8 ອາການຜິດປົກກະຕິ ສາເຫດຈາກຄວາມເຄັ່ງຄຽດ
ທຸກມື້ນີ້ຜູ້ຄົນໃນສັງຄົມໃຊ້ຊີວິດທ່າມກາງຄວາມກົດດັນຈາກສະພາບການດຳລົງຊີວິດ ຫລາຍຄົນເກີດຄວາມເຄັ່ງຄຽດຈົນເຮັດໃຫ້ຕ້ອງພະຍາຍາມຫາທາງອອກໃຫ້ກັບຕົນເອງໃນຮູບແບບແຕກຕ່າງກັນໄປ ທັງຫລິ້ນກິລາ, ເຂົ້າກຸ່ມໝູ່ເພື່ອສັງສັນ, ຫາກິດຈະກຳຍາມວ່າງເຮັດ ໄປຈົນເຖິງການເດີນທາງທ່ອງທ່ຽວ, ແຕ່ກໍຍັງມີອີກຫລາຍຄົນບໍ່ຮູ້ວ່າຕົນເອງເຄັ່ງຄຽດ ກ່ວາຈະຮູ້ໂຕອີກເທື່ອ ຄວາມເຄັ່ງຄຽດນັ້ນກໍສົ່ງຜົນຕໍ່ຮ່າງກາຍ.
ເປັນຫຍັງຄວາມເຄັ່ງຄຽດຈຶ່ງສົ່ງຜົນຕໍ່ຮ່າງກາຍ ? ຄຳຕອບກໍຄື :: ເມື່ອຮ່າງກາຍຂອງທ່ານຕ້ອງຕໍ່ສູ້ກັບຄວາມຮັບຜິດຊອບທີ່ໜັກໜ່ວງ ຫລື ມີເລື່ອງລາວໃນຊີວິດທີ່ເກີດການປ່ຽນແປງ, ຫົວໃຈຂອງທ່ານຈະເຕັ້ນໄວຂຶ້ນ, ຮໍໂມນຄໍຕິໂຊລຈະຫລັ່ງຫລາຍຂຶ້ນ ເພື່ອຕອບສະໜອງຕໍ່ຄວາມເຄັ່ງຄຽດ ໂດຍຄໍຕິໂຊລ ຈະຊ່ວຍເພີ່ມລະດັບນຳ້ຕານໃນເລືອດ, ກະຕຸ້ນການຟອກເລືອດ ເຮັດໃຫ້ເລືອດ ແລະ ສານອາຫານໄປລ້ຽງສະໝອງໄດ້ດີຂຶ້ນ ສະໝອງ ແລະ ຮ່າງກາຍເຮົາຈຶ່ງຢູ່ໃນສະພາບຕື່ນໂຕ. ລັກສະນະດັ່ງກ່າວບໍ່ໄດ້ເຮັດໃຫ້ສຸຂະພາບຂອງທ່ານອ່ອນແອລົງ ຖ້າທ່ານສາມາດເຮັດໃຫ້ຄວາມຮູ້ສຶກເຄັ່ງຄຽດຂອງທ່ານຜ່ອນຄາຍລົງ ແລະ ຮັບມືກັບບັນຫາດ້ວຍຄວາມໝັ້ນໃຈ, ແຕ່ຖ້າເຮັດບໍ່ໄດ້ ຄວາມເຄັ່ງຄຽດ ແລະ ອາການຕອບສະໜອງຂອງຮ່າງກາຍໃນຂ້າງເທິງຈະສົ່ງຜົນຕໍ່ສຸຂະພາບ ແລະ ກາຍເປັນອາການທີ່ຈະປະກົດກັບຮ່າງກາຍຂອງທ່ານທັນທີ ສ່ວນຈະມີຫຍັງແດ່ນັ້ນມາເບິ່ງກັນເລີຍ :
- ເຈັບຫົວຢ່າງໜັກ ຫລື ເຈັບຫົວຕະຫລອດ ເພາະຄວາມເຄັ່ງຄຽດທີ່ສະສົມມາເປັນໄລຍະເວລາດົນນານ.
- ເພີ່ມໂອກາດທີ່ຈະເຮັດໃຫ້ທ່ານມີອາການຈິດຕົກ ແລະ ລຸກລາມໄປຈົນເຖິງອາການຂອງພະຍາດຊຶມເສົ້າ.
- ມີອາການກົດໄຫລຍ້ອນ, ກົດໃນກະເພາະອາຫານມີຫລາຍຂຶ້ນ, ອາການເຫລົ່ານີ້ສ່ວນຫລາຍມາຈາກຄວາມເຄັ່ງຄຽດ.
- ນອນບໍ່ຫລັບ ເພາະຄວາມເຄັ່ງຄຽດເຮັດໃຫ້ທ່ານຄິດຫລາຍ ແລະ ຍາກທີ່ຈະຂົ່ມຕານອນໄດ້.
- ພູມຕ້ານທານຮ່າງກາຍອ່ອນແອ ເຮັດໃຫ້ທ່ານປ່ວຍງ່າຍ, ເປັນຫວັດ ຫລື ແພ້ອາກາດໝົດປີ.
- ລະບົບຍ່ອຍອາຫານເຮັດວຽກຜິດປົກກະຕິ ແລະ ເຮັດໃຫ້ທ່ານເຈັບທ້ອງ, ຈຸກ, ແໜ້ນຢູ່ຕະຫລອດ ເພາະຄວາມເຄັ່ງຄຽດທີ່ແຝງຢູ່.
- ມີບັນຫາກັບສຸຂະພາບທາງເພດ ຫລື ສະມັດຕະພາບທາງເພດເສື່ອມລົງ.
- ມີອາການປວດເມື່ອຍກ້າມຊີ້ນໂດຍບໍ່ຮູ້ສາເຫດ ອັນເນື່ອງມາຈາກຄວາມເຄັ່ງຄຽດຂອງກ້າມຊີ້ນ.
- ຖ້າທ່ານຕ້ອງພົບກັບຄວາມເຄັ່ງຄຽດແລ້ວສົ່ງຜົນກະທົບຕໍ່ຮ່າງກາຍດັ່ງໃນຂ້າງເທິງທີ່ກ່າວມາ ທ່ານຄວນຫາວິທີການແກ້ໄຂ ຫລື ປຶກສາແພດຜູ້ຊ່ຽວຊານໃນການຫລຸດຄວາມເຄັ່ງຄຽດຂອງຕົນເອງ ບໍ່ດັ່ງນັ້ນແລ້ວ ຖ້າສົ່ງຜົນຕໍ່ສຸຂະພາບໃນໄລຍະຍາວ ອາການທີ່ເກີດອາດບໍ່ນ້ອຍ ແລະ ເຮັດໃຫ້ເກີດພະຍາດຊະນິດທີ່ທ່ານເອງກໍຄາດບໍ່ເຖິງຄືກັນ.
