີ້ ກໍອາດຍ້ອນປັດໄຈເລື່ອງງົບ, ເລື່ອງເງິນເປັນຕົ້ນຕໍ ເພາະກວ່າຈະໄດ້ງົບມາສ້ອມແປງຄືນ ຫລື ຈະໄວ ຫລື ຊ້ານັ້ນ ມັນກໍຕ້ອງມີຂັ້ນຕອນຢ່າງປະຕິເສດບໍ່ໄດ້.
ແນວໃດກໍຕາມ, ເທົ່າທີ່ເຄີຍເຫັນຜ່ານມາ ເວົ້າເລື່ອງການປົກປັກຮັກສາ ແລະ ບຳລຸງສ້ອມແປງໃນໄລຍະຜ່ານມາ ກໍຄືສະພາບປັດຈຸບັນ ທາງເຈົ້າໜ້າທີ່ກ່ຽວຂ້ອງເພິ່ນກໍບໍ່ໄດ້ລົດລະປ່ອຍປະລະເລີຍຈົນໃຫ້ມັນກາຍເປັນຫຸ່ນໄລ່ກາແຕ່ປະການໃດ. ໃນວັນເວລາມັນມາເຖິງກໍຕ້ອງໄດ້ຖືກສ້ອມແປງໃຫ້ສາມາດນຳໃຊ້ໄດ້ເປັນປົກກະຕິ, ແຕ່ຈະໄວ ຫລື ຊ້ານັ້ນ ມັນກໍຂຶ້ນກັບສະພາບຄວາມເປັນຈິງຂອງແຕ່ລະໄລຍະ. ແຕ່ສິ່ງທີ່ໜ້າໜັກໃຈ ແລະ ເປັນຫ່ວງນຳ ກໍຄືລົດລາງພາຫະນະຢູ່ບ້ານເຮົາທຸກມື້ນີ້ມັນນັບມື້ເພີ່ມຂຶ້ນຕິກໆ. ນອກຈາກພາຫະນະເພີ່ມຂຶ້ນແລ້ວ ຖະໜົນຫົນທາງບາງເສັ້ນກໍຍັງບໍ່ໄດ້ມາດຕະຖານເຊັ່ນ: ທາງແຄບ, ເປັນທາງສອງເລນ ຫລື ບາງບ່ອນກໍເປ່ເພ, ເປັນຫລຸບເປັນໂນນ, ຍາມແລ້ງເຕັມແຕ່ຂີ້ຝຸ່ນໄງ້ກຸ້ມ, ຕົກຍາມຝົນມານ້ຳອັ່ງ ຫລື ມີແຕ່ຂີ້ຕົ້ມເລະລະ.
ຈາກປັດໄຈດັ່ງກ່າວ ຈຶ່ງເປັນເຫດໃຫ້ການໄປມາ, ການນຳໃຊ້ລົດ-ໃຊ້ຖະໜົນອັ່ງອໍຕິດຂັດເປັນພຶງເປັນແພຍາວຢຽດ. ຍິ່ງໄປກວ່ານັ້ນ ບາງກໍລະນີກໍຊີງກັນໄປຢ່າງບໍ່ເປັນລະບຽບ ແລະ ບໍ່ຖືກຕ້ອງຕາມກົດຈາລະຈອນ. ສຳລັບຢູ່ຈຸດທີ່ມີໄຟແດງທີ່ຍັງໃຊ້ການບໍ່ໄດ້ ເພິ່ນກໍຍິ່ງຍາດກັນໄປຢ່າງສັບສົນ, ອົນລະເວງ, ມີຜູ້ຂັບໄວຂັບຊ້າ, ລັດໜ້າລັດຫລັງກັນ ເບິ່ງແລ້ວມັນບໍ່ໂສພາຈັກໜ້ອຍເລີຍ. ເມື່ອຕັ້ງໂຈດກັນວ່າ, ຕໍ່ສະພາບທີ່ເກີດຂຶ້ນເຊັ່ນນີ້ ສິ່ງຕາມມາມັນຄືຫຍັງ. ຄຳຕອບທີ່ຖືກຕ້ອງຊັດເຈນກໍຄືເກີດອຸປະຕິເຫດຕາມມາຢ່າງແນ່ນອນ. ໃນການເກີດອຸປະຕິເຫດແຕ່ລະຄັ້ງມັນກໍເປັນສິ່ງທີ່ບໍ່ດີ, ບາງຄົນເຈັບ, ບາງຄົນເປັນ, ມີຜູ້ເຈັບໜ້ອຍ, ເຈັບຫລາຍ, ມີຜູ້ຕາຍຜູ້ຍັງຢ່າງປະຕິເສດບໍ່ໄດ້. ດັ່ງສະຖິຕິການເກີດອຸປະຕິເຫດໃນແຕ່ລະເດືອນ, ແຕ່ລະປີຢູ່ບ້ານເຮົາຜ່ານມາມັນເປັນຮ້ອຍເປັນພັນກໍລະນີ. ຈາກສະພາບທີ່ເກີດຂຶ້ນນີ້ ເມື່ອປຽບທຽບໃສ່ປະເທດທີ່ເພິ່ນມີຄວາມຈະເລີນແລ້ວ ມັນຍັງໄກກັນຫລາຍໂຍດ.
ແນວໃດກໍດີ, ເມື່ອເວົ້າເຖິງລະບົບໄຟແດງ ຫລືວ່າ ໄຟອຳນາດຢູ່ປະເທດເຮົາໃນປັດຈຸບັນ ມັນກໍມີດີຂຶ້ນຫລາຍແລ້ວ ຍ້ອນວ່າທາງພັກ ແລະ ລັດຖະບານ ກໍຄືຂະແໜງການກ່ຽວຂ້ອງກໍມີການປັບປຸງ ແລະ ພັດທະນາໃຫ້ດີຂຶ້ນເລື້ອຍໆ, ຕົວຢ່າງຢູ່ນະຄອນຫລວງວຽງຈັນເຮົາກໍມີການປ່ຽນແປງຂຶ້ນຫລາຍ. ປັດຈຸບັນ ສ່ວນຫລາຍໄຟແດງຢູ່ນະຄອນຫລວງວຽງຈັນແມ່ນເພິ່ນໃຊ້ໄຟຟ້າແສງຕາເວັນ, ຖ້າບໍ່ມີສິ່ງກະທົບກະເທືອນອີ່ຫລີ ລະບົບໄຟແດງມັນກໍດຳເນີນໄປເປັນປົກກະຕິ ແລະ ທາງເຈົ້າໜ້າທີ່ກ່ຽວຂ້ອງເພິ່ນກໍມີການປັບປຸງ ແລະ ພັດທະນາໃຫ້ດີຂຶ້ນໄປແຕ່ລະໄລຍະ.
ແຕ່ເຖິງຢ່າງໃດກໍດີ, ເວົ້າເຖິງວັດຖຸ ບໍ່ວ່າອັນໃດກໍດີ ໃນເມື່ອມີການໃຊ້ງານໄປດົນນານເທົ່າໃດມັນກໍຍິ່ງເຊື່ອມຄຸນ ແລະ ເປ່ເພເສຍຫາຍເປັນທຳມະດາ. ແຕ່ຂໍຢ່າງດຽວໃນເມື່ອມັນມີການເສຍຫາຍໄປແລ້ວຕ້ອງມີອັນໃໝ່ປ່ຽນແທນໃສ່ໃໝ່ໃຫ້ທັນເວລາ ເພາະລະບົບໄຟແດງ ຫລື ໄຟອຳນາດໃນເມື່ອມັນເກີດອຳມະພາດໄປແລ້ວ ອາດມີຄວາມສ່ຽງຕໍ່ການເກີດອຸປະຕິເຫດດັ່ງພວກເຮົາເຄີຍເຫັນໃນໄລຍະຜ່ານມາ ກໍຄືໃນສະພາບປັດຈຸບັນ.
