ສປ ຈີນ ມອບເຄື່ອງກວດວິເຄາະຫາເຊື້ອພະຍາດໂຄວິດ-19 ໃຫ້ລາວ ມູນຄ່າ 381.000 ໂດລາສະຫະລັດ

ໃນວັນທີ 27 ພະຈິກນີ້, ທ່ານ ຊ້ຽງ ຟາງ ສຽງ ທູດທີ່ປຶກສາການເມືອງ, ເອກອັກຄະລັດຖະທູດຈີນ ປະຈຳລາວ ໄດ້ຕາງໜ້າລັດຖະບານຈີນມອບເຄື່ອງກວດວິເຄາະຫາເຊື້ອພະຍາດໂຄວິດ-19 ຈາກ ແຂວງ ຢູນານ ຂອງ ສປ ຈີນ ໃຫ້ກະຊວງສາທາລະນະສຸກ ຢູ່ທີ່ສູນວິເຄາະ ແລະ ລະບາດວິທະຍາ, ໂດຍຕາງໜ້າຮັບຂອງທ່ານ ຄຳພອນ ພຸດທະວົງ ຮອງລັດຖະມົນຕີກະຊວງສາທາລະນະສຸກ, ມີຫົວໜ້າກົມ, ຮອງຫົວໜ້າກົມ ຕາງໜ້າແພດຊ່ຽວຊານຈາກແຂວງຢູນານ ເຂົ້າຮ່ວມ. ເຄື່ອງທີ່ນຳມາມອບໃນຄັ້ງນີ້ລວມມີຊຸດກວດຫາເຊື້ອພະຍາດໂຄວິດ19, ຢາປົວພະຍາດ, ເຄື່ອງວັດແທກອຸນຫະພູມ, ຜ້າອັດປາກ, ຖົງມື ແລະ ເກີບສຳລັບແພດໝໍ, ອຸປະກອນການແພດທີ່ນຳໃຊ້ເຂົ້າການທົດລອງ ແລະ ເງິນຈຳນວນໜຶ່ງເພື່ອປັບປຸງຫ້ອງກວດວິເຄາະຫາເຊື້ອພະຍາດໂຄວິດ19 ລວມມູນຄ່າທັງໝົດ 381.000 ໂດລາສະຫະລັດ.

ໂອກາດນີ້, ທ່ານ ຮອງລັດຖະມົນຕີກະຊວງສາທາລະນະສຸກ ໃນນາມຕາງໜ້າໃຫ້ລັດຖະບານລາວກ່າວວ່າ: ມາຮອດປັດຈຸບັນຢູ່ລາວມີຜູ້ຕິດເຊື້ອໂຄວິດ-19 ຈຳນວນ 39 ຄົນ ແລະ ບໍ່ມີຜູ້ເສຍຊີວິດ, ທັງນັ້ນກໍຍ້ອນຄວາມເອົາໃຈໃສ່ຂອງການນຳພັກ-ລັດ ເຊິ່ງໄດ້ລົງໃກ້ຊິດຕິດແທດໃຫ້ການຊີ້ນຳແຕ່ລະຂັ້ນສູນກາງລົງຮອດທ້ອງຖິ່ນຢ່າງຈິງຈັງ. ພ້ອມນີ້ໃນຊ່ວງທີ່ມີການລະບາດກໍໄດ້ທີມງານຈາກ ສປ ຈີນ ເຂົ້າມາຊ່ວຍ ແລະ ແລກປ່ຽນບົດຮຽນດ້ານການປ້ອງກັນ ແລະ ຄວບຄຸມອີກດ້ວຍ.

ພ້ອມດຽວກັນນີ້, ກໍໍຂໍສະແດງຄວາມຂອບໃຈ ແລະ ຮູ້ບຸນຄຸນເປັນຢ່າງສູງຕໍ່ລັດຖະບານ ແລະ ປະຊາຊົນຈີນ ທີ່ໄດ້ສົ່ງທີມແພດຊ່ຽວຊານ ແລະອຸປະກອນການແພດຄວາມຈຳເປັນ ເພື່ອນຳໃຊ້ເຂົ້າໃນວຽກງານຕ້ານແລະສະກັດກັ້ນພະຍາດໂຄວິດ19ຢູ່ລາວ ພ້ອມທັງຕີລາຄາສູງຕໍ່ການຊ່ວຍເຫຼືອຂອງລັດຖະບານຈີນໃນຄັ້ງນີ້ ເຊີ່ງເປັນສີ່ງທີ່ຢັ້ງຢືນເຖິງຂີດໝາຍສາຍພົວພັນແບບເພື່ອນມິດຍຸດທະສາດ ລາວ-ຈີນ ທີ່ຍາມໃດກໍມີຄວາມເອື້ອເຟຶ້ອເພື່ອແຜ່ ມີຄວາມເປັນຫ່ວງເປັນໃຍປະຊາຊົນລາວ ສະແດງເຖິງການເປັນຄູ່ຮ່ວມຍຸດທະສາດທີ່ແທ້ຈິງ.