ກອງປະຊຸມຄັ້ງທີ 43 ຂອງຄະນະກຳມະການຮ່ວມມືທະວິພາຄີ ລາວ-ຫວຽດນາມ ປະຈຳປີ 2021 ຈະຈັດຂຶ້ນໃນຕົ້ນເດືອນທັນວານີ້
ຄະນະກຳມະການຮ່ວມມືລາວ-ຫວຽດນາມ ແລະ ຫວຽດນາມ-ລາວ ໄດ້ຈັດກອງປະຊຸມພົບປະຂຶ້ນໃນວັນທີ 20-21 ພະຈິກນີ້ ຢູ່ດ່ານຊາຍແດນນຳ້ພາວ ບໍລິຄຳໄຊ – ເກົາແຈວ ຮາຕິງ, ເພື່ອປຶກສາຫາລືບັນດາເນື້ອໃນເອກະສານຮັບໃຊ້ກອງປະຊຸມຄັ້ງທີ 43 ຂອງຄະນະກຳມະການຮ່ວມມືທະວິພາຄີ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ປະຈຳປີ 2021 ຄາດວ່າຈະຈັດຂຶ້ນໃນຕົ້ນເດືອນ ທັນວາ ທີ່ຈະມາເຖິງນີ້, ໂດຍການເຂົ້າຮ່ວມຂອງ ທ່ານ ຄຳເຜີຍ ແກ້ວກິນນາລີ, ຮອງປະທານຜູ້ປະຈຳການ ຄະນະກຳມະການຮ່ວມມື ລາວ-ຫວຽດນາມ ແລະ ທ່ານ ຫງວຽນ ວັນ ຈຸງ, ຮອງລັດຖະມົນຕີກະຊວງແຜນການ ແລະ ການລົງທຶນ, ຮອງປະທານຄະນະກໍາມະການຮ່ວມມື ຫວຽດນາມ-ລາວ.
ກອງປະຊຸມຄັ້ງນີ້ ສອງຝ່າຍໄດ້ຕີລາຄາສູງເຖິງໝາກຜົນຂອງການພົວພັນຮ່ວມມືໃນໜຶ່ງປີຜ່ານມາ ເຖິງແມ່ນເກີດມີການລະບາດຂອງພະຍາດໂຄວິດ-19 ໃນຕົ້ນປີນີ້ ແຕ່ສອງຝ່າຍກໍໍ່ບໍ່ໃຫ້ການແຜ່ລະບາດຂອງພະຍາດໂຄວິດ 19 ເປັນສິ່ງຂັດຂວາງການພົວພັນຮ່ວມມື ລະຫວ່າງສອງປະເທດ; ສອງຝ່າຍ ໄດ້ຮ່ວມກັນປັບປຸງຮ່າງເນື້ອໃນຍຸດທະສາດການຮ່ວມມືລາວ-ຫວຽດນາມ ໄລຍະ 10 ປີ (2021-2030), ສັນຍາຮ່ວມມື ໄລຍະ 5 ປີ (2021-2025) ພ້ອມທັງສະຫລຸບຕີລາຄາຄືນສະພາບການພົວພັນຮ່ວມມືລົງທຶນລາວ-ຫວຽດນາມ ປີ 2020 ແລະ ກຳນົດທິດທາງການຮ່ວມມືປະຈຳປີ 2021.
ຜົນສຳເລັດກອງປະຊຸມດັ່ງກ່າວ ສອງຝ່າຍໄດ້ເຊັນບົດບັນທຶກໃນການເຮັດວຽກ ເພື່ອເປັນເອກະພາບໃນການກະກຽມເນື້ອໃນໃຫ້ແກ່ກອງປະຊຸມຄັ້ງທີ 43 ປະຈຳປີ 2021 ຂອງຄະນະກຳມະການຮ່ວມມືທະວິພາຄີ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ຄາດວ່າຈະໄຂຂຶ້ນໃນຕົ້ນເດືອນ ທັນວາ ປີ 2020 ນີ້.
