ຮອງນາຍົກລັດຖະມົນຕີລົງຢ້ຽມຢາມຈຸດກໍ່ສ້າງຂົວ ມິດຕະພາບລາວ-ໄທທີ່ແຂວງບໍລິຄຳໄຊ

ໃນວັນທີ 15 ທັນວານີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະ ການລົງທຶນ ພ້ອມການນຳແຂວງບໍລິຄຳໄຊ ໄດ້ລົງຢ້ຽມຢາມພື້ນທີ່ຈຸດທີ່ຈະກໍ່ສ້າງຂົວມິດຕະພາບ ລາວ-ໄທ ແຫ່ງທີ 5 ເຊື່ອມຕໍ່ລະຫວ່າງ ແຂວງບໍລິຄໍາໄຊ ແລະ ບຶງການ ປະເທດໄທ ເພື່ອຕິດຕາມຄວາມຄືບໜ້າຂອງການຈັດຕັ້ງປະຕິບັດວຽກງານຕ່າງໆ.

ຕາມການລາຍງານຂອງເຈົ້າໜ້າທີ່ທີ່ກ່ຽວຂ້ອງໃຫ້ຮູ້ວ່າ: ມາຮອດວັນທີ 30 ພະຈິກຜ່ານມານີ້ ໄດ້ສຳເລັດການເຊັນສັນຍາການກໍ່ສ້າງ ເຊິ່ງຂົວແຫ່ງນີ້ມີຄວາມຍາວທັງໝົດ 535 ແມັດ ຈະມີມູນຄ່າປະມານ 379 ລ້ານກວ່າບາດ ໂດຍຈະໃຊ້ເວລາໃນການກໍ່ສ້າງ 24 ເດືອນ ແລະ ຄາດວ່າຈະເລີ່ມລົງມືກໍ່ສ້າງໃນວັນທີ 1 ມັງກອນ 2021 ທີ່ຈະມາເຖິງນີ້ເປັນຕົ້ນໄປ ໂດຍແມ່ນຝ່າຍໄທເປັນຜູ້ຮັບເໝົາກໍ່ສ້າງ. ພ້ອມໄດ້ສຳເລັດສັນຍາກໍ່ສ້າງທາງເຂົ້າຂົວທີ່ມີຄວາມຍາວທັງໝົດ 2.860 ແມັດ ແລະ ອາຄານດ່ານ ໃນມູນຄ່າ 773 ລ້ານກວ່າບາດ ໂດຍຈະໃຊ້ເວລາໃນການກໍ່ສ້າງ 30 ເດືອນ ໂດຍແມ່ນ ບໍລິສັດໄທ ຮ່ວມກັບບໍລິສັດຂອງລາວເປັນຜູ້ຮັບເໝົາກໍ່ສ້າງ ເຊິ່ງປັດຈຸບັນໄດ້ເລີ່ມລົງມືບຸກເບີກສະຖານທີ່ກໍ່ສ້າງດັ່ງກ່າວແລ້ວ ແລະ  ກໍໄດ້ສຳເລັດການເຊັນສັນຍາຮັບຮອງເອົາບໍລິສັດທີ່ປຶກສາເຂົ້າຄຸ້ມຄອງການກໍ່ສ້າງໂຄງການດັ່ງກ່າວ ໂດຍແມ່ນບໍລິສັດຈາກປະເທດໄທ.