ໂຄວິດ-19 ຢູ່ ສ.ເກົາຫລີ ວິກິດ ຜູ້ຕິດເຊື້ອ 6 ຄົນຕາຍລະຫວ່າງຖ້າຕຽງນອນ
ຜູ້ຕິດເຊື້ອໂຄວິດ-19 ເສຍຊີວິດລະຫວ່າງຖ້າຕຽງນອນສູງເຖິງ 6 ຄົນໃນເດືອນນີ້ ສະທ້ອນລະບົບສາທາລະນະສຸກໃນປະເທດທີ່ອາດບໍ່ພຽງພໍຕໍ່ການຮອງຮັບຜູ້ຕິດເຊື້ອໂຄວິດ-19 ທີ່ກຳລັງເພີ່ມສູງຂຶ້ນຢູ່ ສ.ເກົາຫລີ.
ວັນທີ 18 ທັນວາ, ສຳນັກຂ່າວ Yonhap ສື່ພາສາອັງກິດຂອງ ສ.ເກົາຫລີ ລາຍງານວ່າ: ມີຜູ້ຕິດເຊື້ອໂຄວິດ-19 ເສຍຊີວິດລະຫວ່າງລໍຖ້າຕຽງຢູ່ໂຮງໝໍສູງເຖິງ 6 ຄົນໃນເດືອນນີ້ ຖືວ່າຫລາຍທີ່ສຸດນັບແຕ່ມີການລະບາດໃນເດືອນມັງກອນ ເຊິ່ງຜ່ານມາມີຜູ້ຕິດເຊື້ອໂຄວິດ-19 ທີ່ເສຍຊີວິດລະຫວ່າງລໍຖ້າຕຽງນອນທັງໝົດ 8 ຄົນ.
ລາຍງານລະບຸວ່າ: ຜູ້ຕິດເຊື້ອທັງ 6 ຄົນທີ່ຫາກໍເສຍຊີວິດ ໃນຈຳນວນນີ້ 1 ຄົນ ເສຍຊີວິດຢູ່ເຮືອນລະຫວ່າງລໍຖ້າຕຽງຢູ່ໂຮງໝໍວ່າງ, ສ່ວນອີກ 3 ຄົນເສຍຊີວິດຢູ່ສະຖານທີ່ເບິ່ງແຍງ ລະຫວ່າງລໍຖ້າສົ່ງຕົວໄປໂຮງໝໍ. ຂະນະທີ່ອີກ 2 ຄົນບໍ່ມີການເປີດເຜີຍສາເຫດການເສຍຊີວິດທີ່ຊັດເຈນ.
ການເສຍຊີວິດຂອງຜູ້ຕິດເຊື້ອໂຄວິດ-19 ລະຫວ່າງລໍຖ້າຕຽງນອນ ສະທ້ອນໃຫ້ເຫັນເຖິງສະຖານະການການລະບາດຂອງພະຍາດໂຄວິດ-19 ທີ່ກຳລັງຮຸນແຮງ ຈົນລະບົບສາທາລະນະສຸກອາດບໍ່ສາມາດຮອງຮັບຜູ້ຕິດເຊື້ອພຽງພໍ ໂດຍຫລ້າສຸດ ສ.ເກົາຫລີ ພົບຜູ້ຕິດເຊື້ອໂຄວິດ-19 ໃໝ່ຫລາຍກວ່າ 1.000 ຄົນ ຕິດຕໍ່ກັນມາ 3 ມື້ແລ້ວ ເຮັດໃຫ້ຈຳນວນຜູ້ຕິດເຊື້ອໂຄວິດ-19 ຢູ່ ສ.ເກົາຫລີ ສະສົມທັງໝົດ 47.000 ກວ່າຄົນ ແລະ ມີຜູ້ເສຍຊີວິດ 650 ຄົນ.
ຂະນະທີ່ໃນວັນທີ 17 ທັນວາ, ທາງການ ສ.ເກົາຫລີ ເປີດເຜີຍວ່າ: ມີຜູ້ເສຍຊີວິດໃໝ່ 22 ຄົນ ເຊິ່ງເປັນການເສຍຊີວິດໃນມື້ດຽວສູງທີ່ສຸດນັບແຕ່ມີການລະບາດຢູ່ ສ.ເກົາຫລີ ເປັນຕົ້ນມາ.
ປັດຈຸບັນ, ລັດຖະບານ ສ.ເກົາຫລີ ກຳລັງພິຈາລະນາວ່າ: ອາດບັງຄັບໃຊ້ມາດຕະການຮັກສາໄລຍະຫ່າງໃຫ້ເຂັ້ມງວດຂຶ້ນ ເຊິ່ງອາດກະທົບຕໍ່ທຸລະກິດຫລາຍກວ່າ 1,2 ລ້ານແຫ່ງໃຫ້ຕ້ອງປິດບໍລິການໃນທ້າຍປີນີ້.
