ນາງ ອອງຊານ ຊູຈີ ແລະ ພັກ NLD ຄວ້າໄຊເລືອກຕັ້ງ ບໍລິຫານມຽນມາຕໍ່ອີກຢ່າງໜ້ອຍ 5 ປີ
ຄະນະກຳມະການການເລືອກຕັ້ງມຽນມາເປີດເຜີຍວ່າ: ພັກສັນນິບາດແຫ່ງຊາດເພື່ອປະຊາທິປະໄຕ (NLD) ທີ່ນຳໂດຍນາງ ອອງຊານ ຊູຈີ ຊະນະການເລືອກຕັ້ງຢ່າງຫລວງຫລາຍ ນັ່ງຕັ່ງບໍລິຫານມຽນມາຕໍ່ອີກຢ່າງໜ້ອຍ 5 ປີ, ເຖິງວ່າຜົນການນັບຄະແນນຈະຍັງບໍ່ສຳເລັດສົມບູນກໍຕາມ, ແຕ່ພັກ NLD ສາມາດຄວ້າບ່ອນນັ່ງໃນສະພາໄປໄດ້ແລ້ວຢ່າງໜ້ອຍ 346 ບ່ອນນັ່ງ ຫລື ເກືອບ 80% ຂອງບ່ອນນັ່ງໃນສະພາຜູ້ແທນລາຊະດອນ.
ຖືເປັນໄຊຊະນະຄັ້ງສຳຄັນຄັ້ງທີ 2 ທີ່ມຽນມາຈະຈັດຕັ້ງລັດຖະບານພົນລະເຮືອນ ພາຍຫລັງລະບອບທະຫານປົກຄອງມຽນມາມາຍາວນານກວ່າ 50 ປີ ໂດຍລັດຖະສະພາຈະຈັດປະຊຸມເພື່ອຕັດສິນໃຈກ່ຽວກັບຜູ້ຈະຂຶ້ນມານັ່ງຕັ່ງປະທານາທິບໍດີໃນຕົ້ນປີໜ້າ ເຊິ່ງນາງ ອອງຊານ ຊູຈີ ຈະຍັງມີບົດບາດສຳຄັນຄືເກົ່າໃນການຂັບເຄື່ອນປະເທດ, ເຖິງວ່າລັດຖະທຳມະນູນຈະມີຂໍ້ຈຳກັດບາງປະການທີ່ເຮັດໃຫ້ນາງບໍ່ສາມາດນັ່ງຕັ່ງປະທານາທິບໍດີເອງໄດ້, ຄາດວ່ານາງຈະນັ່ງຕັ່ງທີ່ປຶກສາປະເທດ (State Counsellor) ຕໍ່ໄປ.
ໄລຍະ 5 ປີຜ່ານມາ, ລັດຖະບານມຽນມາພາຍໃຕ້ການນຳພາຂອງນາງ ອອງຊານ ຊູຈີ ໃນຖານະທີ່ປຶກສາປະເທດ ແລະ ລັດຖະມົນຕີຕ່າງປະເທດມຽນມາ ຜະເຊີນກັບການຕັ້ງຄຳຖາມເລື່ອງບັນຫາສິດທິມະນຸດຈາກກໍລະນີການຂ້າລ້າງເຜົ່າພັນຊາວໂຣຮິນຈາ ຈົນເກີດເປັນວິກິດດ້ານການໃຫ້ການຊ່ວຍເຫລືອດ້ານມະນຸດສະທຳຄັ້ງໃຫຍ່ ລວມທັງຄວາມຂັດແຍ່ງທາງເຊື້ອຊາດພາຍໃນປະເທດ ແລະ ສະຖານະການການແຜ່ລະບາດຂອງໂຄວິດ-19 ທີ່ອາດຈະຮຸນແຮງຂຶ້ນໄດ້ທຸກເວລາ ຍັງມີພາລະກິດອີກຈຳນວນຫລາຍລໍຖ້າໃຫ້ລັດຖະບານມຽນມາເລັ່ງແກ້ໄຂ.
