ໂຄວິດ-19 ສາຍພັນອັງກິດພົບຢູ່ສິງກະໂປ
ສິງກະໂປລະບຸພົບໄວຣັສໂຄວິດ-19 ສາຍພັນອັງກິດແລ້ວ, ແຕ່ເນັ້ນຍັງບໍ່ພົບການລະບາດພາຍໃນປະເທດ.
ວັນທີ 24 ທັນວາ 2020, ເວັບໄຊ CAN ສື່ສິງກະໂປລາຍງານອ້າງການຖະແຫລງຂ່າວຂອງກະຊວງສາທາລະນະສຸກສິງກະໂປ ໃນວັນທີ 23 ທັນວາ ເປີດເຜີຍວ່າ: ທາງການສິງກະໂປໄດ້ກວດພົບຜູ້ຕິດເຊື້ອໂຄວິດ-19 ຄົນທຳອິດທີ່ຕິດເຊື້ອໂຄວິດ-19 ທີ່ກຳລັງກາຍພັນ ແລະ ແຜ່ລະບາດຮຸນແຮງໃນປະເທດອັງກິດ.
ກະຊວງສາທາລະນະສຸກສິງກະໂປເປີດເຜີຍວ່າ: ຜູ້ຕິດເຊື້ອເປັນຜູ້ຍິງອາຍຸ 17 ປີ ເດີນທາງໄປຮຽນຕໍ່ຢູ່ອັງກິດນັບແຕ່ເດືອນສິງຫາຜ່ານມາ ແລະ ຫາກໍເດີນທາງກັບສິງກະໂປເມື່ອວັນທີ 6 ທັນວາ ໂດຍມື້ຕໍ່ມານາງມີອາການໄຂ້ສູງ ຈຶ່ງເຂົ້າກວດເຊື້ອໂຄວິດ-19 ແລະ ພົບວ່າຕິດເຊື້ອສາຍພັນ B117 ເຊິ່ງເປັນເຊື້ອທີ່ກາຍພັນ ແລະ ກຳລັງລະບາດຢູ່ປະເທດອັງກິດ.
ນອກຈາກຜູ້ຕິດເຊື້ອຄົນນີ້ແລ້ວ, ເຈົ້າໜ້າທີ່ຍັງພົບຜູ້ທີ່ເດີນທາງກັບຈາກເອີຣົບອີກ 11 ຄົນ ເຊິ່ງຜົນການກວດເຊື້ອເບື້ອງຕົ້ນພົບໄວຣັສໂຄວິດ-19 ສາຍພັນອັງກິດໃນຮ່າງກາຍ, ແຕ່ກຳລັງຢູ່ລະຫວ່າງການຢືນຢັນຜົນອີກເທື່ອໜຶ່ງ.
ທາງການສິງກະໂປຢືນຢັນວ່າ: ປັດຈຸບັນເຈົ້າໜ້າທີ່ກຳລັງເລັ່ງກວດເຊື້ອທາງບຸກຜູ້ມີປະຫວັດໃກ້ຊິດ. ພ້ອມເນັ້ນວ່າ: ຍັງບໍ່ມີຫລັກຖານບົ່ງບອກວ່າເຊື້ອໂຄວິດ-19 ທີ່ກາຍພັນຫລຸດອອກໄປແຜ່ລະບາດໃນປະເທດແລ້ວ ເນື່ອງຈາກຜູ້ຕິດເຊື້ອຄົນດັ່ງກ່າວຖືກກັກຕົວທັນທີທີ່ເດີນທາງຮອດສິງກະໂປ.
