ສະກອດແລນອອກກົດໝາຍ ສັ່ງຜູ້ປົກຄອງຫ້າມຕີລູກ ກັງວົນຝັງໃຈຄວາມຮຸນແຮງ-ກະທົບຈິດໃຈ
ພໍ່ແມ່ຊາວສະກອດແລນທີ່ລົງໂທດລູກດ້ວຍການຕີຈະບໍ່ໄດ້ຮັບການຄຸ້ມຄອງຕາມກົດໝາຍອີກຕໍ່ໄປ ບໍ່ວ່າການຕີນັ້ນຈະໜັກ ຫລື ເບົາກໍຕາມ.
ວັນທີ 8 ພະຈິກນີ້, ສຳນັກຂ່າວ BBC ລາຍງານວ່າ: ສະກອດແລນກາຍເປັນປະເທດທຳອິດໃນສະຫະຣາຊະອານາຈັກ ທີ່ບັງຄັບໃຊ້ກົດໝາຍຫ້າມບໍ່ໃຫ້ພໍ່ແມ່ ແລະ ຜູ້ລ້ຽງເດັກ ລົງໂທດເດັກອາຍຸຕໍ່າກວ່າ 16 ປີດ້ວຍການຕີ ຫລື ກະທຳຮຸນແຮງທາງກາຍະພາບອື່ນໆ.
ກົດໝາຍນີ້ເຮັດໃຫ້ຜູ້ເຍົາໄດ້ຮັບການຄຸ້ມຄອງທຽບເທົ່າກັບຜູ້ໃຫຍ່ໂດຍສົມບູນ ເພາະພາຍໃຕ້ກົດໝາຍສະບັບເກົ່ານັ້ນ ອະນຸຍາດໃຫ້ຜູ້ປົກຄອງສາມາດລົງໂທດເດັກດ້ວຍການຕີໄດ້ ຖ້າວ່າການກະທຳດັ່ງກ່າວເປັນການລົງໂທດທີ່ສົມເຫດສົມຜົນ (reasonable chastisement) ເຊິ່ງຈະຄຸ້ມຄອງພໍ່ແມ່ ຕາບໃດກໍຕາມທີ່ພວກເຂົາບໍ່ໄດ້ຕີເດັກບໍລິເວນຫົວ, ບໍ່ໃຊ້ອຸປະກອນລົງໂທດ, ບໍ່ສັ່ນໂຕເດັກ ແລະ ບໍ່ເຮັດໃຫ້ເກີດຮອຍ ຫລື ບາດແຜໃດໆ.
ແຕ່ຫລັງຈາກນີ້ ພໍ່ແມ່ຊາວສະກອດແລນຈະບໍ່ສາມາດລົງໂທດລູກດ້ວຍການຕີໄດ້ອີກແລ້ວ ເພື່ອເປັນການປົກປ້ອງເລື່ອງສຸຂະພາບຈິດ ແລະ ເຄົາລົບຕໍ່ສິດທີ່ເດັກຕ້ອງມີ.
ທ່ານ ຈອນ ຟິນນີ ຜູ້ທີ່ນຳເອົາຮ່າງກົດໝາຍສະບັບນີ້ເຂົ້າສູ່ສະພາ ເປີດເຜີຍວ່າ: ການຕີເດັກເປັນຄືກັບການສອນວ່າ: ພະລະກຳລັງຄືຄວາມຖືກຕ້ອງ ເຊິ່ງເປັນເລື່ອງທີ່ຄວນໄດ້ຮັບການແກ້ໄຂ ແລະ ການທີ່ມີກົດໝາຍອອກມາຫ້າມ ເປັນການປະກາດໃຫ້ສັງຄົມຮູ້ວ່າ: ພວກເຮົາບໍ່ຄວນສະໜັບສະໜູນຄວາມຮຸນແຮງທຸກຊະນິດ ບໍ່ວ່າຈະເປັນຮູບແບບໃດກໍຕາມ.
ສ່ວນເບື້ອງທີ່ຕໍ່ຕ້ານໃຫ້ເຫດຜົນວ່າ: ກົດໝາຍສະບັບເກົ່ານັ້ນໃຊ້ປ້ອງກັນຄວາມຮຸນແຮງຕໍ່ເດັກໄດ້ຢູ່ແລ້ວ, ການຫ້າມໂດຍສິ້ນເຊີງແບບນີ້ບໍ່ໄດ້ຊ່ວຍ ໃນກໍລະນີທີ່ເດັກຖືກທຳຮ້າຍຢ່າງຮຸນແຮງ ແຕ່ກົງກັນຂ້າມອາດສົ່ງຜົນຕໍ່ຄອບຄົວດີໆທີ່ໃຊ້ວິທີລົງໂທດຂັ້ນເບົາເຊັ່ນ: ຕີກົ້ນລູກ ແຕ່ຕ້ອງມີປະຫວັດການທຳຮ້າຍຮ່າງກາຍຕິດຕົວໄປ.
ລາຍງານຈາກກຸ່ມມູນນິທິເດັກໃນສະກອດແລນທີ່ເຮັດຂຶ້ນໃນປີ 2015 ພົບວ່າ: ການລົງໂທດທາງກາຍະພາບຕໍ່ເດັກ ເກີດຂຶ້ນໃນສະຫະຣາຊະອານາຈັກຫລາຍກວ່າປະເທດທີ່ມີວັດທະນະທຳຄືກັນເຊັ່ນ: ອາເມລິກາ, ການາດາ, ອິຕາລີ, ເຢຍລະມັນ ແລະ ສະວີເດນ, ແຕ່ພຶດຕິກຳເຫລົ່ານີ້ຫລຸດລົງເຫລື້ອຍໆໃນໄລຍະຫລາຍປີຜ່ານມາ ອັນເປັນຜົນມາຈາກທັດສະນະຄະຕິຂອງສັງຄົມທີ່ປ່ຽນໄປ.
ກຸ່ມຜູ້ເຮັດການວິໄຈເປີດເຜີຍວ່າ: ພໍ່ແມ່ຫລາຍຄົນບໍ່ໄດ້ເບິ່ງວ່າການຕີເປັນເລື່ອງທີ່ດີ, ແຕ່ເຊື່ອວ່າໃນບາງຄັ້ງ ວິທີນີ້ເປັນພຽງວິທີດຽວທີ່ໃຊ້ໄດ້ຜົນ.
ເຖິງຢ່າງໃດກໍຕາມ, ເມື່ອພິຈາລະນາຈາກມຸມມອງຂອງເດັກແລ້ວພົບວ່າ: ການຖືກຕີສົ່ງຜົນໃຫ້ເດັກເກີດຄວາມເຈັບປວດ ແລະ ຮູ້ສຶກຜິດຫວັງ ອີກທັງຍັງບໍ່ສາມາດຢຸດຢັ້ງພຶດຕິກຳບໍ່ດີໄດ້ສະເໝີໄປ.
ສະກອດແລນຖືເປັນປະເທດທີ 58 ຂອງໂລກທີ່ມີກົດໝາຍຫ້າມຕີເດັກອອກມາ ໂດຍປະເທດທຳອິດຂອງໂລກທີ່ບັງຄັບໃຊ້ຄືສະວີເດນໃນປີ 1979 ຫລື ເມື່ອ 41 ປີກ່ອນ.
ສໍາລັບປະເທດອື່ນໃນສະຫະຣາຊະອານາຈັກຄື: ເວລ ກຳລັງຈະບັງຄັບໃຊ້ກົດໝາຍນີ້ເຊັ່ນກັນໃນປີ 2022, ສ່ວນອັງກິດ ແລະ ໄອແລນເໜືອຍັງບໍ່ມີແຜນຈະນຳເອົາກົດໝາຍນີ້ມາໃຊ້.
