ນໍ້າໃຈວັນຊາດ ທີ 2 ທັນວາ ໝັ້ນຍືນ !!!
ໂດຍ: ທິດກໍ່າ
ວັນຊາດທີ 2 ທັນວາ ຄົບຮອບ 45 ປີ (2/12/1975-2/12/2020)ໄດ້ໝູນວຽນມາບັນຈົບຄົບຮອບອີກວາລະໜຶ່ງ. ການກຳເນີດເກີດຂຶ້ນຂອງວັນຊາດທີ 2 ທັນວາ 1975 ມັນເປັນຂີດໝາຍປະຫວັດສາດທີ່ບໍ່ເຄີຍມີມາໃນຫລາຍຍຸກຫລາຍສະໄໝຂອງຊາດລາວ ແລະ ປະຊາຊົນລາວບັນດາເຜົ່າເຮົາ ແລະ ອີກປະການໜຶ່ງ ມັນກໍບໍ່ໄດ້ມາໂດຍລຳພັງແບບງ່າຍໆເໝືອນດັ່ງປອກກ້ວຍ. ເວົ້າແຈ້ງມັນໄດ້ຈາກການຕໍ່ສູ້ທີ່ລະອິດລະອ້ຽວ ແລະ ລຳບາກຍາວນານ ທັງຜ່ານຜ່າອຸປະສັກຫຍຸ້ງຍາກນາໆປະການ, ຜ່ານຫລາຍເຊັ່ນຄົນ ແລະ ຫລາຍສະຕະວັດ. ຖ້າຈະຄິດໄລ່ມາແຕ່ກົກແຕ່ເຄົ້າແຫ່ງປະຫວັດສາດຂອງຊາດລາວທີ່ໄດ້ເລີ່ມເປັນຫົວເມືອງຂຶ້ນຂອງຕ່າງຊາດເປັນຕົ້ນມາ ກໍຕ້ອງໄລ່ມາແຕ່ຍຸກເຈົ້າອານຸວົງທີ່ບໍ່ຕ້ອງການເປັນເມືອງຂຶ້ນຂອງສະຫຍາມ ຈຶ່ງໄດ້ລຸກຂຶ້ນຕໍ່ສູ້. ອັນດັບຕໍ່ມາກໍແມ່ນໃນຍຸກການຕໍ່ສູ້ຂອງພໍ່ກະດວດ, ເຈົ້າຟ້າປັດໃຈ, ອົງແກ້ວ, ອົງກົມມະດຳ ຍ້ອນມີພວກລ່າເມືອງຂຶ້ນຝຣັ່ງເຂົ້າມາຮຸກຮານ ແລ້ວຍຶດເອົາສາມປະເທດອິນດູຈີນເປັນຫົວເມືອງຂຶ້ນ, ຂະບວນການຕໍ່ສູ້ໄດ້ແກ່ຍາວມາຮອດການນຳພາຂອງພັກກອມມູນິດອິນດູຈີນ ແລະ ການນຳພາຂອງພັກປະຊາຊົນປະຕິວັດລາວ ຈຶ່ງສາມາດປົດປ່ອຍປະເທດຊາດໄດ້ຢ່າງສົມບູນໃນປີ 1975.
ໃນວັນທີ 1-2 ທັນວາ 1975 ກອງປະຊຸມໃຫຍ່ຜູ້ແທນປະຊາຊົນທົ່ວປະເທດໄດ້ໄຂຂຶ້ນຢ່າງເປັນທາງການ ອັນເປັນຂີດໝາຍທາງດ້ານປະຫວັດສາດ ເຊິ່ງກອງປະຊຸມດັ່ງກ່າວໄດ້ປະກາດລຶບລ້າງການປົກຄອງເກົ່າ ຄືລະບອບລາຊາທິປະໄຕ ມາເປັນ ສາທາລະນະລັດ ປະຊາທິປະໄຕ ປະຊາຊົນລາວ, ລຶບລ້າງການນຳໃຊ້ທຸງກາຊ້າງສາມຫົວ ມາເປັນ ທຸງກາວົງເດືອນ, ປະກາດແຕ່ງຕັ້ງປະທານປະເທດ, ແຕ່ງຕັ້ງນາຍົກລັດຖະມົນຕີ ແລະ ໄດ້ກຳນົດເອົາວັນທີ 2 ທັນວາ ເປັນວັນຊາດຂອງ ສປປ ລາວ ຢ່າງສະຫງ່າຜ່າເຜີຍ. ນີ້ແມ່ນເຫດການທາງປະຫວັດສາດໜ້າໃໝ່ຂອງຊາດລາວ, ຄົນລາວທີ່ບໍ່ເຄີຍມີມາໃນຫລາຍຍຸກຫລາຍສະໄໝ ແລະ ຫລາຍເຊັ່ນຄົນ. ໝາກຜົນແຫ່ງປະຫວັດສາດດັ່ງກ່າວມານີ້ ມັນໄດ້ມາຈາກການຕໍ່ສູ້ທີ່ລະອິດລະອ້ຽວລຳບາກຍາວນານຂອງບັນພະບູລຸດ, ວິລະກະສັດ, ບັນດາຜູ້ນຳ ແລະ ປະຊາຊົນບັນດາເຜົ່າຜູ້ຮັກຊາດຮັກແຜ່ນດິນ. ເພາະສະນັ້ນ ວັນທີ 2 ທັນວາ ຈຶ່ງກາຍມາເປັນວັນຊາດ, ເປັນສັນຍາລັກຂອງລະບອບໃໝ່ແຫ່ງວັນປະຫວັດສາດຂອງຊາດໃນຍຸກໃໝ່ຈົນມາເຖິງທຸກວັນນີ້.
ຕະຫລອດໄລຍະ 45 ປີແຫ່ງການປົກປັກຮັກສາ ແລະ ສ້າງສາປະເທດຊາດໃນຍຸກໃໝ່ ເຮັດໃຫ້ ສາທາລະນະລັດ ປະຊາທິປະໄຕ ປະຊາຊົນລາວ ພວກເຮົາກ້າວເດີນໄປບົນເສັ້ນທາງອັກໜັກແໜ້ນ, ເຂັ້ມແຂງ ແລະ ກ້າວເດີນໄປຢ່າງບໍ່ຢຸດຢັ້ງ. ມາຮອດປັດຈຸບັນ, ປະເທດຊາດບ້ານເມືອງພວມໄດ້ຮັບການສ້າງສາ ແລະ ພັດທະນາໄປເລື້ອຍໆ ເຮັດໃຫ້ຖານະບົດບາດທາງດ້ານການເມືອງກໍມີສະຖຽນລະພາບໝັ້ນຄົງ, ໜັກແໜ້ນ, ເສດຖະກິດກໍມີການຂະຫຍາຍຕົວຢ່າງຕໍ່ເນື່ອງ ສັງຄົມ-ວັດທະນະທຳກໍນັບມື້ມີການປັບປຸງ ແລະ ກໍ່ສ້າງໃຫ້ມີຄວາມຈະເລີນຮຸ່ງເຮືອງຂຶ້ນນັບມື້.
ໃນໂອກາດວັນຊາດ ທີ 2 ທັນວາ ຄົບຮອບ 45 ປີທີ່ຈະມາເຖິງນີ້, ປວງຊົນລາວທົ່ວທັງປະເທດສຸດທີ່ມີຄວາມປິຕິຊົມຊື່ນ ເອກອ້າງທະນົງໃຈທີ່ເຫັນວ່າປະເທດຊາດບ້ານເມືອງຂອງຕົນນັບມື້ມີຄວາມຈະເລີນຮຸ່ງເຮືອງ, ປະຊາຊົນຍຸທ່າງສ້າງສາ ແລະ ພັດທະນາປະເທຊາດ ພາຍໃຕ້ການນຳພາຂອງພັກ ແລະ ລັດຖະບານ. ເພື່ອເຮັດໃຫ້ວັນຊາດ ທີ 2 ທັນວາປີນີ້ ມີຄວາມໝາຍອັນຍິ່ງໃຫຍ່ ພວກເຮົາຈະໄດ້ເຫັນຜົນງານ, ເຫັນຂະບວນການຫລາຍຢ່າງໃນພາລະກິດການສ້າງສາ ແລະ ພັດທະນາປະເທດຊາດ ເປັນຕົ້ນໂຄງການສ້າງຖະໜົນຫົນທາງ, ໂຄງການສ້າງທາງລົດໄຟຄວາມໄວສູງ ລາວ-ຈີນ, ໂຄງການສ້າງທາງດ່ວນນະຄອນຫລວງວຽງຈັນ-ວັງວຽງ, ໂຄງການກໍ່ສ້າງເຂື່ອນໄຟຟ້າ, ບັນດາໂຄງການກໍ່ສ້າງເສດຖະກິດພິເສດ, ເສດຖະກິດສະເພາະ ແລະ ບັນດາໂຄງການກໍ່ສ້າງພື້ນຖານໂຄງລ່າງອື່ນໆທີ່ຫລາກຫລາຍໃນທົ່ວປະເທດ.
ສຳລັບການເຄື່ອນໄຫວທາງດ້ານການເມືອງນັ້ນ, ປັດຈຸບັນກໍພວມຢູ່ໃນໄລຍະໂຄ້ງສຸດທ້າຍຂອງກອງປະຊຸມສາມຂັ້ນ ອັນເປັນເງື່ອນໄຂໃຫ້ແກ່ການກະກຽມຢ່າງຮອບດ້ານແກ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນ ປະຕິວັດລາວ ທີ່ຈະເປີດຂຶ້ນໃນມໍ່ໆນີ້. ສະເພາະບັນຍາກາດຢູ່ນະຄອນຫລວງວຽງຈັນເຮົາປີນີ້ ກ່ອນຮອດວັນຊາດທີ 2 ທັນວາ ກໍມີຫລາຍເຫດການ ແລະ ຂະບວນການອັນຄຶກຄື້ນ ເປັນຕົ້ນໄດ້ມີການແຂ່ງຂັນກິລາບານເຕະທົ່ວປະເທດທີ່ຫາກໍຈົບລົງດ້ວຍບັນຍາກາດອັນຟົດຟື້ນ. ນອກຈາກນັ້ນ ກໍພວມມີໂຄງການປະດັບປະດາບັນດາເສັ້ນທາງອັນສຳຄັນໃນນະຄອນຫລວງວຽງຈັນໃຫ້ມີສີສັນ ແລະ ມີສະເໜ່ຍິ່ງຂຶ້ນ. ສ່ວນບັນດາເຂດແຂວງ, ກົມກອງທ້ອງຖິ່ນອື່ນໆໃນທົ່ວປະເທດນັ້ນຕ່າງກໍມີຂະບວນການ, ມີຜົນງານຂອງຕົນໄວ້ຂໍ່ານັບຮັບຕ້ອນວັນຊາດປີນີ້ຢ່າງໃຫຍ່ຫລວງ, ຄຶກຄື້ນພໍສົມຄວນ. ໂອກາດວັນຊາດທີ 2 ທັນວາ ຄົບຮອບ 45 ປີທີ່ຈະມາເຖິງ ປວງຊົນລາວທັງຊາດຂໍສະແດງຄວາມຍິນດີຕ້ອນຮັບດ້ວຍຄວາມປິຕິຊົມຊື່ນ ແລະ ເອກອ້າງທະນົງໃຈເປັນຢ່າງຍິ່ງ.
