ທ່ອງທ່ຽວສະເໜີພາກລັດກຳນົດນະໂຍບາຍໃຫ້ຊັດເຈນຕື່ມຕໍ່ການຊຳລະໜີ້ສິນໄລຍະໂຄວິດ-19
ໃນໄລຍະການແຜ່ລະບາດຂອງພະຍາດໂຄວິດ-19 ບັນດານັກທຸລະກິດ ແລະ ຜູ້ປະກອບການຫລາຍຂົງເຂດ ຕ່າງກໍພົບຄວາມຫຍຸ້ງຍາກໃນການດຳເນີນທຸລະກິດຂອງຕົນ ລວມທັງຜູ້ປະກອບການດ້ານການທ່ອງທ່ຽວເຊັ່ນກັນ ເນື່ອງຈາກປະຕິບັດຕາມມາດຕະການປ້ອງກັນ ແລະ ຄວາມຄຸມການແຜ່ລະບາດຂອງພະຍາດດັ່ງກ່າວ ເພື່ອບໍ່ໃຫ້ນັກທ່ອງທ່ຽວຕ່າງປະເທດເຂົ້າມາ ເຮັດໃຫ້ລາຍຮັບຫລຸດລົງ, ໃນຂະນະທີ່ຜູ້ປະກອບການບາງລາຍໄດ້ກູ້ຢືມເງິນມາພັດທະນາກິດຈະການຂອງຕົນ ແຕ່ເມື່ອພົບວິກິດດັ່ງກ່າວ ກໍບໍ່ສາມາດຈະຊຳລະເງິນຕາມສັນຍາໄດ້.
ຕໍ່ບັນຫາດັ່ງກ່າວ, ທ່ານ ນາງ ສອນທິດາ ອຸນາພົມ ຜູ້ອຳນວຍການບໍລິສັດ ພັດທະນາແຫລ່ງທ່ອງທ່ຽວນໍ້າຕົກຕາດເຍືອງ ທີ່ແຂວງຈຳປາສັກ ກໍໄດ້ຍົກໃຫ້ເຫັນເຖິງຂໍ້ຫຍຸ້ງຍາກຕ່າງໆໃນໄລຍະການແຜ່ລະບາດຂອງພະຍາດໂຄວິດ-19 ເພາະຂາດລາຍຮັບ ແລະ ມີໜີ້ສິນຄຸມເຄືອ ເນື່ອງຈາກວ່າໄດ້ກູ້ຢືມເງິນຈາກທະນາຄານມາລົງທຶນພັດທະນາ ນັບແຕ່ຂອດພື້ນຖານໂຄງລ່າງໄຟຟ້າ, ຖະໜົນຫົນທາງ ແລະ ອື່ນໆ ແລະ ກະທົບກັບສະພາບການແຜ່ລະບາດຂອງພະຍາດໂຄວິດ-19 ນີ້ ໄດ້ເຮັດໃຫ້ການດຳເນີນທຸລະກິດທ່ອງທ່ຽວຂອງຕົນໄດ້ຢຸດຕິລົງ, ບໍ່ມີລາຍຮັບ ແລະ ບໍ່ສາມາດປະຕິບັດໄດ້ຕາມສັນຍາກັບທະນາຄານໄດ້. ແຕ່ຄວາມຈິງແລ້ວ ທາງລັດຖະບານແມ່ນມີນະໂຍບາຍທີ່ດີຫລາຍຕໍ່ຜູ້ດຳເນີນທຸລະກິດ, ຜູ້ປະກອບການ ແລະ ຜູ້ທີ່ໄດ້ຮັບຜົນກະທົບໃນຊ່ວງວິກິດການດັ່ງກ່າວ, ແຕ່ຕົວຈິງແລ້ວ ການຈັດຕັ້ງປະຕິບັດແມ່ນຍັງບໍ່ແທດເໝາະ. ສະນັ້ນ, ຈຶ່ງຂໍສະເໜີໃຫ້ເບື້ອງລັດເບິ່ງເບື້ອງນະໂຍບາຍຊັດເຈນ ອັນໃດທີ່ເປັນສ່ວນຮ່ວມຂອງປະຊາຊົນ ແລະ ມີຜົນປະໂຫຍດ.
ທ່ານ ນາງ ສອນທິດາ ອຸນາພົມ ໃຫ້ຮູ້ອີກວ່າ: ວິກິດໂຄວິດ-19 ໄດ້ສົ່ງຜົນກະທົບຮ້າຍແຮງຕໍ່ຜູ້ປະກອບການທ່ອງທ່ຽວ, ໂຮງແຮມ, ເຮືອນພັກຕ່າງໆ ຍ້ອນກະທົບໂດຍກົງ ເນື່ອງຈາກປະຕິບັດຕາມມາດຕະການປ້ອງກັນ ແລະ ບໍ່ມີນັກທ່ອງທ່ຽວຕ່າງປະເທດເຂົ້າມາ, ລາຍຮັບຕົກຕໍ່າລົງຫລາຍ ແລະ ຂໍໃຫ້ເບື້ອງລັດເບິ່ງຄືນນະໂຍບາຍຕໍ່ຜູ້ດຳເນີນທຸລະກິດໃນຂະແໜງທ່ອງທ່ຽວ, ໂຮງແຮມ, ເຮືອນພັກ ເພື່ອມີເງື່ອນໄຂຟື້ນຟູທຸລະກິດຂອງຕົນ.
