ທ່ານ ບໍຣິສ ຈອນສັນ ກັກຕົວຫລັງສຳຜັດໃກ້ຊິດຜູ້ຕິດເຊື້ອ ຂະນະທີ່ສະຫະຣາຊະອານາຈັກກຽມປະກາດນະໂຍບາຍດ້ານໂຄວິດ-19 ທີ່ສຳຄັນໃນອາທິດນີ້
ທ່ານ ບໍຣິສ ຈອນສັນ ນາຍົກລັດຖະມົນຕີສະຫະຣາຊະອານາຈັກ ເລີ່ມກັກຕົວເພື່ອເຝົ້າລະວັງໂຄວິດ-19 ຫລັງພົບປະກັບໜຶ່ງໃນສະມາຊິກລັດຖະສະພາ ເຊິ່ງກວດພົບເຊື້ອໄວຣັສ. ເຖິງຢ່າງໃດກໍຕາມ, ທ່ານຢືນຢັນວ່າ: ຕອນນີ້ທ່ານຍັງຮູ້ສຶກສະບາຍດີ.
ໃນວິດີໂອທີ່ເຜີຍແຜ່ຕໍ່ສາທາລະນະ, ທ່ານ ຈອນສັນ ຍັງຂໍການຮ່ວມມືໃຫ້ຄົນອື່ນໆປະຕິບັດຕາມກົດ ແລະ ກັກຕົນເອງ ເພື່ອປ້ອງກັນ ຖ້າສຳຜັດໃກ້ຊິດກັບຜູ້ຕິດເຊື້ອ.
ທັງນີ້ໃນວັນທີ 12 ພະຈິກຜ່ານມາ, ທ່ານ ຈອນສັນ ໄດ້ພົບປະເຈລະຈາກັບທ່ານ ລີ ແອນເດິສັນ ສະມາຊິກລັດຖະສະພາຈາກພັກຄອນເຊີເວທີບ ປະມານ 35 ນາທີ ເຊິ່ງມື້ຕໍ່ມາທ່ານ ແອນເດິສັນ ເລີ່ມສະແດງອາການ ແລະ ເຂົ້າຮັບການກວດເຊື້ອ ເຊິ່ງຜົນອອກມາເປັນບວກ.
ການກັກຕົນເອງຂອງນາຍົກລັດຖະມົນຕີມີຂຶ້ນໃນໄລຍະທີ່ລັດຖະບານກຽມປະກາດນະໂຍບາຍໃໝ່ໆ ເພື່ອຄວບຄຸມການລະບາດ ຫລັງເກີດກໍລະນີຮືຮາໃນລັດຖະບານກ່ຽວກັບການຝ່າຝືນມາດຕະການລັອກດາວ ເພື່ອປ້ອງກັນພະຍາດລະບາດຂອງທ່ານ ໂດມິນິກ ຄຳມິງ ທີ່ປຶກສາຂອງທ່ານ ຈອນສັນ ເຊິ່ງສົ່ງຜົນໃຫ້ທ່ານຕ້ອງກ້າວລົງຈາກຕຳແໜ່ງໃນອາທິດຜ່ານມາ.
ທຳນຽບນາຍົກລັດຖະມົນຕີວ່າ: ໃນອາທິດນີ້ຈະມີການປະກາດນະໂຍບາຍສຳຄັນ ເຊິ່ງໃຫ້ລາຍລະອຽດກ່ຽວກັບແຜນຟື້ນຟູສະຫະຣາຊະອານາຈັກ ລວມທັງມາດຕະການແກ້ໄຂວິກິດໂຄວິດ-19.
ໂດຍທ່ານ ຈອນສັນ ມີກຳນົດຈະປະຊຸມແຜນຮັບມືໂຄວິດ-19 ທີ່ສຳຄັນ ແລະ ກຽມເຮັດວຽກຮ່ວມກັບທ່ານ ຣິຊິ ຊູນັກ ລັດຖະມົນຕີວ່າການກະຊວງການເງິນ ເພື່ອທົບທວນງົບປະມານເສດຖະກິດ ແລະ ຊ່ວຍເຫລືອຜູ້ໄດ້ຮັບຜົນກະທົບ ໂດຍມີເປົ້າໝາຍເພື່ອປະຕິບັດຕາມຄຳໝັ້ນສັນຍາວ່າຈະສ້າງປະເທດໃຫ້ກັບມາດີກວ່າເກົ່າ.
