ກອງປະຊຸມສຸດຍອດ ອາຊຽນ-ຈີນ ຄັ້ງທີ 23
ກອງປະຊຸມສຸດຍອດອາຊຽນ-ຈີນ ຄັ້ງທີ 23 ໄດ້ຈັດຂຶ້ນໃນລະຫວ່າງກອງປະຊຸມສຸດຍອດອາຊຽນ ຄັ້ງທີ 37 ແບບທາງໄກ ທີ່ ສສ ຫວຽດນາມ ເປັນເຈົ້າພາບ ໂດຍຜູ້ນໍາອາຊຽນ ແລະ ສປ ຈີນ ໄດ້ຕີລາຄາສູງຕໍ່ໝາກຜົນຂອງການຮ່ວມມື ອາຊຽນ-ຈີນ ໃນໄລຍະຜ່ານມາ ແລະ ໄດ້ປະກອບສ່ວນສໍາຄັນເຂົ້າໃນການສ້າງສັນຕິພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາຢູ່ພາກພື້ນ ກໍຄືໃນໂລກ. ທັງສອງຝ່າຍຢືນຢັນຄືນຄວາມໝາຍໜັ້ນທີ່ຈະສືບຕໍ່ຮ່ວມມືກັນໃນຕໍ່ໜ້າ ໂດຍໄດ້ຮັບຮອງເອົາແຜນປະຕິບັດງານອາຊຽນ-ຈີນ ສະບັບໃໝ່ ປີ 2021-2025 ທີ່ໄດ້ກວມເອົາທັງ 3 ເສົ້າຄໍ້າຂອງການສ້າງປະຊາຄົມອາຊຽນ ຮອດປີ 2025 ຄື: ການເມືອງ-ຄວາມໝັ້ນຄົງ, ເສດຖະກິດ ແລະ ວັດທະນະທຳ-ສັງຄົມ.
ກອງປະຊຸມໄດ້ສະແດງຄວາມພໍໃຈຕໍ່ມາດຕະການໃນການຮັບມື ແລະ ແກ້ໄຂການແຜ່ລະ ບາດຂອງພະຍາດໂຄວິດ-19 ທັງຢູ່ອາຊຽນ ແລະ ຢູ່ ສປ.ຈີນ ແລະ ໄດ້ຂອບໃຈຕໍ່ການຊ່ວຍເຫລືອຂອງຈີນໃນການຕ້ານການແຜ່ລະບາດຂອງພະຍາດດັ່ງກ່າວ ໂດຍສະເພາະການປະກອບສ່ວນງົບ ປະມານໃຫ້ແກ່ກອງທຶນອາຊຽນຕ້ານໂຄວິດ-19 ຈຳນວນ 1 ລ້ານໂດລາ ແລະ 5 ລ້ານໂດລາ ເພື່ອສະໜັບສະໜູນໂຄງການຮ່ວມມືດ້ານສາທາລະນະສຸກ ອາຊຽນ-ຈີນ.
ກອງປະຊຸມຍັງໄດ້ສະແດງຄວາມຍິນດີຕໍ່ຄວາມຄືບໜ້າຂອງຈັດຕັ້ງປະຕິບັດຖະແຫລງການອາຊຽນ-ຈີນ ວ່າດ້ວຍການເຊື່ອມສານ ລະຫວ່າງ ແຜນແມ່ບົດການເຊື່ອມຈອດອາຊຽນ 2025 ແລະ ຂໍ້ລິເລີ່ມໜຶ່ງແລວ, ໜຶ່ງເສັ້ນທາງ (BRI) ທີ່ໄດ້ຮັບຮອງໃນປີ 2019 ຜ່ານມາ ເຊິ່ງເປັນການປະກອບສ່ວນອັນສໍາຄັນເຂົ້າໃນການສົ່ງເສີມການຄ້າ, ການລົງທຶນ ແລະ ການທ່ອງທ່ຽວໃນພາກພື້ນ ແລະ ສາກົນ ໃນນີ້ ສປປ ລາວ ໄດ້ແຈ້ງໃຫ້ທີ່ປະຊຸມຊາບຄວາມຄືບໜ້າຂອງໂຄງການລົດໄຟຄວາມໄວສູງ ລາວ-ຈີນ ເຊິ່ງແມ່ນສ່ວນໜຶ່ງຂອງໂຄງການເຊື່ອມຈອດທາງລົດໄຟອາຊຽນ-ສິງກະໂປ-ຄຸນມິງ ໄດ້ມີຄວາມຄືບໜ້າຫລາຍ ແລະ ຄາດວ່າຈະສຳເລັດພາຍໃນປີ 2021 ຕາມແຜນການ.
ສຳລັບທິດທາງຕໍ່ໜ້າ, ສປປ ລາວ ໄດ້ສະເໜີໃຫ້ ສປ.ຈີນ ສືບຕໍ່ຊ່ວຍສ້າງຂີດຄວາມສາມາດດ້ານເສດຖະກິດດີຈີຕອນ ໂດຍການຖ່າຍທອດ ແລະ ແລກປ່ຽນດ້ານເຕັກໂນໂລຊີ ແລະ ນະວັດຕະກຳ ໃນຂົງເຂດການເງິນ, ການທະນາຄານ ແລະ ການສ້າງຄວາມເຂັ້ມແຂງໃຫ້ແກ່ຈຸລະວິສາຫະກິດ ແລະ ວິສາຫະກິດຂະໜາດນ້ອຍ-ຂະໜາດກາງ (MSMEs) ເພື່ອຫັນໄປສູ່ເສດຖະກິດດີຈີຕອນ ແລະ ການຄ້າອີເລັກໂຕຣນິກເທື່ອລະກ້າວ.
