ເປີດຕົວຮ້ານຂາຍເຄື່ອງທີ່ລະລຶກ ໃນຊື່ວ່າ ກິຟທ໌ ແກເລີຣີ (Gift Gallery)

ຄຣາວ ພລາຊ່າ ວຽງຈັນ ໄດ້ເປີດຕົວຮ້ານຂາຍເຄື່ອງທີ່ລະລຶກ ໃນຊື່ວ່າ ກິຟທ໌ ແກເລີຣີ (Gift Gallery) ເມື່ອວັນທີ 29 ຕຸລາ 2020 ນີ້ ເຊິ່ງຕົວຮ້ານໄດ້ຕັ້ງຢູ່ຊັ້ນ G ຂອງອາຄານໂຮງແຮມ ໂດຍທາງຜູ້ບໍລິຫານໄດ້ວາງແຜນທີ່ຈະສ້າງຮ້ານດັ່ງກ່າວໃຫ້ເປັນໃນຮູບແບບ one-stop-shop ທີ່ຈໍາຫນ່າຍສິນຄ້າຫັດຖະກໍາ ຫຼື ເຄື່ອງປະດັບຄຸນນະພາບປານີດຜະລິດໃນລາວ. ພາຍໃນຮ້ານໄດ້ມີການວາງສະແດງຜະລິດຕະພັນຫັດຖະກໍາຈາກ ທົ່ວປະເທດລາວ ບໍ່ວ່າຈະເປັນຈໍາພວກຜ້າໄໝຈົນໄປເຖິງເຄື່ອງໄມ້ຫັດຖະກໍາຕ່າງໆ ພ້ອມນັ້ນຍັງມີ ສິນຄ້າກາເຟຈາກທາງໂຮງແຮມອີກດ້ວຍ.

ໜຶ່ງໃນເຫດຜົນຫຼັກຂອງການສ້າງຮ້ານດັ່ງກ່າວນີ້ ແມ່ນເພື່ອຈໍາໜ່າຍສິນຄ້າທີ່ຜະລິດດ້ວຍສີມືຂອງຄົນລາວ ໃຫ້ແກ່ບັນດາແຂກ ຫຼື ລູກຄ້າຄົນ ຕ່າງປະເທດ ແລະ ພໍ່ແມ່ປະຊາຊົນຢູ່ຕົວເມືອງວຽງຈັນ, ທັງນີ້ ກໍເພື່ອເຮັດໃຫ້ຜະລິດຕະພັນຂອງລາວເປັນທີ່ຮູ້ຈັກໃນວົງກວ້າງທັງພາຍໃນ ແລະ ສາກົນ ໂດຍຜ່ານເອກະລັກຄວາມເປັນລາວ ໃນຂະນະດຽວກັນ ກໍຍັງເປັນອີກໜຶ່ງຕົວຊ່ວຍທີ່ຈະສາມາດກະຕຸ້ນເສດຖະກິດພາກທ້ອງຖິ່ນພາຍໃນ ປະເທດອີກດ້ວຍ. ເຊິ່ງວ່າດ້ວຍການອອກແບບຄັອບເຊັບຂອງຮ້ານ ກິຟທ໌ ແກເລີຣີ່ (Gift Gallery) ນີ້ ແມ່ນໄດ້ຜ່ານການຮ່ວມມືປົກຫາລືກັນລະຫວ່າງ ຝ່າຍ ບໍລິຫານຈາກ ຄຣາວ ພລາຊ່າ ແລະ ທ່ານນາງ ຊານດຣ້າ ຮັກ, ເປັນຜູ້ຊ່ຽວຊານຈາກບໍລິສັດ ລາວ ຄາຣູໂຊ້ (Lao Carus0) ທີ່ມີປະສົບການ ດ້ານຫັດຖະກໍາຈາກທົ່ວໂລກເຖິງ 50 ປີ.

ທ່ານນາງ ຊານດຣ້າ ຢັກ ໄດ້ໃຫ້ຄໍາເຫັນວ່າ, “ຂ້າພະເຈົ້າມີຄວາມຮູ້ສຶກຕື່ນເຕັ້ນຫຼາຍກັບຮ້ານ Gift Gallery ທີ່ເປັນເອກະລັກສະເພາະນີ້. ເຊິ່ງຈຸດປະສົງຫຼັກຂອງຂ້າພະເຈົ້າຕໍ່ກັບໂປຣເຈັກດັ່ງກ່າວ ກໍແມ່ນເພື່ອນໍາສະເໜີ ແລະ ສັນສ້າງຄວາມສວຍງາມໃນສິນຄ້າ ທີ່ຄົນລາວໄດ້ອອກມາດ້ວຄວາມປານີດນີ້. ເຊິ່ງບໍລິສັດ ລາວ ຄາຣຸໂຊ (Lao Caruso) ເອງ ກໍຖືວ່າ ມີປະສົບການມາໄດ້ 20 ປີແລ້ວ ໃນການຄຸກຄີກັບງານສີມື ແລະ ໄດ້ຮັບການຍອມຮັບໃນລະດັບສາກົນ ເຊິ່ງເຮົາ ໄດ້ເປັນຕົວເລັ່ງໃຫ້ກໍຊ່າງຝີມືຂອງລາວພັດທະນາທັກສະຈົນຊໍານານນັ້ນເອງ. ສະນັ້ນ ເຮົາຈຶ່ງມີຄວາມປາດຖະຫນາທີ່ຈະນໍາສະເຫນີຜົນງານ ສິນລະປະ ແລະ ງານຝີມືທີ່ດີທີ່ສຸດຂອງລາວ ໃຫ້ແກ່ຄົນຈາກທົ່ວໂລກທີ່ມັກຮັກໃນດ້ານນີ້ ໄດ້ຮູ້ຈັກທີ່ສຸດ ແລະ ຄິດທີ່ຈະສະສົມມັນ”

ພ້ອມກັນນັ້ນ ທ່ານນາງ ແພັດເທຣຍ ປູຢາດ, ປະທານໃຫຍ່ຂອງໂຮງແຮມ ຄຣາວ ພລາຊ່າ ວຽງຈັນ ໄດ້ໃຫ້ຄໍາກ່າວວ່າ, “ຖືວ່າເປັນສິ່ງທີ່ໜ້າຕື່ນເຕັ້ນ ແລະ ແປກໃໝ່ສໍາລັບໂຮງແຮມ ຄຣາວ ພລາຊ່າ ວຽງຈັນ ທີ່ຈະເປັນສູນກາງໃນການວາງສະແດງສິ່ງທີ່ດີທີ່ສຸດໃນປະເທດລາວ, ໂດຍສະເພາະໄລເວລາແບບນີ້, ທາງເຮົາຍິ່ງຕ້ອງໄດ້ຮ່ວມມືຢ່າງໃກ້ຊິດກັບບັນດາຜູ້ປະກອບການພາຍໃນປະເທດໃຫ້ຫຼາຍຂຶ້ນ ເພື່ອເປັນການຂັບເຂື່ອນທຸລະກິດຂອງພວກເຂົາໃຫ້ກ້າວໄປຂ້າງໜ້າ ແລະ ຍັງໄດ້ເປັນສ່ອງທາງໃນການນໍາສະແດງຄວາມສາມາດຂອງຄົນລາວໃຫ້ເປັນທີ່ປະຈັກ, ເນື່ອງຈາກທາງໂຮງແຮມເຮົາບໍ່ໄດ້ສັນທັດໃນດ້ານເຄື່ອງຫັດຖະກໍາເທົ່າທີ່ຄວນ ພວກເຮົາຈຶ່ງໄດ້ຮ່ວມມືກັບທ່ານນາງ ຊານດຣ້າ ຈາກ ບໍລິສັດ ລາວ ຄາຣຸໂຊ (Lao Carus0) ເພື່ອເປັນທີ່ປຶກສາກັບໂປຣເຈັກດັ່ງກ່າວ ແລະ ຊ່ວຍນໍາສະເຫນີຜົນງານລະດັບຄຸນນະພາບນີ້, ຂ້າພະເຈົ້າມີ ຄວາມປາດຖະນາຢ່າງຍິ່ງ ທີ່ຈະໃຫ້ ກິຟທ໌ ແກເລີຣີ (Gift Gallery) ກາຍເປັນທີ່ຮູ້ຈັກໃນນາມສະຖານທີ່ສໍາລັບການວາງສະແດງຈໍາຫນ່າຍສິນຄ້າ ສີມືທີ່ດີທີ່ສຸດ ເທົ່າທີ່ນັກທ່ອງທ່ຽວສາມາດຊອກຫາໄດ້ໃນລາວ. ໂດຍທີ່ມີພວກເຮົາໄດ້ເປັນສ່ວນໜຶ່ງໃນຄວາມສໍາເລັດດັ່ງກ່າວ” ກິຟທ໌ ແກເລີຣີ (Gift Gallery) ໄດ້ມີການນໍາເອົາສິນຄ້າຈາກແບຣນດັງຫຼາຍແບຣນ ເຊັ່ນ Lao Natural, Birds Follow Spring, TaiBaan, Khaolao “ເຂົ້າລາວ”, Traditional Arts & Ethnology Centre, Ock Pop Tok, AQUA DE BAMBOO, KHANG, Caruso Lao cca: Magic Lao Carpets Handicraft.