ໄຕ້ຝຸ່ນ “ໂຄນີ” ພາຍຸໄຕ້ຝຸ່ນທີ່ຮຸນແຮງທີ່ສຸດໃນປີນີ້ ພັດຖະຫລົ່ມຟີລິບປິນ
ວັນທີ 1 ພະຈິກນີ້, ສຳນັກຂ່າວຊິນຮົວລາຍງານວ່າ: ກົມອຸຕຸນິຍົມວິທະຍາຟີລິບປິນ ລະບຸວ່າ: ໄຕ້ຝຸ່ນ “ໂຄນາ” ພາຍຸໄຕ້ຝຸ່ນທີ່ຮຸນແຮງທີ່ສຸດໃນປີນີ້ສຳລັບປະເທດຟີລິບປິນ ໄດ້ພັດຂຶ້ນຝັ່ງຢູ່ພາກພື້ນ Bicol ທາງໃຕ້ສຸດຂອງເກາະລູຊອນ ເຊິ່ງເປັນເກາະຫລັກຂອງຟີລິບປິນ ໃນຕອນເຊົ້າວັນທີ 1 ພະຈິກນີ້.
ກົມບໍລິການດ້ານບັນຍາກາດ, ທໍລະນີຟີຊິກ ແລະ ດາລາສາດ (PAGASA) ລາຍງານວ່າ: ໄຕ້ຝຸ່ນໂຄນີ ເຊິ່ງທະວີຄວາມຮຸນແຮງເປັນຊຸບເປີໄຕ້ຝຸ່ນເມື່ອເວລາ 02:00 ໂມງ ມີຄວາມໄວລົມສູງສຸດ 225 ກິໂລແມັດຕໍ່ຊົ່ວໂມງ ແລະ ຄວາມໄວລົມສູງສຸດ 280 ກິໂລແມັດຕໍ່ຊົ່ວໂມງ ໃນເວລາພັດຖະຫລົ່ມເມືອງ Bato ແຂວງຄາຕັນດົວເນສ ເຊິ່ງເປັນເກາະທາງຕາເວັນອອກສຽງໃຕ້ຂອງເກາະລູຊອນ ເມື່ອເວລາປະມານ 04:50 ໂມງ ພ້ອມລະບຸວ່າ: ພາຍຸໂຄນີກຳລັງເຄື່ອນທີ່ໄປທາງຕາເວັນຕົກດ້ວຍຄວາມໄວ 25 ກິໂລແມັດຕໍ່ຊົ່ວໂມງ.
ປັດຈຸບັນຍັງບໍ່ມີລາຍງານຄວາມເສຍຫາຍ ຫລື ຜູ້ເສຍຊີວິດ. ເຖິງຢ່າງໃດກໍຕາມ, ມີການອົບພະຍົບປະຊາຊົນໃນພາກພື້ນບີໂຄອອກຈາກພື້ນທີ່ສ່ຽງໄພແລ້ວເປັນຈຳນວນຫລາຍ ເນື່ອງຈາກຢ້ານວ່າອາດເກີດອຸທົກກະໄພເປັນວົງກວ້າງ ລວມທັງດິນເຈື່ອນ ແລະ ມີຄື້ນສູງເຖິງ 3 ແມັດ.
ພາຍຸໄຕ້ຝຸ່ນໂຄນີ ເຊິ່ງເປັນພາຍຸໝຸນຫົວທີ 18 ທີ່ພັດຖະຫລົ່ມຟີລິບປິນໃນປີນີ້ ຈະພັດຜ່ານແຂວງເກຊອນ ແລະ ພື້ນທີ່ອື່ນໆ ທາງຕອນໃຕ້ຂອງນະຄອນຫລວງມະນິລາ ແລະ ອາດອ່ອນກຳລັງລົງເມື່ອພັດເຂົ້າໃກ້ເມືອງຫລວງ ກ່ອນຈະມຸ່ງໜ້າສູ່ທະເລຈີນໃຕ້ໃນວັນທີ 2 ພະຈິກ ໂດຍນະຄອນຫລວງມະນິລາໄດ້ປົດປ້າຍໂຄສະນາຂະໜາດໃຫຍ່ທີ່ຢູ່ຕາມຖະໜົນ ເນື່ອງຈາກຢ້ານວ່າລົມແຮງອາດພັດເຮັດໃຫ້ປ້າຍລົ້ມ ແລະ ເຮັດໃຫ້ມີຜູ້ບາດເຈັບ.
