ປີ 2020 ຄະດີຕ່າງໆຫລຸດຜ່ອນລົງ 1.400 ກວ່າເລື່ອງ
ໃນປີ 2020 ທົ່ວປະເທດມີຄະດີຕ່າງໆເກີດຂຶ້ນຫລາຍກວ່າ 6.000 ເລື່ອງ, ທຽບໃສ່ປີ 2019 ຫລຸດຜ່ອນລົງ 1.400 ກວ່າເລື່ອງ, ໃນນີ້ຫລາຍກວ່າຫມູ່ແມ່ນຄະດີຢາເສບຕິດ ມີ 3.500 ກວ່າເລື່ອງ ທຽບໃສ່ປີຜ່ານມາຫລຸດລົງ 438 ເລື່ອງ ເຊິ່ງຕົວເລກດັ່ງກ່າວນີ້ໄດ້ຮັບການເປີດເຜີຍຢູ່ໃນກອງປະຊຸມສະຫຼຸບວຽກງານປ້ອງກັນຄວາມສະຫງົບ ປະຈຳປີ 2020 ທີ່ຈັດຂຶ້ນໃນວັນທີ 15 ທັນວານີ້.
ຄຽງຄູ່ກັນນັ້ນ ກໍມີຫລາຍຄະດີພົ້ນເດັ່ນອື່ນໆອີກເຊັ່ນ: ຄະດີຄາດຕະກໍາ, ປຸ້ນຈີ້ຊິງຊັບ, ລັກຊັບພົນລະເມືອງ, ບັນຫາອຸປະຕິເຫດເກີດຂຶ້ນທັງໝົດ 5.399 ເລື່ອງ, ມີຜູ້ເສຍຊີວິດ 824 ຄົນ ແຕ່ທຽບໃສ່ປີ 2019 ຫຼຸດລົງ 1.217 ເລື່ອງ, ຜູ້ເສຍຊີວິດຫຼຸດລົງ 310 ຄົນ, ສະເພາະນະຄອນຫຼວງວຽງຈັນມີອຸປະຕິເຫດເກີດຂຶ້ນ 913 ເລື່ອງ ແລະ ມີຜູ້ເສຍຊີວິດ 152 ຄົນ.
ໃນກອງປະຊຸມຍັງໄດ້ຍົກໃຫ້ເຫັນວ່າ: ໃນໄລຍະດຽວກັນທົ່ວປະເທດ ມີອັກຄີໄພເກີດຂຶ້ນທັງໝົດ 158 ຄັ້ງ, ທຽບໃສ່ປີ 2019 ຫຼຸດລົງ 119 ຄັ້ງ, ມີຜູ້ເສຍຊີວິດ 10 ຄົນ, ບາດເຈັບ 4 ຄົນ, ລວມມີມູນຄ່າເສຍຫາຍຫລາຍກວ່າ 130 ຕື້ກີບ. ສາເຫດສ່ວນໃຫຍ່ແມ່ນເກີດຈາກໄຟຟ້າລັດວົງຈອນມີ 73 ຄັ້ງ.
ຜູ້ລາຍງານຂ່າວໃຫ້ຮູ້ອີກວ່າ: ສຳລັບຄະດີຢາເສບຕິດ, ສາມາດກັກຜູ້ຖືກຫາໄດ້ 4.984 ຄົນ, ຍິງ 999 ຄົນ, ຄົນຕ່າງປະເທດ 177 ຄົນ, ຍິງ14 ຄົນ, ຢຶດຂອງກາງປະເພດເຮໂຣອິນຫລາຍກວ່າ 380 ກິໂລກຼາມ, ຢາບ້າ 1.617 ກິໂລກຼາມ, ຝິ່ນ 55,73 ກິໂລກຼາມ, ກັນຊາ 4.400 ກວ່າກິໂລກຼາມ, ຢາໄອສ໌ 3.476 ກິໂລກຼາມ, ລົດໃຫຍ່ 145 ຄັນ, ລົດຈັກ 715 ຄັນ, ເຮືອ 2 ລໍາ, ອາວຸດປືນ 92 ກະບອກ, ລູກປືນ 443 ລູກ, ໝາກແຕກ 2 ໜ່ວຍ ແລະ ເງິນ, ຄໍາອີກຈຳນວນຫຼາຍ.
