ປະສົບການເກືອບຕາຍ ອາດກ່ຽວຂ້ອງກັບສະໝອງທີ່ສັບສົນລະຫ່ວາງການຫລັບ ແລະ ຕື່ນ
ການວິໄຈບອກວ່າ ປະສົບການເກືອບຕາຍ ອາດກ່ຽວຂ້ອງກັບການທີ່ສະໝອງສັບສົນລະຫ່ວາງການຫລັບ ແລະ ຕື່ນ ເຊື່ອວ່າຫລາຍໆຄົນອາດເຄີຍໄດ້ຍິນເລື່ອງລາວຂອງປະສົບການເກືອບຕາຍ ຫລື ຫວິດຕາຍ (Near Death Experiences) ກັນມາແດ່ຈັກເທື່ອແລ້ວໃນຊີວິດ ໂດຍນີ້ເປັນອາການທີ່ຜູ້ຄົນຮູ້ສຶກຄືກັບວ່າໂຕເອງນັ້ນວິນຍານຫລຸດອອກຈາກຮ່າງໃນໄລຍະເວລາທີ່ຊີວິດຕົກຢູ່ໃນອັນຕະລາຍ ແລະ ທີ່ຜ່ານໆມາເຮົາບໍ່ອາດຮູ້ໄດ້ເລີຍວ່າອາການນີ້ຄວາມຈິງແລ້ວເກີດຂຶ້ນຈາກຫຍັງກັນແທ້.
ແຕ່ເມື່ອມໍ່ໆນີ້ ໄດ້ມີການວິໄຈໃໝ່ສຸດຖືກເປີດເຜີຍໃນສະຖາສະຖາບັນປະສາດວິທະຍາແຫ່ງເອີຣົບ ເຊິ່ງອອກມາບອກວ່າຄວາມຈິງແລ້ວປະສົບການເກືອບຕາຍທີ່ຫລາຍໆຄົນພົບນັ້ນ ອາດຈະມາຈາກການທີ່ສະໝອງສັບສົນລະຫ່ວາງການຫລັບ ແລະ ຕື່ນກໍເປັນໄດ້.
ພາຍໃນການວິໄຈນີ້ທີມນັກວິທະຍາສາດໄດ້ມີການກວດສອບພົບຄວາມກ່ຽວຂ້ອງລະຫ່ວາງປະສົບການຫວິດຕາຍ ກັບຄວາມຜິດປົກກະຕິດ້ານການນອນ ເຊິ່ງເກີດຂຶ້ນໃນໄລຍະການນອນແບບ (Rapid Eye Movement “REM”) ໄລຍະເວລາທີ່ຄົນເຮົາມີໂອກາດຈະຝັນໄດ້ຫລາຍທີ່ສຸດໃນຍາມກາງຄືນ.
ອ້າງອີງຈາກທີມວິໄຈ ພວກເຂົາໄດ້ເຮັດການກວດສອບຂໍ້ມູນຂອງອາສາສະໝັກຈຳນວນ 1.034 ຄົນ ໃນ 35 ປະເທດ ໂດຍໃຊ້ແພລດຟອມອອນລາຍຊື່ Prolific Academic ແລະ ພົບວ່າ ປະມານ 10% ຂອງອາສາສະໝັກທັງໝົດນັ້ນເປັນຜູ້ທີ່ມີຄວາມເປັນໄປໄດ້ສູງທີ່ຈະເຄີຍມີປະສົບການເກືອບຕາຍ ຫລື ຫວິດຕາຍແທ້ໆ. ທີ່ໜ້າສົນໃຈຄື ໃນບັນດາຄົນອ້າງໂຕວ່າເຄີຍພົບກັບປະສົບການຫວິດຕາຍມາກ່ອນນັ້ນ ທີມນັກວິໄຈໄດ້ພົບວ່າມີຄົນຫລາຍເຖິງ 47% ທີ່ລາຍງານວ່າຕົນເອງນັ້ນມີອາການຄວາມຜິດປົກກະຕິດ້ານການນອນ ດັ່ງ ອາການອຳມະພາດ, ຜີອຳ ຫລື ເຫັນພາບຫລອນມາກ່ອນ.
ນີ້ຖືວ່າເປັນໂຕເລກທີ່ສູງຫລາຍເມື່ອທຽບກັບໂຕເລກຜູ້ມີອາການຄວາມຜິດປົກກະຕິດ້ານການນອນໃນກຸ່ມຄົນທີ່ບໍ່ມີປະສົບການຫວິດຕາຍມາກ່ອນ ເຊິ່ງຢູ່ປະມານ 14% ເທົ່ານັ້ນ.
ເປັນໄປໄດ້ວ່າໃນຕອນທີ່ຮ່າງກາຍຂອງຄົນເຮົາຕົກຢູ່ໃນອັນຕະລາຍເຖິງຊີວິດ ສະໝອງຂອງເຮົາຈະຢູ່ໃນສະພາບທີ່ບໍ່ສາມາດແຍກໄດ້ວ່າຕົນເອງນັ້ນຕົກຢູ່ໃນສະພາບທີ່ມີສະຕິຫລືບໍ່. ດັ່ງນັ້ນ, ເຮົາຈຶ່ງເຫັນຄວາມຝັນໃນເວລາທີ່ຕື່ນ ແລະ ນຳໄປສູູ່ແນວຄິດເລື່ອງປະສົບການຫວິດຕາມ. ຖືວ່າໜ້າເສຍດາຍຫລາຍທີ່ວຽກງານວິໄຈໃນເທື່ອນີ້ ພຽງແຕ່ສະແດງໃຫ້ເຫັນເຖິງໂຕເລກທາງສະຖິຕິທີ່ກ່ຽວຂ້ອງກັນຂອງປະສົບການຫວິດຕາຍ ແລະ ຄວາມຜິດປົກກະຕິດ້ານການນອນເທົ່ານັ້ນ ບໍ່ໄດ້ມີການຢັ້ງຢືນວ່າອັນໃດເປັນສາເຫດທີ່ຄົນບາງກຸ່ມມີປະສົບການຫວິດຕາຍແຕ່ຢ່າງໃດ. ເຖິງຈະເປັນແນວນັ້ນກໍຕາມ ສິ່ງດຽວທີ່ທີມແພດຫລາຍຝ່າຍອ່າວໝັ້ນໃຈກ່ຽວກັບປະສົບການຫວິດຕາຍເຫລົ່ານີ້ຄື ນີ້ເປັນເລື່ອງລາວທີ່ສາມາດອະທິບາຍໄດ້ ແລະ ຄົງຈະບໍ່ແມ່ນເລື່ອງທາງໄສຍະສາດດັ່ງທີ່ຫລາຍໆຄົນຄິດນັ້ນເອງ.
