ເກີດເຫດໄຟໄໝ້ເຮືອນປະຊາຊົນ ບ້ານນອງວິໄລ ມີຜູ້ເສຍຊີວິດ 1 ຄົນ

​ເຈົ້າໜ້າ​ທີ່​ໜ່ວຍ​ງາ​ນສະກັດ​ກັ້ນ ​ແລະ ຕ້ານ​ອັກຄີ​ໄພ ​ເມືອງ​ນອງ ​ແຂວງ​ສະຫວັນ​ນະ​ເຂດ ​​ແຈ້ງ​ໃຫ້​ຮູ້​ວ່າ: ບ່າຍ​ໂມງ​ເຄິ່ງຂອງ​ວັນ​ທີ 24 ຕຸລາ​ຜ່ານ​ມາ​ນີ້ ​ໄດ້​ເກີດ​ເຫດ​ໄຟ​ໄໝ້​ເຮືອນ​ຂອງ​ທ້າວ ຈັນ​ລະຄອນ ພິມ​ມະ​ເສນ ອາຍຸ 32 ປີ ອາຊີບ​ພະນັກງານ (ຕຳຫລວດ) ຢູ່​ໜ່ວຍ 6 ຂອງ​ບ້ານ​ນອງ​ວິ​ໄລ ​ເສຍ​ຫາຍ​ໝົດ​ກ້ຽງ ທັງ​ສົ່ງ​ຜົນ​ໃຫ້​ແມ່​ເຖົ້າອາຍຸ 90 ປີ ຖືກ​ໄຟ​ໄໝ້​ເສຍ​ຊີວິດ​ຄາ​ທີ່ ​ເພາະ​ຊ່ວງ​ເກີດ​ໄຟ​ໄໝ້​ເຈົ້າຂອງ​ເຮືອນ​ແມ່ນ​ໄດ້​ອອກ​ໄປ​ກ່ຽວ​ເຂົ້າຢູ່​ນາຕັ້ງ​ແຕ່​ເຊົ້າ ​ເຊິ່ງປະຊາຊົນ​ບ້ານ​ໃກ້​ຄຽງ​ໄດ້​ຊ່ວຍ​ຂົນ​ນ້ຳມອດ​ໄຟ ​ແຕ່​ກໍ​ບໍ່​ໄດ້ຜົນ ​ເນື່ອງ​ຈາກ​ເປັນ​ເຮືອນ​ໄມ້ ​ໄຟ​ໄໝ້​ໄດ້​ງ່າຍ.

​ເຈົ້າໜ້າ​ທີ່​ໃຫ້​ຮູ້​ວ່າ: ສາ​ເຫດ​ທີ່ພາ​ໃຫ້​ເກີດ​ອັກຄີ​ໄພ​ໃນ​ຄັ້ງນີ້​ແມ່ນ​ມາ​ຈາກ​ໄຟຟ້າ​ລັດ​ວົງ​ຈອນ ລວມມູນ​ຄ່າ​ຄວາມ​ເສຍ​ຫາຍ​ທັງ​ໝົດຫລາຍ​ກວ່າ 90 ລ້ານ​ກີບ.