ຈີນເລີ່ມສ້າງ “ໂຮງງານວັກຊີນໂຄວິດ-19” ໃນຢູນນານ
ທາງການທ້ອງຖິ່ນມົນທົນວິນໜານ (ຢູນນານ) ທາງຕາເວັນຕົກສຽງໃຕ້ຂອງຈີນ ເປີດເຜີຍວ່າ: ຈີນເລີ່ມກໍ່ສ້າງໂຮງງານຜະລິດວັກຊີນປ້ອງກັນພະຍາດຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ຊະນິດ mRNA ໃນວັນທີ 21 ທັນວາ ໂດຍມີກຳນົດເລີ່ມຜະລິດວັກຊີນໃນອີກ 8 ເດືອນ.
ໂຮງງານດັ່ງກ່າວຕັ້ງຢູ່ໃນເມືອງວີຊີຂອງວິນໜານ ມີການຄາດຄະເນວ່າຈະສາມາດຜະລິດວັກຊີນໄດ້ 120 ລ້ານໂດສຕໍ່ປີໃນໄລຍະທຳອິດ ໂດຍອຸປະກອນການຜະລິດທີ່ສຳຄັນ ແລະ ສ່ວນປະສົມຫລັກທັງໝົດລ້ວນພັດທະນາໂດຍຈີນ.
ສຳນັກບໍລິຫານການຢາແຫ່ງຊາດຈີນ (NMPA) ອະນຸມັດການທົດລອງທາງຄລີນິກຂອງວັກຊີນພະຍາດໂຄວິດ-19 ຊະນິດ mRNA ເມື່ອວັນທີ 19 ມິຖຸນາຜ່ານມາ ແລະ ປັດຈຸບັນ ວັກຊີນໃກ້ເຂົ້າສູ່ການທົດລອງທາງຄລີນິກໄລຍະທີ 2 ແລ້ວ.
ທັງນີ້, ວັກຊີນເບື້ອງຕົ້ນຖືກພັດທະນາຮ່ວມລະຫວ່າງສະຖາບັນວິທະຍາສາດການແພດທະຫານ (AMMS), ບໍລິສັດ Suzhou Abogen Biosciences ແລະ ບໍລິສັດ Walvax Biotechnology ໂດຍທີມພັດທະນາວັກຊີນລະບຸວ່າ: ຊະນິດຂອງວັກຊີນມີຄວາມປອດໄພໃນການທົດລອງທາງຄລີນິກໄລຍະທີ 1 ມີການສ້າງພູມຄຸ້ມກັນດີ ແລະ ມີສະຖຽນລະພາບດີ ຂະນະຖືກເກັບຮັກສາໃນອຸນຫະພູມ 2-8 ອົງສາ.
