ຜູ້ຄິດຄົ້ນວັກຊີນເຜີຍ ໂລກຈະກັບສູ່ສະພາບປົກກະຕິທ້າຍປີໜ້າ
ໜຶ່ງໃນຜູ້ຄິດຄົ້ນວັກຊີນປ້ອງກັນໄວຣັສໂຄໂຣນາ ກ່າວວ່າ: ຖ້າທຸກຢ່າງເປັນໄປຕາມແຜນທີ່ຄາດຄະເນໄວ້, ວິຖີຊີວິດຂອງປະຊາຊົນສ່ວນຫລາຍຈະກັບສູ່ສະພາບປົກກະຕິໃນລະດູໜາວປີໜ້າ ຫລື ປະມານເດືອນທັນວາ 2021 ຫລັງຈາກທີ່ມີວັກຊີນພ້ອມນຳໃຊ້ແລ້ວ ແລະ ຖ້າວັກຊີນປະສົບຜົນສຳເລັດຈະເລີ່ມເຫັນຜົນໃນໄລຍະລະດູຮ້ອນປີໜ້າ.
ທ່ານ ອູກູ ຊາຮິນ ຜູ້ຮ່ວມສ້າງຕັ້ງໄບໂອເອັນເທັກ ເຊື່ອວ່າ: ວັກຊີນຂອງທ່ານຈະສາມາດຫລຸດຈຳນວນຜູ້ຕິດເຊື້ອໄດ້ຈໍານວນຫລາຍ ຫລັງຈາກການທົດລອງກັບອາສາສະໝັກ 43.000 ຄົນ ພົບວ່າມີອັດຕາຜົນສຳເລັດຢ່າງໜ້ອຍ 90%.
ເຖິງຢ່າງໃດກໍຕາມ, ການແຈກຢາຍວັກຊີນທີ່ບໍ່ທົ່ວເຖິງອາດເຮັດໃຫ້ຜົນລັບໃນການປິ່ນປົວຊັກຊ້າກວ່າທີ່ຫລາຍຄົນຄາດຫວັງ ໂດຍທ່ານ ຊາຮິນ ກ່າວວ່າ: ປະສິດທິພາບຂອງວັກຊີນຈະບໍ່ສາມາດສັງເກດເຫັນໄດ້ຈົນກວ່າຈະມີການຈຳໜ່າຍວັກຊີນໄດ້ເຖິງຮ້ອຍລ້ານໂດສ.
ປັດຈຸບັນ ສະຫະຣາຊະອານາຈັກໄດ້ສັ່ງຊື້ວັກຊີນຈາກໄຟເຊີແລ້ວ 40 ລ້ານໂດສ ແລະ ສະຫະພາບເອີຣົບຕົກລົງຈະສັ່ງຊື້ວັກຊີນ 300 ລ້ານໂດສ ລວມທັງອາເມລິກາຕົກລົງຈະສັ່ງຊື້ເຖິງ 600 ລ້ານໂດສ.
ທັງນີ້, ທ່ານ ຈອນ ເບລ ສາສະດາຈານດ້ານຢາ ຈາກມະຫາວິທະຍາໄລອອກຟອດ ບໍ່ເຫັນພ້ອມກັບທ່ານ ຊາຮິນ ໂດຍເບິ່ງວ່າ: ວິຖີຊີວິດຂອງປະຊາຊົນຈະກັບມາເປັນປົກກະຕິໄດ້ໄວກວ່ານັ້ນ ຄືໃນໄລຍະເດືອນມີນາ 2021.
