ວັກຊີນໂຄວິດ ໃຜຜະລິດໄດ້ກ່ອນຄົນນັ້ນລວຍ
ວັກຊີນ Covid-19 ໄດ້ຮັບຄວາມສົນໃຈຈາກຊາວໂລກອີກ ຫລັງຈາກບໍລິສັດຜະລິດຢາ Pfizer ແລະ BioNTech ປະກາດວ່າ: ວັກຊີນທີ່ຢູ່ໃນການທົດລອງໄລຍະທີ 3 ມີປະສິດທິພາບໃນການປ້ອງກັນການຕິດເຊື້ອໂຄໂຣນາໄວຣັສໄດ້ເຖິງ 90% ສົ່ງຜົນໃຫ້ຕະຫລາດຫຸ້ນເອີຣົບເພີ່ມຂຶ້ນຮັບຂ່າວດີນີ້.
ນອກຈາກນີ້, ວັກຊີນຂອງບໍລິສັດອື່ນໆກໍມີການເຄື່ອນໄຫວໃນເວລາໃກ້ຄຽງກັນເຊັ່ນ: ກະຊວງສາທາລະນະສຸກຣັດເຊຍຖະແຫລງຢືນຢັນວ່າ: ວັກຊີນ Sputnik V ມີປະສິດທິພາບຫລາຍກວ່າ 90% ເຊັ່ນດຽວກັບຂອງ Pfizer ເຖິງວ່າຈະຍັງບໍ່ເລີ່ມທົດລອງໃນໄລຍະທີ 3 ກໍຕາມ, ສ່ວນແອນຕິບໍດີຂອງ Eli Lilly ຫາກໍໄດ້ຮັບການອະນຸມັດຈາກອົງການອາຫານ ແລະ ຢາຂອງອາເມລິກາ (FDA).
ໄລຍະເດືອນສິງຫາຜ່ານມາ ຫລາຍບໍລິສັດເລີ່ມເປີດເຜີຍລາຄາວັກຊີນ ເຊິ່ງແຕກຕ່າງກັນດັ່ງນີ້:
Moderna ຕັ້ງລາຄາໄວ້ 32-37 ໂດລາສະຫະລັດ ສຳລັບການສັ່ງຊື້ຈຳນວນໜ້ອຍ ໂດຍທ່ານ ສະເຕຟານ ບອງເຊລ CEO ຂອງ Moderna ລະບຸວ່າ: ລາຄາຈະຕໍ່າກວ່ານີ້ຖ້າຊື້ຈຳນວນຫລາຍ.
ທ່ານ ບອງເຊລ ຍັງກ່າວອີກວ່າ: Moderna ກຳນົດການຕັ້ງລາຄາວັກຊີນ Covid-19 ໄວ້ 2 ໄລຍະຄື: ໄລຍະທີ່ພະຍາດກຳລັງລະບາດທົ່ວໂລກ (pandemic) ໂດຍລາຄາຈຳຕໍ່າກວ່າມູນຄ່າຕົວຈິງ ແລະ ໄລຍະທີ່ກາຍເປັນພະຍາດປະຈຳທ້ອງຖິ່ນ (endemic) ແລ້ວ ລາຄາຈະເປັນໄປຕາມລາຄາຂອງວັກຊີນທາງການຄ້າອື່ນໆ ເຊິ່ງໝາຍຄວາມວ່າລາຄາອາດສູງຂຶ້ນ.
Johnson & Johnson ສັນຍາວ່າຈະຜະລິດວັກຊີນ 100 ລ້ານໂດສ ມູນຄ່າ 1.000 ລ້ານໂດລາສະຫະລັດ ຫລັງໄດ້ຮັບອະນຸມັດຈາກ FDA ເຊິ່ງສະເລ່ຍແລ້ວວັກຊີນຂອງ Johnson & Johnson ຢູ່ທີ່ 10 ໂດລາສະຫະລັດຕໍ່ໂດສ.
ຂະນະທີ່ວັກຊີນຂອງ Pfizer ແລະ BioNTech ຕັ້ງລາຄາໂດສລະ 19,50 ໂດລາສະຫະລັດ ໂດຍຕ້ອງສັກຄົນລະ 2 ໂດສ. Novavax ເລີ່ມຕົ້ນໃນລັດແມຣິແລນຂອງອາເມລິກາ ລາຄາ 16 ໂດລາສະຫະລັດຕໍ່ໂດສ.
ຮອດປັດຈຸບັນ ລາຄາວັກຊີນ Covid-19 ຖືກທີ່ສຸດເປັນວັກຊີນທີ່ພັດທະນາໂດຍມະຫາວິທະຍາໄລອອກຟອດ ແລະ ບໍລິສັດ AstraZeneca ເຊິ່ງກຳລັງຢູ່ໄລຍະການທົດລອງຂັ້ນສຸດທ້າຍ ຕັ້ງລາຄາໄວ້ 4 ໂດລາສະຫະລັດຕໍ່ໂດສ.
Sinovac ຂອງຈີນຈຳໜ່າຍໃນບາງເມືອງເປັນກໍລະນີສຸກເສີນໃນລາຄາ 60 ໂດລາສະຫະລັດຕໍ່ 2 ໂດສ, ສ່ວນວັກຊີນຂອງ Sinopharm ຂອງຈີນລາຄາ 145 ໂດລາສະຫະລັດຕໍ່ 2 ໂດສ ເຊິ່ງສູງທີ່ສຸດໃນໂລກ.
ສໍານັກຂ່າວຣອຍເຕີພົບວ່າ: ສາເຫດທີ່ລາຄາວັກຊີນຂອງ AstraZeneca ຕໍ່າກວ່າບໍລິສັດອື່ນໆ ເປັນເພາະສັນຍາຊື້ຂາຍວັກຊີນຂອງ AstraZeneca ກັບລັດຖະບານເອີຣົບມີຂໍ້ຕົກລົງຈຳກັດຄວາມຮັບຜິດຊອບຂອງບໍລິສັດໃນກໍລະນີຜູ້ໃຊ້ໄດ້ຮັບອັນຕະລາຍຈາກຜົນຂ້າງຄຽງຂອງວັກຊີນ. ຂະນະທີ່ບໍລິສັດອື່ນບໍ່ມີຂໍ້ສັນຍາລັກສະນະນີ້ ຈຶ່ງຕ້ອງຕັ້ງລາຄາສູງກວ່າ.
ປັດຈຸບັນທົ່ວໂລກມີວັກຊີນຢູ່ລະຫວ່າງການທົດລອງໄລຍະທີ 3 ທັງໝົດ 10 ຊະນິດ. ດັ່ງນັ້ນ ຕໍ່ຈາກນີ້ ມີທ່າອ່ຽງວ່າຫລັງການຖະແຫລງຂ່າວຂອງ Pfizer ແລະ BioNTech, ແຕ່ລະບໍລິສັດຈະແຂ່ງຂັນກັນຢ່າງດຸເດືອດ ເພື່ອໃຫ້ໄດ້ເປັນບໍລິສັດທຳອິດທີ່ຜະລິດວັກຊີນອອກສູ່ຕະຫລາດ ເພາະນັ້ນໝາຍເຖິງເງິນລາຍໄດ້ມະຫາສານ. ຂະນະທີ່ຜູ້ບໍລິໂພກອາດມີວັກຊີນໃຊ້ກັນໄວຂຶ້ນ.
