ທູດ ສ.ອາເມລິກາ ປະຈຳບັນດາປະເທດລຸ່ມແມ່ນ້ຳຂອງ ຫາລືວຽກງານ ທຸລະກິດໃນຂົງເຂດອິນໂດ-ປາຊີຟິກ ໃນໄລຍະໂຄວິດ-19
ບັນດາເອກອັກຄະລັດຖະທູດສະຫະລັດອາເມລິກາ ປະຈຳບັນດາປະເທດຂົງເຂດລຸ່ມແມ່ນ້ຳຂອງ ໄດ້ຈັດເວທີປຶກສາຫາລືວຽກງານທຸລະກິດໃນຂົງເຂດອິນໂດ-ປາຊີຟິກ ແບບທາງໄກຂຶ້ນ ທີ່ນະຄອນຫລວງຮ່າໂນ້ຍ ສສ.ຫວຽດນາມ ໃນວັນທີ 28-29 ຕຸລານີ້. ສຳລັບຢູ່ ສປປ ລາວ ນຳໂດຍທ່ານ ປີເຕີ ເຮມ໋ອນ ເອກອັກຄະລັດຖະທູດ ສ.ອາເມລິກາ ປະຈຳ ສປປ ລາວ ກໍໄດ້ເຂົ້າຮ່ວມກອງປະຊຸມດັ່ງກ່າວໃນວັນທີ 29 ຕຸລານີ້ ທີ່ໂຮງແຮມຄຣາວພາຊາ ນະຄອນຫລວງວຽງຈັນ, ໂດຍມີຜູ້ເຂົ້າຮ່ວມຈາກພາກລັດ, ເອກະຊົນ ເພື່ອວິເຄາະໂອກາດດ້ານການຄ້າ ແລະ ການລົງທຶນສາກົນ ໃນໄລຍະຫລັງເກີດວິກິດໂຄວິດ-19.
ທ່ານ ປີເຕີ ເຮມ໋ອນ ກ່າວວ່າ: ສ.ອາເມລິການ ໄດ້ໃຫ້ບູລິມະສິດສູງກ່ຽວກັບການລົງທຶນຂອງອາເມລິກາທີ່ມີຄຸນນະພາບໃນພາກພື້ນອິນໂດ-ປາຊີຟິກ ຄືໃນປີ 2019 ຕົວເລກການລົງທຶນດັ່ງກ່າວມີມູນຄ່າສູງເຖິງ 955 ຕື້ກວ່າໂດລາ ເຊິ່ງໃນນັ້ນສະເພາະບັນດາປະເທດອາຊຽນກວມເອົາຫລາຍກວ່າ 338 ຕື້ໂດລາ. ພ້ອມກັນນີ້, ພວກເຮົາຈະສືບຕໍ່ເຮັດວຽກຮ່ວມກັບລັດຖະບານລາວ ແລະ ພາກເອກະຊົນ ເພື່ອສ້າງສະພາບແວລ້ອມທີ່ເອື້ອອຳນວຍຕໍ່ການເຮັດທຸລະກິດ ແລະ ສະໜັບສະໜູນເວທີການສົນທະນາປຶກສາຫາລື ລະຫວ່າງພາກລັດ ແລະ ເອກະຊົນແບບໂປ່ງໃສຍິ່ງຂຶ້ນ ເຊິ່ງມັນຈະສາມາດສ້າງໂອກາດໃຫ້ແກ່ບັນດານັກລົງທຶນຕ່າງປະເທດ ລວມທັງບໍລິສັດອາເມລິກາ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ມີປະສິດທິຜົນສູງຂຶ້ນ.
ທ່ານ ປີເຕີ ເຮມ໋ອນ ກ່າວຕື່ມວ່າ: ສປປ ລາວ ມີປະຊາກອນທີ່ໜຸ່ມນ້ອຍກວມຈຳນວນຫລາຍ ໃນບັນດາສະມາຊິກອາຊຽນ ເຮັດໃຫ້ ສປປ ລາວ ມີທ່າແຮງຫລາຍໃນອະນາຄົດ. ເມື່ອກ່ອນປະເທດລາວມີບັນຫາທາງດ້ານການເຊື່ອມໂຍງຍາກ ເພາະເປັນເຂດພູດອຍ, ແຕ່ປັດຈຸບັນນີ້ໄດ້ມີການພັດທະ ນາເສັ້ນທາງຄົມມະນາຄົມເປັນຈຳນວນຫລາຍ ໂດຍສະເພາະມີເສັ້ນທາງລົດໄຟທີ່ຈະສາມາດເຊື່ອມໂຍງ ກັບບັນດາປະເທດເພື່ອນບ້ານໄດ້ ເປັນຕົ້ນ ຈີນ, ໄທ, ຫວຽດນາມ ແລະ ປະເທດອື່ນໆຫລາຍຂຶ້ນ. ນອກຈາກນີ້, ຍັງມີເສັ້ນທາງທາງດີຈີຕອນທີ່ເຮັດໃຫ້ ສປປ ລາວ ສາມາດແຂ່ງຂັນ ແລະ ມີການຕິດຕໍ່ ທາງເສດຖະກິດກັບຕ່າງປະເທດນັບມື້ຫລາຍຂຶ້ນ. ພວກເຮົາໃນນາມທູດກໍຈະແນະນຳໃຫ້ບັນດາບໍລິສັດ ຫລື ນັກລົງທຶນຂອງສະຫະລັດອາເມລິກາທີ່ກຳລັງສຳຫລວດຕະຫລາດ ຫລື ໂອກາດຢູ່ຫວຽດນາມ ແລະ ໄທ ເພື່ອດຶງດູດໃຫ້ພວກເຂົາຫັນມາເບິ່ງລາວນຳ ເພື່ອວ່າເຂົາຈະມີຄວາມສົນໃຈໃນການລົງທຶນດ້ານໂລຈິດສະຕິກ ແລະ ເສດຖະກິດດີຈີຕອນ, ລົງທຶນດ້ານກະສິກຳປອດສານພິດ, ດ້ານພະລັງງານທາງນ້ຳ, ລົມ ແລະ ແສງຕາເວັນ ເພາະວ່າ ສປປ ລາວ ຍັງມີທ່າແຮງທາງດ້ານນີ້ຫລາຍ.
