ບຸນທາດຫລວງປີນີ້ອາດເປັນບົດຮຽນໃຫ້ປີໜ້າ
ໂດຍ: ທິດກໍ່າ
ດັ່ງຊາວນະຄອນຫລວງວຽງຈັນເຮົາ ກໍຄືຊາວລາວໃນທົ່ວປະເທດໄດ້ເຫັນ ແລະ ຮັບຮູ້ນຳກັນມາແລ້ວວ່າ, ບຸນນະມັດສະການພະທາດຫລວງປະຈຳປີ 2020 ຫລືວ່າ ປະຈຳປີ ພສ 2563 ທີ່ຜ່ານມາໝາດໆນັ້ນ ແມ່ນເພິ່ນເຮັດຕາມຮີດຕາມຄອງທີ່ເຄີຍປະຕິບັດກັນມາແຕ່ບູຮານນະການ. ໝາຍວ່າບໍ່ໄດ້ມີການສະເຫລີມສະຫລອງຢ່າງໃຫຍ່ໂຕມະໂຫຖານເໝືອນດັ່ງຫລາຍປີຜ່ານມາ. ເວົ້າເຖິງການຄົບງັນກໍມີພຽງແຕ່ 3 ວັນ ອັນສາເຫດທັງມວນມັນກໍເນື່ອງມາຈາກການແຜ່ລະບາດຂອງເຊື້ອພະຍາດໂຄວິດ-19 ນັ້ນເອງ.
ແຕ່ແນວໃດກໍຕາມ, ຄິດວ່າການຈັດຕັ້ງງານບຸນນະມັດສະການພະທາດຫລວງໃນປີນີ້ອາດເປັນບົດຮຽນໃຫ້ແກ່ປີໜ້າບໍ່ຫລາຍກໍໜ້ອຍ ໂດຍສະເພາະແມ່ນກຳນົດເວລາການທຳບຸນ, ບັນຫາການຄົບງັນຕ່າງໆໃຫ້ສົມກັບວ່າ ພະທາດຫລວງວຽງຈັນເປັນມິ່ງຂວັນຂອງປວງຊົນລາວທັງຊາດ, ເປັນສູນລວມແຫ່ງນ້ຳໃຈຄວາມສາມັກຄີເປັນປຶກແຜ່ນຂອງປະຊາຊົນບັນດາເຜົ່າໃນທົ່ວປະເທດ. ນອກຈາກນັ້ນ ພະທາດຫລວງວຽງຈັນຍັງເປັນສະຖາປັດຕະຍະກຳອັນໂດດເດັ່ນລືຊື່ ທັງເປັນມໍລະດົກຕົກທອດຂອງຊາດລາວ, ຄົນລາວມາແຕ່ສະໄໝກ່ອນຈົນມາເຖິງຍຸກປັດຈຸບັນ.
ເພາະສະນັ້ນ ຈຶ່ງຖືໄດ້ວ່າ ບຸນນະມັດສະການພະທາດຫລວງເປັນບຸນສຳຄັນ ແລະ ເປັນບຸນປາງໃຫຍ່ຂອງຊາດ ແລະ ຂອງປະຊາຊົນບັນດາເຜົ່າໃນທົ່ວປະເທດ. ແຕ່ເມື່ອກ່າວເຖິງສະພາບບັນຍາກາດການຄົບງັນສະເຫລີມສະຫລອງບຸນທາດຫລວງປີນີ້ ຖືວ່າເຮັດແບບກະທັດຮັດເບົາບາງ ທັງງຽບເຫງົາບໍ່ຄຶກຄັກ, ຄຶກຄື້ນເໝືອນດັ່ງຫລາຍປີຜ່ານມາ. ບັນຫາອັນໃຫຍ່ໆກໍແມ່ນບໍ່ມີການຄົບງັນ, ບໍ່ມີຕະຫລາດນັດ, ບໍ່ມີການໂຄສະນາສະແດງຜະລິດຕະພັນສິນຄ້າປະເພດຕ່າງໆຂອງພາຍໃນ ແລະ ຕ່າງປະເທດ, ລາມໄປຮອດການສະແດງສິລະປະວັນນະຄະດີ, ມະໂຫລີດົນຕີເສບ, ໝໍຂັບໝໍລຳຢ່າງຟົດຟື້ນຄຶກຄື້ນ, ຄົບງັນ 5 ວັນ 7 ວັນເໝືອນດັ່ງເຄີຍເຮັດກັນຜ່ານມາ. ຈາກສະພາບດັ່ງກ່າວ ຈຶ່ງເຮັດໃຫ້ສະພາບບັນຍາກາດໃນບຸນທາດຫລວງປີນີ້ຂ້ອນຂ້າງງຽບເຫງົາ, ການບໍລິການຈຳໜ່າຍສິນຄ້າ ໂດຍສະເພາະປະເພດເຄື່ອງກິນ, ເຄື່ອງດື່ມ, ເຄື່ອງອຸປະໂພກ-ບໍລິໂພກກໍບໍ່ດົກໜາ ແລະ ກວ້າງຂວາງຫລາກຫລາຍຈົນມີຜົນກະທົບໄປຮອດການເກັບລາຍຮັບໃນງານບຸນ ຕະຫລອດເຖິງການເສຍພັນທະອາກອນ ແລະ ສິ້ນເປືອງຕ່າງໆທີ່ພົວພັນເຖິງການໃຊ້ຈ່າຍໃນງານບຸນ ຈຶ່ງບໍ່ຄ່ອຍລາບລື່ນ. ກ່າວເຖິງບັນຍາກາດການຄ້າ, ການຂາຍຜູ້ປະກອບການບໍລິການຂາຍສິນຄ້າປະເພດສິນຄ້າຕ່າງໆ ນັບແຕ່ເຂົ້າຫລາມປີ້ງໄກ່ກໍເປັນພຽງມະຍ່ອມມະແຍ່ມ, ລາຍຮັບໃນດ້ານຕ່າງໆເພື່ອປະກອບສ່ວນເຂົ້າໃນການບູລະນະສ້າງສາວັດວາອາຮາມ ໂດຍສະເພາະອົງພະທາດຫລວງເອງກໍເປັນໄປຕາມມີຕາມເກີດ.
ແຕ່ແນວໃດກໍດີ, ສິ່ງທີ່ພວກເຮົາຄວນຄິດນຳກັນຕື່ມນັ້ນ ໃນເມື່ອເຮົາງົດງານໃຫຍ່ຢູ່ທາດຫລວງແລ້ວ ພັດໄປເປີດງານໃຫຍ່ຢູ່ສູນການຄ້າລາວ-ໄອເຕັກ, ເບິ່ງແລ້ວຄົນກໍພາກັນໄປອັ່ງອໍ, ຍັດແຍ່ບຽດສີກັນ, ທັງລົດກໍຕິດຍາວຢຽດເປັນກິໂລແມັດມັນກໍບໍ່ຕ່າງຫຍັງກັບວ່າງົດຢູ່ບ່ອນໜຶ່ງພັດໄປເປີດຢູ່ບ່ອນໜຶ່ງ ຫລື ເວົ້າໄດ້ງ່າຍໆວ່າ ງົດການຄົບງັນເພື່ອຫລີກໂຄວິດ-19 ຢູ່ບຸນທາດຫລວງ ແຕ່ພັດໄປເປີດຢູ່ສູນການຄ້າລາວ-ໄອເຕັກ ຕ່າງແຕ່ວ່າໃນສອງຈຸດດັ່ງກ່າວຊື່ບໍ່ຄືກັນ, ສະຖານທີ່ບໍ່ຄືກັນ ແລະ ເວົ້າເຖິງຄວາມສ່ຽງຕໍ່ໂຄວິດ-19 ມັນກໍບໍ່ແຕກຕ່າງກັນພໍເທົ່າໃດ ເພາະວ່າພວກນັກທ່ອງທ່ຽວທັງຫລາຍໃຜກໍຕ້ອງພາກັນໄປທ່ຽວຫລິ້ນ, ທ່ຽວກິນ, ທ່ຽວຊື້ຂາຍຈັບຈ່າຍກັນຢູ່ແລ້ວ. ກໍຂໍໃຫ້ໂຄວິດ-19 ຈົ່ງມະຫັບມະຫາຍໄປຈາກເມືອງລາວໂດຍໄວ ເພາະປີໜ້າຈະໄດ້ເຫັນພາບບັນຍາກາດການຄົບງັນບຸນນະມັດສະການພະທາດຫລວງໄດ້ຫວນກັບຄືນມາຄຶກຄັກອີກຄັ້ງ.
ໃນຫລາຍປີຜ່ານມາ, ເວົ້າເຖິງການສ້າງລາຍຮັບຈາກບຸນທາດຫລວງແມ່ນມີຫລວງຫລາຍເປັນກອບເປັນກຳມາໃຫ້ທ້ອງຖິ່ນພໍສົມຄວນ ເພາະບັນດາຫົວໜ່ວຍຜູ້ປະກອບການທັງພາກລດ ແລະ ເອກະຊົນຕ່າງກໍມີລາຍໄດ້ຈາກການເກັບຈ່ອງທີ່ດິນ ເພື່ອເປັນບ່ອນຕັ້ງຮ້ານເພື່ອທຳກິດຈະກຳຄ້າຂາຍ. ນອກຈາກນັ້ນ ກໍຍັງມີລາຍຮັບດ້ານອື່ນໆເຊັ່ນ: ຈາກການບໍລິການຝາກລົດ, ຂາຍຜະລິດຕະພັນສິນຄ້າເຄື່ອງນຸ່ງຫົ່ມ, ເຄື່ອງອຸປະໂພກ-ບໍລິໂພກ, ເຄື່ອງກິນເຄື່ອງດື່ມ, ເຫລົ້າຢາປາແປ້ງ, ເຂົ້າຫລາມປີ້ງໄກ່ ແລະ ອື່ນໆ. ໄປຄຽງຄູ່ກັນນັ້ນ ທາງວັດວາສາສະໜາກໍມີລາຍຮັບຈາກການອຸບໂປໂມທະນາອຸປະຖຳຄ້ຳຊູວັດວາສາສະໜາຕາມແຮງສັດທາຂອງຜູ້ບໍລິຈາກ. ແຕ່ຕົກມາປີນີ້ ເບິ່ງອັນໃດມັນກໍຂ້ອນຂ້າງເປິະ ຍ້ອນໂຄວິດ-19 ມາອາລະວາດທຳລາຍຄວາມສຸກ ແລະ ຄວາມຈະເລີນກ້າວໜ້າຂອງຊາດບ້ານເມືອງ.
ເຖິງຢ່າງໃດກໍດີ, ພວກເຮົາຍັງມີຄວາມຫວັງຢ່າງຍິ່ງວ່າ ເຊື້ອພະຍາດໂຄວິດ-19 ຕ້ອງຖືກຈຳກັດຢັບຢັ້ງ ແລະ ປາບມັນໄດ້ໃນທີ່ສຸດ ເຊິ່ງເວລານັ້ນລະງານບຸນນະມັດສະການພະທາດຫລວງຈະຫວນມາຄຶກຄັກອີກຄັ້ງ ແລະ ປີນີ້ງານບຸນທາດຫລວງອາດເປັນບົດຮຽນໃຫ້ປີໜ້າຢ່າງແນ່ນອນ.
