ລັດຖະມົນຕີກະຊວງສຶກສາໄດ້ຮັບຫລຽນກຽດຕິຍົດ ຈາກທູດຍີ່ປຸ່ນ

ພິທີປະດັບຫລຽນກຽດຕິຍົດທີ່ມີຊື່ວ່າ The Order of the Rising Sun, Gold and Silver Star, ຈາກລັດຖະບານຍີປຸ່ນ, ໃກ້ແກ່ທ່ານ ນາງ ແສງເດືອນ ຫລ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ, ປະທານສະມາຄົມ ມິດຕະພາບລາວ-ຍີ່ປຸ່ນ ໄດ້ມີຂຶ້ນໃນວັນທີ 30 ພະຈິກນີ້ ທີ່ບ້ານພັກເອກອັກຄະລາຊະທູດຍີ່ປຸ່ນ ໃນນະຄອນຫລວງວຽງຈັນ ໂດຍທ່ານ ທາເກວະກະ ເຄໂຊ, ເອກອັກຄະລາຊະທູດຍີ່ປຸ່ນ ປະຈໍາລາວ ໄດ້ຕາງຫນ້າລັດຖະບານໃຫ້ກຽດປະດັບຫລຽນໄຊດັ່ງກ່າວ, ເຊິ່ງມີ ທ່ານ ປອນເມກ ດາລາລອຍ ອະດີດປະທານສະມາຄົມມິດຕະພາບລາວ-ຍີ່ປຸ່ນ; ທ່ານ ເຄນທອງ ນວນທະສິງ, ຮອງປະທານຄະນະກໍາມາທິການຕ່າງປະເທດ ສະພາແຫ່ງຊາດ, ທັງເປັນປະທານຄະນະລັດຖະສະພາມິດຕະພາບລາວ-ຍີ່ປຸ່ນ.

ໃນໂອາດນີ້, ທ່ານທູດ ທາເກວະກະ ໄດ້ສະແດງຄວາມຊົມເຊີຍຕໍ່ທ່ານ ນາງ ແສງເດືອນ ທີ່ມີຜົນງານອັນໂດດເດັ່ນປະກອບສ່ວນເຂົ້າໃນການເສີມສ້າງສາຍພົວພັນມິດຕະພາບລະຫວ່າງຍີ່ປຸ່ນ ແລະ ສປປ ລາວ ມາເປັນເວລາຫລາຍປີ ແລະ ດ້ວຍການສະໜັບສະໜູນອັນເຂັ້ມແຂງຂອງ ທ່ານ ນາງ ແສງເດືອນ ໃນຂະແໜງການສຶກສາ, ພາສາຍີ່ປຸ່ນຈຶ່ງໄດ້ຖືກບັນຈຸເຂົ້າໃນຫລັກສູດການຮຽນຊັ້ນມັດທະຍົມໃນລາວເປັນຄັ້ງທໍາອິດໃນປີ 2015. ນອກຈາກນັ້ນ, ພາກວິຊາພາສາຍີ່ປຸ່ນ ຢູ່ມະຫາວິທະຍາໄລສະຫວັນນະເຂດ ກໍໄດ້ຖືກສ້າງຕັ້ງຂຶ້ນໃນປີ 2017 ແລະ ນັບແຕ່ນັ້ນມາ ຈໍານວນນັກສຶກສາລາວທີ່ຮຽນພາສາຍີ່ປຸ່ນ ແມ່ນນັບມື້ເພີ່ມຂຶ້ນເປັນຈຳນວນຫລາຍ.

ພ້ອມນີ້, ໃນຂົງເຂດກິລາ ທ່ານນາງ ແສງເດືອນ, ໃນຖານະປະທານຄະນະກໍາມະການໂອລິມປິກ ແລະ ພາຣາລິມປິກແຫ່ງຊາດລາວ, ໄດ້ປະກອບສ່ວນເຂົ້າໃນການສົ່ງເສີມງານມະຫະກໍາກິລາໂອລິມປິກໂຕກຽວດ້ວຍຄວາມຕັ້ງຫນ້າ, ພ້ອມສະໜັບສະໜູນການພັດທະນານັກກິລາລາວ ໂດຍຜ່ານການແລກປ່ຽນກັບບັນດາເມືອງເຈົ້າພາບຂອງຍີ່ປຸ່ນ. ຍິ່ງໄປກວ່ານັ້ນ, ໃນຖານະຂອງປະທານສະມາຄົມມິດຕະພາບລາວ-ຍີ່ປຸ່ນ, ທ່ານນາງ ແສງ ເດືອນ ກໍໄດ້ເຂົ້າຮ່ວມໃນຫລາຍໆກິດຈະກໍາຂອງທັງສອງປະເທດ, ພ້ອມທັງໃຫ້ການຮ່ວມມືຢ່າງຕໍ່ເນື່ອງກັບບັນດາຄູ່ຮ່ວມຕໍາແໜ່ງຂອງຍີ່ປຸ່ນຄື: ສະມາຄົມມິດຕະພາບຍີ່ປຸ່ນ-ລາວ ແລະ ສະມາຄົມມິດຕະພາບ ໄຊຕະມະ ແລະ ອື່ນໆອີກ.