ນາທີເປັນນາທີຕາຍ ! “ຫົວໃຈທີ່ຈະປ່ຽນໃຫ້ຄົນເຈັບ” ຮອດໂຮງໝໍແລ້ວແຕ່ເຮລິກົບແຕຕົກເທິງດາດຟ້າ ສຸດທ້າຍໝໍເຮັດຕົກອີກ
ຟ໊ອກນິວ ລາຍງານອຸປະຕິເຫດທີ່ເກີດຂຶ້ນລະຫວ່າງນາທີເປັນນາທີຕາຍຂອງ “ໜຶ່ງຊີວິດ” ເມື່ອເຮລິກົບແຕຂົນສົ່ງ ຫົວໃຈຜູ້ບໍລິຈາກອະໄວຍະວະ ຕົກເທິງດາດຟ້າໂຮງໝໍເຄັກ ມະຫາວິທະຍາໄລເຊົາເທິນ ແຄລິຟໍເນຍ ນະຄອນລອສແອງເຈລິສ ສະຫະລັດອາເມລິກາ ໃນບ່າຍວັນທີ 6 ພະຈິກ ຕາມເວລາທ້ອງຖິ່ນ.
ວິດີໂອເຜີຍແຜ່ຂະນະທີ່ເຮລິກົບແຕລຳໜຶ່ງຂະໜາດ 8 ບ່ອນນັ່ງ ເດີນທາງມາຈາກນະຄອນຊານດິເອໂກ ສູນເສຍການຄວບຄຸມຂະນະລົງບ່ອນຈອດ ເທິງດາດຟ້າໂຮງໝໍ. ຜູ້ເຫັນເຫດການທີ່ຢູ່ທາງລຸ່ມອາຄານຄົນໜຶ່ງຮ້ອງ “ໂອ້ພະເຈົ້າ” ສອງສາມຄັ້ງ ຂະນະທີ່ເຮລິກົບແຕຕົກ.
ເຖິງວ່າຈະໂຊກດີທີ່ນັກບິນ ແລະ ແພດອີກ 2 ຄົນ ໃນເຮລິກົບແຕບໍ່ໄດ້ຮັບບາດເຈັບສາຫັດ, ແຕ່ສະຖານີໂທລະພາບ ສະກາຍ 5 ເຜີຍແຜ່ວິດີໂອນາທີຕົກໃຈ ເມື່ອແພດຖືຖົງຫົວໃຈຜູ້ບໍລິຈາກ ຍ່າງອອກມາຈາກຊາກເຮລິກົບແຕ ແຕ່ສະດຸດ ແລະ ລົ້ມລົງຈົນຖົງຫົວໃຈຜູ້ບໍລິຈາກຕົກລົງພື້ນ.
ເຖິງຢ່າງໃດກໍຕາມ, ກົມມອດໄຟລອສແອງເຈລິສແຈ້ງຂ່າວດີວ່າ: ຫົວໃຈຂອງຜູ້ບໍລິຈາກບໍ່ໄດ້ຮັບຄວາມເສຍຫາຍ ແລະ ສົ່ງເຖິງມືແພດ. ຂະນະທີ່ໂຮງໝໍເຄັກລະບຸວ່າ: ບໍ່ເທົ່າໃດຊົ່ວໂມງພາຍຫລັງອຸປະຕິເຫດເຮລິກົບແຕຕົກ ຄົນເຈັບໄດ້ຮັບການປ່ຽນຖ່າຍຫົວໃຈສຳເລັດ ແລະ “ນີ້ເປັນເລື່ອງໜ້າອັດສະຈັນທີ່ແທ້ຈິງ”.
ສ່ວນນັກບິນຖືກນຳຕົວອອກຈາກຊາກເຮລິກົບແຕ ແລະ ຖືກນຳສົ່ງໄປໂຮງໝໍດ້ວຍອາການບາດເຈັບເລັກໜ້ອຍ. ຂະນະທີ່ແພດ 2 ຄົນ ເຊິ່ງເປັນຜູ້ໂດຍສານມານຳ ປະຕິເສດການປິ່ນປົວ.
