ໂຄງການປັບປຸງການຂົນສົ່ງໂດຍສານສາທາລະນະສຳເລັດແລ້ວເປັນສ່ວນຫລາຍ

ໄລຍະຜ່ານມາ, ຫລາຍທ່ານອາດພົບເຫັນບ່ອນລໍຖ້າຂຶ້ນ-ລົງລົດເມຂອງຜູ້ໂດຍສານຕາມຈຸດຕ່າງໆໃນນະຄອນຫລວງວຽງຈັນ ທີ່ໄດ້ຮັບການປັບປຸງ ແລະ ມີຄວາມສະອາດງາມຕາ, ຊຶ່ງແມ່ນໜຶ່ງໃນໂຄງການປັບປຸງການຂົນສົ່ງສາທາລະ ນະໃນນະຄອນຫລວງວຽງຈັນ ລະຫວ່າງ ລັດວິສາຫະກິດລົດເມ ແລະ ອົງການໄຈກາ ປະເທດຍີ່ປຸ່ນ, ໂດຍການສືບຕໍ່ຈັດຕັ້ງປະຕິບັດເປັນໄລຍະທີ 2, ຊຶ່ງປະ ກອບມີ: ການຕິດຕັ້ງເຄື່ອງນັບຜູ້ໂດຍ ສານຂຶ້ນ-ລົງໃສ່ລົດເມຈຳນວນ 42 ຄັນ, ປັບປຸງລະບົບການຄຸ້ມຄອງລັດວິສາຫະກິດລົດເມຄືນໃໝ່ ແລະ ກໍ່ສ້າງບ່ອນລໍຖ້າລົດເມຂອງຜູ້ໂດຍສານຕາມຈຸດຕ່າງໆໃນນະຄອນຫລວງວຽງຈັນໃຫ້ສະດວກສະບາຍຍິ່ງຂຶ້ນ ແລະ ມາຮອດປັດຈຸບັນ ເຫັນວ່າສຳເລັດໄປແລ້ວເປັນສ່ວນຫລາຍ, ຍັງພຽງຂອດການກວດກາຄວາມເປັນລະບຽບຮຽບຮ້ອຍຈາກ ກະຊວງໂຍທາທິການ ແລະ ຂົນສົ່ງ, ກ່ອນຈະເປີດນຳໃຊ້ຢ່າງເປັນທາງການໃນມໍ່ໆນີ້.

ເມື່ອໂຄງການນີ້ສຳເລັດ ຈະເຮັດໃຫ້ມວນຊົນ ກໍຄືປະຊາຊົນລາວ ຫັນມານຳໃຊ້ລົດເມສາທາລະນະຫລາຍຂຶ້ນ, ທັງເປັນການຫລຸດຜ່ອນການນຳໃຊ້ລົດສ່ວນຕົວ, ຫລີກລ່ຽງການຈະລາຈອນແອອັດ, ຫລຸດຜ່ອນການເກີດອຸປະຕິເຫດຮ້າຍແຮງ ແລະ ຍັງຫລຸດຜ່ອນການປ່ອຍມົນລະພິດອອກສູ່ອາກາດໜ້ອຍລົງນຳອີກ.