ເປີດເສັ້ນທາງສາຍດ່ວນໄປແລ້ວ ຂໍຢ່າເປັນເສັ້ນທາງມໍລະນະ
ໂດຍ: ທິດກໍ່າ
ໄດ້ຍິນກະແສຂ່າວຢ່າງບໍ່ເປັນທາງການວ່າ: ການເປີດນຳໃຊ້ເສັ້ນທາງສາຍດ່ວນຈາກນະຄອນຫລວງວຽງຈັນຫາວັງວຽງຫຍັບໃກ້ເຂົ້າມາທຸກຂະນະ. ຄາດວ່າພິທີເປີດຢ່າງເປັນທາງການຈະໄດ້ຈັດຂຶ້ນໃນໂອກາດສະຫລອງວັນຊາດທີ 2 ທັນວາ 2020 ຄົບຮອບ 45 ປີທີ່ຈະມາເຖິງນີ້. ມາຮອດປັດຈຸບັນ, ໂຄງການກໍ່ສ້າງໄດ້ສຳເລັດເກືອບ 100% ແລ້ວ. ສ່ວນບັນດາວຽກທີ່ຄ້າງຄາບໍ່ທັນສຳເລັດນັ້ນ ກໍຍັງມີແຕ່ການກໍ່ສ້າງອາຄານສະຖານທີ່ຮ້ານຄ້າ, ຈຸດພັກເຊົາ, ຮ້ານບໍລິການສ້ອມແປງ ແລະ ບ່ອນແວ່ພັກເຊົາບ່ອນກິນລົມຊົມວິວຕາມອັດທະຍາໄສໃນລະຫວ່າງການເດີນທາງຈາກນະຄອນຫລວງວຽງຈັນຫາວັງວຽງ ແລະ ຈາກວັງວຽງມານະຄອນຫລວງວຽງຈັນເທົ່ານັ້ນ. ຈາກນັ້ນໄປ ກໍຖືວ່ານັບແຕ່ມື້ເປີດຢ່າງເປັນທາງການເປັນຕົ້ນໄປ ການເດີນທາງໄປມາລະຫວ່າງນະຄອນຫລວງວຽງຈັນຫາວັງວຽງກັບວັງວຽງຫານະຄອນຫລວງວຽງຈັນກໍຈະນັບມື້ມີຄວາມສະດວກສະບາຍຍິ່ງຂຶ້ນ ແລະ ທັງມີສອງເສັ້ນທາງໃຫ້ເລືອກຄື: ຖ້າຜູ້ໃດຕ້ອງການໄປທາງສາຍດ່ວນກໍໄປໄດ້ຕາມອັດທະຍາໃສ ແລະ ຜູ້ຢາໄປທາງເສັ້ນເກົ່າ 13 ເໜືອກໍໄປໄດ້ຕາມໃຈ ເພາະໃນປັດຈຸບັນເສັ້ນທາງ 13 ເໜືອຈາກນະຄອນຫລວງວຽງຈັນໄປຫາໂພນໂຮງ ແຂວງວຽງຈັນ ກໍພວມລົງມືບຸກເບີກຂະຫຍາຍເສັ້ນທາງໃຫ້ກວ້າງອອກ ແລະ ຈະເປັນທາງປູເບຕົງເສີມເຫລັກທີ່ໄດ້ມາດຕະຖານ. ສ່ວນຈາກໂພນໂຮງໄປຫາວັງວຽງກໍຈະມີການບຸກເບີກຂະຫຍາຍໃຫ້ກວ້າງອອກ ແລ້ວມີການປູຢາງໃຫ້ຮັບປະກັນໃນການໄປມາຢ່າງສະດວກສະບາຍຍິ່ງຂຶ້ນຕື່ມ.
ແຕ່ແນວໃດກໍຕາມ, ກ່ອນໄປຮອດວັນເວລາເປີດສາຍທາງດ່ວນຢ່າງເປັນທາງການ ທາງບໍລິສັດຜູ້ມອບເໝົາກໍ່ສ້າງກໍໄດ້ມີນະໂຍບາຍໃຫ້ແລ່ນໃນກໍລະນີພິເສດໃນບາງຊ່ວງ, ບາງຕອນທີ່ກໍ່ສ້າງສຳເລັດໄປແລ້ວ ເຊິ່ງເລີ່ມແຕ່ເດືອນຕຸລາຮອດຕົ້ນເດືອນພະຈິກ ເພື່ອອຳນວຍຄວາມສະດວກໃຫ້ເຈົ້າໜ້າທີ່ພະນັກງານ, ທະຫານ, ຕຳຫລວດ ແລະ ປະຊາຊົນທີ່ມີຄວາມຫຍຸ້ງຍາກໃນການໄປມາ ໂດຍສະເພາະແມ່ນຜູ້ທີ່ຖືກຜົນກະທົບກັບການກໍ່ສ້າງທາງດັ່ງກ່າວໂດຍກົງ. ຈາກສະພາບ ແລະ ເງື່ອນໄຂທີ່ກ່າວມານັ້ນ, ແຕ່ກໍອະນິຈາໃນຊ່ວງບໍ່ພໍເດືອນ ກໍໄດ້ມີອຸປະຕິເຫດເກີດຂຶ້ນເຖິງສອງສາມຄັ້ງ ເຮັດໃຫ້ມີຄົນເຈັບ, ຄົນເປັນ ແລະ ເສຍຊີວິດໄປເຖິງສອງສາມຄົນແລ້ວ. ເມື່ອເປັນດັ່ງສະພາບທີ່ວ່ານີ້ ກໍເລີຍມີການສັ່ງປິດຊົ່ວຄາວຈົນກວ່າຮອດມື້ເປີດ. ເມື່ອຕັ້ງໂຈດກັນວ່າ, ຖ້າຫາກເປີດທາງສາຍດ່ວນຢ່າງເປັນທາງການໄປແລ້ວ ບັນຫາອຸປະຕິເຫດໃນສາຍທາງນີ້ຈະມີອີກ ຫລື ບໍ່ ເພາະເສັ້ນທາງມັນໄດ້ມາດຕະຖານສາກົນ ທັງມີຊ່ອງຈະລາຈອນຂຶ້ນລ່ອງທາງໃຜທາງມັນຢູ່ແລ້ວ. ຄຳຕອບໂຈດກໍຄື ຖ້າບໍ່ມີສະຕິໃນການໄປມາ ທັງບໍ່ປະຕິບັດກົດລະບຽບຈະລາຈອນກໍອາດຈະເກີດຂຶ້ນແນ່ນອນ. ຄືຮູ້ນຳກັນແລ້ວວ່າ, ການໄປມານຳໃຊ້ລົດນຳໃຊ້ຖະໜົນຢູ່ປະເທດເຮົາໃນປະຫວັດສາດຫລາຍປີຜ່ານມາ, ໃຜກໍຕຳນິວິຈານການເກີດອຸປະຕິເຫດ ສ່ວນໜຶ່ງແມ່ນຍ້ອນເສັ້ນທາງບໍ່ດີ, ບໍ່ໄດ້ມາດຕະຖານ, ເປັນທາງແຄບ, ທາງລຸບທາງໂນນ, ທາງເປັນບວກຂຸມສາລະພັດຢ່າງ, ແຕ່ໃນເມື່ອມີເສັ້ນທາງດີ, ທາງງາມໄດ້ມາດຕະຖານແລ້ວ ພັດຍັງເກີດອຸປະຕິເຫດຢູ່ກໍສະແດງວ່າເປັນນຳຜູ້ຂັບຂີ່ນັ້ນເອງເປັນທີ່ຕັ້ງ.
ເວົ້າເຖິງອຸປະຕິເຫດຕາມທ້ອງຖະໜົນຢູ່ບ້ານເຮົາໃນຍຸກບ້ານເມືອງພວມມີການສ້າງສາພັດທະນາໃຫ້ມີຄວາມຈະເລີນຮຸ່ງເຮືອງ ບໍ່ວ່າຢູ່ບ້ານໃດ, ເມືອງໃດ, ແຂວງໃດ ແລະ ທ້ອງຖິ່ນໃດ ມັນມັກເກີດຂຶ້ນຍ້ອນຫລາຍສາເຫດທີ່ແຕກຕ່າງກັນ, ສະເລ່ຍແລ້ວແຕ່ລະປີແມ່ນຫລາຍພັນຄົນ, ຄິດວ່າຖ້າມີເສັ້ນທາງດີໄດ້ມາດຕະຖານ, ຊ່ອງຈະລາຈອນໄດ້ແຍກຢ່າງລະອຽດ ແລ້ວບັນຫາອຸປະຕິເຫດຈະບໍ່ເກີດຂຶ້ນອີກ ຫລື ຖ້າເກີດກໍແມ່ນໃຫ້ໜ້ອຍທີ່ສຸດ ນັ້ນຄືເປົ້າໝາຍ ແລະ ຍອດປາຖະໜາຂອງຄົນເຮົາທີ່ໃຜກໍຕ້ອງການຫລີກເວັ້ນຄວາມເຈັບເປັນລົ້ມຕາຍຍ້ອນອຸປະຕິເຫດ. ສະພາບຄົນເຈັບເປັນລົ້ມຕາຍຍ້ອນອຸປະຕິເຫດແມ່ນປາກົດການຫຍໍ້ທໍ້ອັນໜຶ່ງທີ່ພວກເຮົາຕ້ອງໄດ້ຮ່ວມກັນແກ້ໄຂຢ່າງເດັດຂາດຈິງຈັງ ມັນຈຶ່ງມີການຫລຸດຜ່ອນ ແລະ ໝົດໄປຈາກສັງຄົມລາວ. ການເກີດອຸປະຕິເຫດຜ່ານມາ ມັນກໍບໍ່ແມ່ນຍ້ອນຖະໜົນຫົນທາງບໍ່ໄດ້ມາດຕະຖານແຕ່ຢ່າງດຽວ, ຢູ່ຕາມເສັ້ນທາງທີ່ໄດ້ມາດຕະຖານກໍເກີດເໝືອນກັນ ຖ້າພວກເຮົາບໍ່ມີສະຕິ. ອັນສຳຄັນ ກ່ອນອື່ນໝົດໃນເວລາຂັບຂີ່ຕ້ອງພ້ອມກັນປະຕິບັດກົດຈະລາຈອນໃຫ້ເຂັ້ມງວດ, ຜູ້ຂັບຂີ່ຕ້ອງເປັນຫລັກໃນການນຳໃຊ້ລົດໃຊ້ຖະໜົນ ແລ້ວທຸກສິ່ງທຸກຢ່າງຈຶ່ງປອດໄພ.
ເຖິງຢ່າງໃດກໍດີ, ຈາກມື້ນີ້ໄປຮອດມື້ເປີດເສັ້ນທາງຢ່າງເປັນທາງການ ເສັ້ນທາງສາຍດ່ວນວຽງຈັນ-ວັງວຽງຈະເປັນສັນຍາລັກແຫ່ງຄວາມຈະເລີນກ້າວໜ້າຂອງຊາດ, ເປັນເສັ້ນທາງທີ່ສະດວກສະບາຍທີ່ບໍ່ທັນເຄີຍມີມາໃນປະຫວັດສາດຂອງຊາດ ແລະ ຂໍຢ່າໃຫ້ເປັນເສັ້ນທາງມໍລະນະ ຍ້ອນຜູ້ຂັບຂີ່ບໍ່ພາກັນປະຕິບັດກົດລະບຽບຈະລາຈອນ.
