ນັບຄະແນນເລືອກຕັ້ງມຽນມາ ຄາດນາງ ອອງຊານ ຊູຈີ ຊະນະອີກສະໄໝ ກອງທັບຢືນຢັນຍອມຮັບຜົນການເລືອກຕັ້ງ
ຄະນະກຳມະການການເລືອກຕັ້ງຂອງມຽນມາເລີ່ມນັບຄະແນນຫລັງຈັດການເລືອກຕັ້ງທົ່ວໄປ ໃນວັນທີ 8 ພະຈິກ ເຊິ່ງເຖິງວ່າຈະເປັນການເລືອກຕັ້ງທີ່ຈັດຂຶ້ນທ່າມກາງສະຖານະການການລະບາດຂອງໂຄວິດ-19, ແຕ່ກໍມີຊາວມຽນມາອອກໄປໃຊ້ສິດຈຳນວນຫລາຍ.
ເຖິງວ່າຈະຍັງບໍ່ມີຜົນການເລືອກຕັ້ງຢ່າງເປັນທາງການ, ແຕ່ການຄາດຄະເນຂອງຫລາຍຝ່າຍກົງກັນວ່າ: ພັກສັນນິບາດແຫ່ງຊາດເພື່ອປະຊາທິປະໄຕ (NLD) ຂອງນາງ ອອງຊານ ຊູຈີ ທີ່ປຶກສາແຫ່ງລັດຂອງມຽນມາ ອາດຈະຊະນະເລືອກຕັ້ງອີກສະໄໝ ໂດຍຜູ້ຕິດຕາມສະຖານະການການເມືອງຢູ່ມຽນມາກຳລັງສົນໃຈວ່າ: ພັກ NLD ຈະໄດ້ຄະແນນນິຍົມເທົ່າໃດ ເພາະຈະສະທ້ອນຄວາມພໍໃຈໃນການເຮັດວຽກໃນຖານະລັດຖະບານຕະຫລອດ 5 ປີຜ່ານມາ.
ຂະນະທີ່ບັນຍາກາດບໍລິເວນສຳນັກງານໃຫຍ່ພັກ NLD ຢູ່ນະຄອນຢາງກຸ້ງໃນຄືນຜ່ານມາ ມີຜູ້ສະໜັບສະໜູນພັກ NLD ຈຳນວນຫລາຍໄປລວມຕົວ ພ້ອມທຸງສັນຍາລັກຂອງພັກ ແລະ ຮູບນາງ ອອງຊານ ຊູຈີ ໂດຍພວກເຂົາເຊື່ອໝັ້ນວ່າ: ພັກ NLD ແລະ ນາງ ຊູຈີ ຈະໄດ້ເປັນລັດຖະບານອີກສະໄໝແນ່ນອນ.
ການເລືອກຕັ້ງເມື່ອປີ 2015 ພັກ NLD ແລະ ນາງ ຊູຈີ ຊະນະເລືອກຕັ້ງຢ່າງຫລວງຫລາຍ ຈາກຄວາມຫວັງວ່າລັດຖະບານຂອງນາງ ຊູຈີ ຈະເຂົ້າໄປປ່ຽນແປງໃຫ້ມຽນມາເປັນປະຊາທິປະໄຕຫລາຍຂຶ້ນ ຫລັງຖືກປົກຄອງດ້ວຍລັດຖະບານທະຫານມາຢ່າງຍາວນານຫລາຍສິບປີ. ເຖິງຢ່າງໃດກໍຕາມ, ລັດຖະບານຂອງນາງ ຊູຈີ ຖືກວິຈານຢ່າງໜັກເຖິງຄວາມລົ້ມເຫລວໃນການຫລຸດອຳນາດຂອງກອງທັບໃນການເມືອງມຽນມາ ທີ່ທະຫານຍັງມີໂກຕ້າໃນສະພາ 25% ລວມທັງຍັງຄວບຄຸມກະຊວງສຳຄັນ ໄດ້ແກ່ກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ ແລະ ກະຊວງກິດຈະການຊາຍແດນ.
ຜູ້ມີສິດເລືອກຕັ້ງຊາວມຽນມາຄົນໜຶ່ງຍອມຮັບຕໍ່ສື່ຕ່າງປະເທດໃນວັນທີ 8 ພະຈິກວ່າ: ລາວບໍ່ພໍໃຈການເຮັດວຽກຂອງລັດຖະບານ NLD ເທົ່າໃດ ໂດຍສະເພາະການແຕ່ງຕັ້ງບຸກຄົນເຂົ້າໄປເຮັດວຽກໃນລັດຖະບານທີ່ບໍ່ເໝາະສົມ ສົ່ງຜົນຕໍ່ປະສິດທິພາບໃນການບໍລິຫານປະເທດ, ແຕ່ຢືນຢັນຈະເລືອກພັກ NLD ຕໍ່ໄປ ເພື່ອໃຫ້ໂອກາດລັດຖະບານນາງ ຊູຈີ ສືບຕໍ່ວຽກໃຫ້ສຳເລັດ.
ຂະນະທີ່ພົນເອກອາວຸໂສມິນ ອ່ອງ ຫລ່າຍ ຜູ້ບັນຊາການທະຫານສູງສຸດຂອງມຽນມາ ຢືນຢັນຈະຍອມຮັບຜົນການເລືອກຕັ້ງ ບໍ່ວ່າຈະອອກມາໃນຮູບແບບໃດ ຫລັງຈາກອາທິດຜ່ານມາ ຜູ້ບັນຊາການທະຫານສູງສຸດຂອງມຽນມາໃຫ້ສຳພາດຕໍ່ສື່ທ້ອງຖິ່ນ ຕັ້ງຄຳຖາມຕໍ່ຄະນະກຳມະການການເລືອກຕັ້ງວ່າ: ອາດຈັດການເລືອກຕັ້ງຢ່າງບໍ່ເໝາະສົມຈົນເຮັດໃຫ້ການເລືອກຕັ້ງຄັ້ງນີ້ບໍ່ເສລີ ແລະ ເປັນທຳ ເຊິ່ງຄວາມເຫັນດັ່ງກ່າວຖືກວິຈານຢ່າງໜັກວ່າ: ອາດຂັດຕໍ່ກົດໝາຍທີ່ທະຫານຕ້ອງເປັນກາງທາງການເມືອງ.
