ຂັບຂີ່ປະໝາດພາໃຫ້ເກີດອຸປະຕິເຫດ ແລະ ເສຍຊີວິດ

          ເຊົ້າວັນທີ 20 ມີນານີ້, ຢູ່ເສັ້ນທາງເລກທີ 10, ໜ້າໂຮງຮຽນຕຳຫລວດ, ເຂດບ້ານດອນຕິ້ວ, ເມືອງໄຊທານີ, ນະຄອນຫລວງວຽງຈັນ ໄດ້ເກີດເຫດລົດໃຫຍ່ຕຳກັບລົດຈັກປະທະກັນຢູ່ຈຸດລ້ຽວກາງທາງຢ່າງຮຸນແຮງ, ສົ່ງຜົນໃຫ້ຜູ້ຂັບຂີ່ລົດຈັກເສຍຊີວິດຄາທີ່.

ເຈົ້າໜ້າທີ່ ຕຳຫລວດຈະລາຈອນ ນະຄອນຫລວງວຽງຈັນ ໃຫ້ຮູ້ວ່າ: ລົດໃຫຍ່ຄັນເກີດເຫດໄດ້ຂັບຂີ່ມາແຕ່ທາງດອນໜູນ ມຸ້ງໜ້າໄປທາງຕະຫລາດດົງໝາກຄາຍ, ສ່ວນລົດຈັກແມ່ນຂັບຂີ່ມາໃນທິດທາງກົງກັນຂ້າມ, ພໍມາຮອດຈຸດເກີດເຫດລົດໃຫຍ່ຄັນດັ່ງກ່າວ ໄດ້ໄປຕຳເອົາລົດຈັກຢ່າງແຮງ ເຮັດໃຫ້ລົດທັງສອງຄັນລາກແກ່ກັນໄປໄກຫລາຍແມັດ ຈົນໄປຕຳເອົາຄູກັນທາງ ແລະ ປ້າຍເຕືອນຢູ່ກາງທາງ ສົ່ງຜົນໃຫ້ຜູ້ຂັບຂີ່ລົດຈັກຊື່: ທ້າວ ວັນຄຳ ວັນບຸນທັນ, ອາຍຸ 50 ປີ, ຢູ່ບ້ານດອນຕີ້ວ, ເມືອງໄຊທານີ ເສຍຊີວິດຄາທີ່, ສ່ວນຜູ້ຂັບຂີ່ລົດໃຫຍ່ຖືກເຈົ້າໜ້າທີ່ກັກຕົວໄວ້ເພື່ອດຳເນີນຄະດີ.

ນັບແຕ່ວັນທີ 1-20 ມີນານີ້, ທົ່ວນະຄອນຫລວງວຽງຈັນ ມີອຸປະຕິເຫດເກີດຂຶ້ນຫລາຍກວ່າ 50 ກໍລະນີ, ເຮັດໃຫ້ມີຜູ້ໄດ້ຮັບບາດເຈັບ ແລະ ພາຫະນະເປ່ເພຢ່າງຫລວງ ຫລາຍ ແລະ ສົ່ງຜົນໃຫ້ມີຜູ້ເສຍຊີວິດ 13 ຄົນ.