ອິນໂດເນເຊຍ ກວດພົບນົກແກ້ວ 70 ກວ່າໂຕ ຖືກຍັດໃສ່ໃນຕຸກນ້ຳປລາສະຕິກ
ສຳນັກຂ່າວ AFP ລາຍງານວ່າ: ຕຳຫລວດຂອງອິນໂດເນເຊຍພົບນົກແກ້ວຫລາຍສິບໂຕຖືກຍັດລົງໄປໃນຕຸກນ້ຳປລາສະຕິກບໍລິເວນທ່າເຮືອພາກພື້ນປາປົວຂອງອິນໂດເນເຊຍ.
ລາຍງານລະບຸວ່າ: ຕຳຫລວດໃນເມືອງ Fakfak ຂອງອິນໂດເນເຊຍ ເປີດເຜີຍວ່າ: ລູກເຮືອຄົນໜຶ່ງແຈ້ງວ່າໄດ້ຍິນສຽງແປກໆມາຈາກກ່ອງໃບໃຫຍ່ ຈຶ່ງເຂົ້າກວດ ແລະ ພົບວ່າມີນົກແກ້ວພັນ Black-capped lories ຢູ່ໃນກ່ອງ ໂດຍນົກແກ້ວ 64 ໂຕຍັງມີຊີວິດຢູ່ ແລະ ອີກ 10 ໂຕຕາຍ. ເບື້ອງຕົ້ນຍັງບໍ່ມີການຈັບກຸມຜູ້ກະທຳຄວາມຜິດ ແລະ ຍັງບໍ່ຮູ້ແນ່ນອນວ່ານົກແກ້ວເຫລົ່ານີ້ຈະຖືກສົ່ງໄປປາຍທາງບ່ອນໃດ.
ສຳລັບປະເທດອິນໂດເນເຊຍ ເປັນຖິ່ນທີ່ຢູ່ອາໄສຂອງນົກທີ່ຖືກຄຸກຄາມຫລາຍກວ່າ 130 ຊະນິດ ແລະ ບ່ອນນີ້ຍັງມີການຄ້າສັດທີ່ຜິດກົດໝາຍຈຳນວນຫລາຍ ເຊິ່ງຈະເຫັນໄດ້ວ່ານົກຫລາກຫລາຍຊະນິດຖືກລັກລອບນຳໄປຈຳໜ່າຍຢູ່ຕະຫລາດໃຫຍ່ໆໃນເມືອງສຳຄັນຂອງອິນໂດເນເຊຍ ຫລື ຕ່າງປະເທດ.
ຂະນະທີ່ນົກຫາຍາກມັກຈະຖືກກຸ່ມລັກລອບຄ້າຂາຍສັດໄລ່ລ່າເພື່ອນຳໄປຈຳໜ່າຍເປັນສັດລ້ຽງ ແລະ ເປັນສັນຍາລັກສະຖານະທາງສັງຄົມ.
ນອກຈາກນີ້ ນົກບາງສາຍພັນເຊັ່ນ: ນົກກະຕົ້ວດໍາ ສາມາດນຳໄປຈຳໜ່າຍໃນຕະຫລາດມືດໄດ້ເຖິງ 3 ໝື່ນໂດລາສະຫະລັດ ແລະ ປີ 2017 ເຄີຍເກີດກໍລະນີຄ້າຍຄືກັນ ເຈົ້າໜ້າທີ່ຂອງອິນໂດເນເຊຍພົບນົກຫາຍາກ 125 ໂຕຖືກຈັບຍັດເຂົ້າໄປໃນທໍ່ລະບາຍນ້ຳ.
