ສ.ເກົາຫລີ ປັບໄໝຄົນບໍ່ໃສ່ຜ້າປິດປາກ-ດັງຢູ່ບ່ອນສາທາລະນະ
ທາງການ ສ.ເກົາຫລີ ປະກາດປັບໄໝພົນລະເມືອງທີ່ບໍ່ໃສ່ຜ້າປິດປາກ-ດັງຢູ່ບ່ອນສາທາລະນະ ເນື່ອງຈາກຕົວເລກຜູ້ຕິດເຊື້ອໄວຣັສໂຄໂຣນາ 2019 ຫລື ໂຄວິດ-19 ມີທ່າອ່ຽງເພີ່ມສູງຂຶ້ນ.
ທາງການ ສ.ເກົາຫລີ ປະກາດວ່າ: ຖ້າພົນລະເມືອງຄົນໃດບໍ່ໃສ່ຜ້າປິດປາກ-ດັງຢູ່ບ່ອນສາທາລະນະ ລວມທັງຮ້ານບັນເທີງ, ຮ້ານສັບພະສິນຄ້າ, ສວນເຄື່ອງຫລິ້ນ ແລະ ຮ້ານຕັດຜົມ ຈະຕ້ອງຖືກປັບໄໝ 1 ແສນກວ່າວອນ, ສ່ວນຜູ້ປະກອບການທຸລະກິດຈະຖືກປັບໄໝ 3 ລ້ານກວ່າວອນ. ການໃຊ້ນະໂຍບາຍທີ່ເຂັ້ມງວດມີຂຶ້ນຫລັງຈາກທາງການ ສ.ເກົາຫລີ ອອກຄຳສັ່ງບັງຄັບພົນລະເມືອງໃຫ້ໃສ່ຜ້າປິດປາກ-ດັງຢູ່ສະຖານທີ່ອີກ 23 ແຫ່ງເຊັ່ນ: ສະປາ, ຫ້ອງຈັດງານແຕ່ງດອງ ແລະ ຫ້າງສັບພະສິນຄ້າ. ທາງການສາທາລະນະສຸກ ສ.ເກົາຫລີ ລາຍງານໃນວັນທີ 13 ພະຈິກວ່າ: ມີຜູ້ຕິດເຊື້ອໃໝ່ 191 ຄົນ ໃນຈຳນວນນີ້ ມີຜູ້ຕິດເຊື້ອໃນປະເທດ 162 ຄົນ ແລະ ກວ່າ 50% ເປັນຜູ້ຕິດເຊື້ອໃນຮອບ 2 ອາທິດຜ່ານມາ ຢູ່ນະຄອນຫລວງເຊອຸນ ແລະ ພື້ນທີ່ໃກ້ຄຽງ. ຂະນະທີ່ສູນຄວບຄຸມ ແລະ ປ້ອງກັນພະຍາດຂອງ ສ.ເກົາຫລີ ຫລື KCDC ເປີດເຜີຍວ່າ: ສ.ເກົາຫລີ ມີຜູ້ຕິດເຊື້ອສະສົມ 28.133 ຄົນ ແລະ ມີຜູ້ເສຍຊີວິດ 488 ຄົນ.
ກ່ອນໜ້ານີ້, ສ.ເກົາຫລີ ສາມາດຄວບຄຸມການລະບາດຂອງພະຍາດໂຄວິດ-19 ໄດ້ດີຈາກການກວດຫາເຊື້ອໄວຣັສໂຄໂຣນາໃນປະຊາຊົນ ແລະ ການຕິດຕາມຜູ້ສຳຜັດຢ່າງວ່ອງໄວ, ແຕ່ພັດຜະເຊີນບັນຫາໃນການຄວບຄຸມການແຜ່ລະບາດເປັນກຸ່ມກ້ອນນ້ອຍໆ ໂດຍມີຜູ້ຕິດເຊື້ອແຕ່ລະວັນເພີ່ມຂຶ້ນເປັນຫລັກຮ້ອຍໃນໄລຍະບໍ່ເທົ່າໃດອາທິດຜ່ານມາ.
