ພ້ອມກັນແກ້ໄຂ 6 ໄພອັນຕະລາຍ
ໂດຍ: ທິດກໍ່າ
ດັ່ງພວກເຮົາຮູ້ນໍາກັນແລ້ວວ່າ, ການເປີດບັ້ນດໍາເນີນຊີວິດການເມືອງ ຫລື ເວົ້າຢ່າງໜຶ່ງກໍແມ່ນບັ້ນປົວແປງພາຍໃນພັກ-ພະນັກ ງານຄັ້ງນີ້ ນັບວ່າເປັນເຫດການດ້ານການເມືອງອັນສໍາຄັນຂອງພັກ. ບັນດາອົງຈັດຕັ້ງຂອງພັກ ຫລືວ່າ ອົງຄະນະພັກທຸກຂັ້ນ, ສະ ມາຊິກພັກ-ພະນັກງານທຸກສະຫາຍມີໂອກາດໄດ້ຮ່ວມຊີວິດ ຫລື ເອີ້ນວ່າ ບັ້ນສໍາຫລວດກວດກາຄືນຈຸດດີ,ຈຸດອ່ອນ, ຂໍ້ຄົງຄ້າງໃນໄລຍະຜ່ານມາຂອງອົງຄະນະພັກ, ບັນດາສະຫາຍສະມາຊິກພັກ ເຊິ່ງເຫັນວ່າອັນໃດດີເຮົາກໍຕ້ອງໄດ້ສືບຕໍ່ສົ່ງເສີມ, ກົງກັນຂ້າມບັນ ຫາໃດຍັງອ່ອນ ແລະ ຄ້າງຄາເຮົາກໍຕ້ອງໄດ້ພ້ອມກັນແກ້ໄຂ ເພື່ອເຮັດໃຫ້ອົງຄະນະພັກ ກໍຄືບັນດາສະຫາຍສະມາຊິກພັກມີຄວາມ ປອດໃສຂາວສະອາດ. ຕາມທິດກໍ່າຄິດ ໃນການແກ້ໄຂບັນຫາຕ່າງໆທີ່ມັນເປັນຈຸດອ່ອນ ແລະ ຄ້າງຄາ ເພື່ອໃຫ້ເປັນຕົວແບບຢ່າງປອດໃສຂາວສະອາດຈິງຈັງນັ້ນ ກໍຕ້ອງເລີ່ມແຕ່ການນໍາ-ແກນນໍາໃນກົມກອງ ແລະ ຂະແໜງການນັ້ນໆຕ້ອງເປັນຫລັກ.
ໂດຍອີງໃສ່ຜົນຂອງການສໍາຫລວດກວດກາຄືນຂອງລັດຖະບານຊຸດທີ 8 ເຖິງຊະຕາກໍາຂອງປະເທດຊາດ ກໍຄືໄພອັນຕະລາຍທີ່ມັນໄດ້ຂົ່ມຂູ່, ເກາະຫ້ອຍ, ຄອບງໍາ ແລະ ກົດໜ່ວງມາຫຼລາຍສິບປີ ເຊິ່ງພວກເຮົາທັງໝົດຈະຕ້ອງໄດ້ເດັດດ່ຽວພ້ອມກັນແກ້ໄຂນັ້ນ ມັນມີ 6 ໄພອັນຕະລາຍຄື: (1) ແມ່ນຄວາມທຸກຍາກ ແລະ ຄວາມແຕກໂຕນກັນໃນສັງຄົມ. (2) ໄພຫັນປ່ຽນຂອງຕົນເອງ. (3) ໄພໜີ້ສິນ. (4) ໄພຫຍໍ້ທໍ້ໃນສັງຄົມ. (5) ໄພສໍ້ລາດບັງຫລວງ ແລະ (6) ໄພແຫ່ງການຫັນປ່ຽນໂດຍສັນຕິຂອງອິດທິກໍາລັງປໍລະປັກ. ໃນ 6 ໄພອັນຕະລາຍນີ້ ທິດກໍ່າຈະບໍ່ອະທິບາຍແບບກິໆກີໆ ຍ້ອນວ່າພວກເຮົາທັງໝົດກວ່າຈະກ້າວຂຶ້ນເປັນພະນັກງານຫລັກແຫລ່ງແກນນໍາ, ເປັນສະມາຊິກພັກ-ພະນັກງານ ແມ່ນພັກໄດ້ເຝິກຝົນຫລໍ່ຫລອມໃນແປວໄຟແຫ່ງການປະຕິວັດ ແລະ ຜ່ານຄວາມໂຊກໂຊນໃນວຽກງານຕົວຈິງມາຫລາຍຫລົບຫລາຍຕ່າວແລ້ວຈຶ່ງໄດ້ມາຢືນຢູ່ຈຸດນີ້.
ຕາມເຮົາວ່າ ທຸກສິ່ງທຸກຢ່າງກວ່າຈະພາກັນລຶບລ້າງໄດ້ 6 ໄພອັນຕະລາຍທີ່ມັນໄດ້ເກາະຫ້ອຍຄອບງໍາມາຫລາຍສິບປີ, ພວກເຮົາກໍ ຕ້ອງໄດ້ພ້ອມກັນອອກແຮງເສຍສະຫລະເຮັດທຸກສິ່ງທຸກຢ່າງ ໂດຍເລີ່ມຈາກຕົນເອງຈຶ່ງກ້າວໄປຫາກົມກອງ, ຂະແໜງການທີ່ຕົນ ຮັບຜິດຊອບ. ໃນໄລຍະຜ່ານມາເຮົາເຫັນວ່າມີຫລາຍອັນຫລາຍຢ່າງທີ່ເຮັດໃຫ້ສະມາຊິກພັກ-ພະນັກງານເຮົາຕົກເປັນທາດຂອງໄພ ອັນຕະລາຍ ກາຍເປັນອະບາຍຍະມຸກທັງປວງ ເຊິ່ງມັນສະແດງອອກຄື: ເກີດແນວຄິດໄຂ່ວເຂ, ແນວຄິດເຫັນແກ່ຜົນປະໂຫຍດ ສ່ວນຕົວ, ແນວຄິດໂລບມາກໂລພາ, ເກີດມີພະຍາດອາດຍາສິດຂຸນເສິກ, ຫ່າງເຫີນຈາກມະຫາຊົນ ແລະ ປະຊາຊົນຈົນບາງຢ່າງກໍມີຜົນສະທ້ອນມາໃຫ້ປະເທດຊາດຢ່າງຫລວງຫລາຍສົມຄວນ.
ເຖິງຢ່າງໃດກໍດີ, ຕາມທິດກໍ່າຄິດ ຜ່ານບັ້ນດໍາເນີນຊີວິດການເມືອງ ຫລືວ່າ ບັ້ນປົວແປງໃນຄັ້ງນີ້ຈະເຮັດໃຫ້ທຸກສະຫາຍທີ່ເປັນສະມາຊິກພັກ-ພະນັກງານທັງໝົດຮູ້ແຈ້ງເຫັນຈິງໃນພາລະກໍາປະຫວັດສາດຂອງຊາດ, ເຫັນໄດ້ຈຸດດີ, ຈຸດອ່ອນຂອງຕົນເອງແລ້ວ ມີການດັດປັບໃຫ້ໂລ່ງລ່ຽນໄປຕາມປ່ອງລ້ອງຕາມແປວ, ອັນສໍາຄັນທີ່ສຸດແມ່ນພ້ອມກັນແກ້ໄຂໃຫ້ໄດ້ 6 ໄພອັນຕະລາຍທີ່ມັນພາ ພວກເຮົາເພໃນຫລາຍປີທີ່ຜ່ານມາໃຫ້ໝົດໄປ.
