ສາຍການບິນ ເອມີເຣດ ໃຫ້ນັກບິນລາພັກ 12 ເດືອນ ບໍ່ໄດ້ຮັບເງິນເດືອນ

ວັນທີ 5 ພະຈິກນີ້ ເພດເຟສບຸກ Outsider’s Aviation ເປີດເຜີຍວ່າ ສາຍການບິນ Emirates ໃຫ້ນັກບິນລາພັກ ໂດຍບໍ່ຕ້ອງຮັບເງິນເດືອນເຖິງ 12 ເດືອນ.

ສາຍການບິນ Emirates  ເປັນຜູ້ໃຫ້ບໍລິການລາຍໃຫ່ຍຂອງສະຫະລັດເອມີເຣດ ໄດ້ສະເໜີໃຫ້ນັກບິນບາງຄົນລາພັກ ໂດຍບໍ່ຕ້ອງຮັບຄ່າຈ້າງເປັນເວລາ 12 ເດືອນ ເນື່ອງຈາກໂຄວິດ-19 ຍັງສົ່ງຜົນກະທົບຕໍ່ການເດີນທາງ.

ໂດຍສະເໜີໃຫ້ນັກບິນຈຳນວນໜຶ່ງລາພັກ ໂດຍບໍ່ໄດ້ຮັບຄ່າຈ້າງເປັນເວລາ 12 ເດືອນ ແລະ ອາດຈະເປັນໄປໄດ້ຈະຮ້ອງກັບຄືນມາປະຕິບັດໜ້າທີ່ຄືນຄືເກົ່າ ແຕ່ທັງນັ້ນທັງນີ້ ຂຶ້ນຢູ່ກັບ ຄວາມຕ້ອງການການຕອບສະໜອງ ແລະ ຂໍ້ກຳນົດໃນການເຮັດວຽກ. ໃນລະຫວ່າງການລາພັກ ບໍ່ໄດ້ຮັບຄ່າຈ້າງ ບໍລິສັດຈະຈັດຫາທີ່ພັກໃຫ້ ຄຸ້ມຄອງທາງການແພດ ແລະ ເບ້ຍລ້ຽງອື່ນໆ.

ນັກບິນສ່ວນໃຫ່ຍໃນສາຍການບິນ ເອມີເຣດ ແມ່ນຄົນຕ່າງຊາດ ບໍ່ມີຄຸນສົມບັດທີ່ຈະໄດ້ຮັບສິດທິປະໂຫຍດຂອງສະຫະລັດເອມິເຣດ. ສາຍການບິນ ເອມີເຣດ ໄດ້ຫຼຸດຕຳແໜ່ງງານຫຼາຍພັນຕຳແໜ່ງໃນປີນີ້ເກືອບ 600 ຄົນ ແລະ ຈອດເຮືອບິນຫຼາຍລຳລວມທັງ Airbus A380 ກ່ວາ100 ລຳ ອັນເນື່ອງຈາກການລະບາດຂອງໂຄວິດ-19.

ກ່ອນຈະເກີດວິກິດ ສາຍການບິນ ເອມີເຣດ ໄດ້ຈ້າງພະນັກງານ 60.000 ຄົນລວມທັງນັກບິນ 4.300 ຄົນ ແລະ ພະນັກງານຕ້ອນຮັບເກືອນ 22,000 ຄົນ.